نێچیرڤان بارزانی بڕی ١٠ هەزار دۆلاری وەک خەڵات دا بە هەر یاریزانێکی هەڵبژاردەی تۆپی پێی عێراق
دوای میوانداریکردنیان لە لایەن سەرۆکی هەرێمی کوردستانەوە، ئەندامێکی یەکێتی تۆپی پێی عێراق ئاشکرایکرد دوای میوانداریکردنەکەیان لەسەرۆکایەتی هەرێم نێچیرڤان بارزانی خەڵاتیکردن و پارەی پێداون
غالب ئەلزاملی ئەندامی یەکێتی تۆپی پێی عێراق رایگەیاند، لە میانی سەردانەکەیان بۆ هەولێر، نێچیرڤان بارزانی سەرۆکی هەرێم بە گەرمی پێشوازی لە یاریزانان و ئەندامانی وەفدەکەی هەڵبژاردەی تۆپی پێی عێراق کردووە.
ئەو ئەندامەی یەکێتی تۆپی پێی عێراق ئاشکراشیکردوە: "وەک دەستخۆشییەک بۆ ئەو سەرکەوتنەی بەدەستیان هێنا، نێچیرڤان بارزانی بڕی ١٠ هەزار دۆلاری وەک خەڵات دا بە هەر یاریزانێکی هەڵبژاردەی تۆپی پێی عێراق و سەرجەم ئەندامانی وەفدەکە".
دەشڵێت: "سەرۆکی هەرێم رستەیەکی جوانی دەوت ئەویش: ئێمە یەک نیشتمانین و ئەوەی سیاسییەکان نەیانتوانی بیکەن، وەرزشوانان ئەنجامیان دا".
ئەوەشی ئاشکراکردوە: "سەرۆکایەتی هەرێم ئۆتۆمبێلی سەرۆکایەتی ئامادەکردبوو بۆ گواستنەوەی یاریزانان و ئەندامانی وەفدەکە لە فڕۆکەخانەی هەولێرەوە بۆ شوێنی مانەوە و دواتر لەگەڵ بەرپرسانی شاری هەولێر لەپێش هەموویانەوە ئومێد خۆشناوی پارێزگار داوەتێکی شاهانە کران".
|