وادەی ناردنی پارەکەی بەغداد بۆ هەرێم ڕاگەیەندرا
ئەندامێکی لیژنەی دارایی ئەنجوومەنی نوێنەرانی عێراق رایدەگەیەنێت، چاوەڕوان دەکرێت هەفتەی داهاتوو عێراق ٧٠٠ ملیار دینارەکە ڕەوانەی هەرێم بکات.
ژیان:
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق رایگەیاند، هیچ کێشەیەک لەبەردەم ناردنی ٧٠٠ ملیارەکە نییە و پێدەچێت لە رۆژی یەکشەممەوە دەست بە ناردنی بکرێت، ئەگەر پارەی پێویست لە بانکەکان هەبێت.
وتیشی، هەرێمی کوردستان تەواوی ئەو زانیارییانەی کە لێی داواکرابوون بە وردی بۆ پەرلەمان و حکومەتی عێراقی ئامادەی کردووە و ئێستا هیچ شتێکی ناڕوون نەماوە و هەمووان بەرچاو ڕوونییان هەیە.
ئەوەشی خستەڕوو، هیچ ئاستەنگێک لە بەردەم ناردنی پشکێکی دیکەی قەرز بۆ هەرێم نییە و چاوەڕوان دەکرێت لە چەند رۆژی داهاتوودا بەغداد ٧٠٠ ملیار دینار دەنێرێت بۆ هەرێم.
دوێنێ لیژنەی دارایی ئەنجومەنی نوێنەرانی عێراق میوانداری وەزیرانی دارایی هەرێم و عێراقی کرد و داهات و مووچەی هەرێم و جێبەجێکردنی رێنماییەکانی بودجە تاوتوێکران
|