توێژینەوەیەك باس لە تەندروستی ئەو كەسانە دەكات کە لە كۆرۆنا چاكبوونەتەوە
توێژینەوەیەكی زانستی باس لەوە دەكات ئەو كەسانەی لە كۆرۆنا چاكبوونەتەوە، هێشتا بەشێكیان نیشانەی هیلاكی و تەنگەنەفەسیان پێوە دیارە .
توێژینەوەكە لە لایەن گۆڤاری "جاما"ی پزیشكییەوە بڵاوكراوەتەوە و لەسەر ئەو نەخۆشانە ئەنجامدراوە، كە لە وڵاتی ئیتالیا فایرۆسی كۆرۆنای پەڕاندووە .
بە گوێرەی توێژینەوەكە لە90%ی ئەوانەی چاكبوونەتەوە، هێشتا نیشانەی هیلاكی و لەشداهێزران و تەنگەنەفسییان تێدا ماوە .
ئەوانەی تووشی ڤایرۆسەكە بوون، نیشانەكانی وەك كۆكین و تای بەرز و تەنگەنەفەسی و ئازاری ماسولكە وجومگەكان و هیلاكی و تێكچوونی دەزگای هەرس و كەم خوێنییان بەشێوەیەكی ئاشكرا پێوە دیارە .
توێژینەوەكە لەسەر دۆخی تەندروستی ئەو كەسانە كراوە، كە لە ئیتالیا لە نێوان 21 ئازار تا 29 حوزەیران تووشی فایرۆسەكە بوون و چاكبوونەتەوە .
دەركەوتووە ئەوانەی تەمەنیان لە نێوان 19 بۆ 84 ساڵیدا بووە، ناوەندی تێكڕای مانەوەیان لە نەخۆشخانە 14 ڕۆژ بووە .
وەك توێژینەوەكە باسی كردووە، لە 179 كەس تەنها 18 كەسیان بە تەواوی چاكبوونەتەوە و هیچ نیشانەیەكی نەخۆشییەكەیان تێدا نەماوە، لە كاتێكدا ئەوانی دیكە هێشتا كێشەی تەنگەنەفەسی و ئازاری جومگەكان و سنگیان هەیە .
لە سەرەتای ئەمساڵەوە ژمارەی ئەو كەسانەی تووشی فایرۆسی كۆرۆنا بوون لەسەرانسەری جیهان، گەیشتووەتە زیاتر لە 12 ملیۆن و 500 هەزار كەس و تائێستاش بەهۆیەوە 560 هەزار كەسیش گیانیان لەدەستداوە .
لە ئێستادا ویلایەتە یەكگرتووەكانی ئەمریكا زۆرترین زیانی كۆرۆنای بەركەوتووە و بەشێوەیەكی گشتی ڕۆژانە زیاتر لە 66 هەزار كەس تووشی كۆرۆنا دەبن، بەو هۆیەشەوە لە ئێستادا ژمارەی تووشبوان گەیشتووەتە 3 ملیۆن و 200 هەزار كەس و 135 هەزار كەسیش بەهۆی پەتاكەوە گیانیان لەدەستداوە .
|