دوو برای تۆمەتباری شەهیدکردنی پۆلیس ڕزگار ئەحمەد دەستگیرکران

بەرێوەبەرایەتی پۆلیسی سلێمانی ڕایگەیاند، دوو تۆمەتباریان دەستگیر کردوە کە برای ئەو تۆمەتبارەن ڕزگار ئەحمەدی شەهید کرد.

لەراگەیەندراوێکدا بەرێوەبەرایەتی پۆلیسی سلێمانی ئاشکرایکردووە، دوای ئەوەی لە ڕۆژی ٦ی١ی ٢٠٢٤ ، هاوڵاتییەک سکاڵای تۆمارکرد کە لەلایەن دوو تۆمەتبارەوە بەچەک چوونەتە سەری و بەزۆر سواری ئۆتۆمبێلیان کردووەو هەڕەشەیان لێکردووە، هێزەکانی پۆلیس لێکۆڵینەوەو بەدواداچوونەکانیان دەستپێکرد و بەڕێز دادوەر بڕیاریدا بە دەستگیرکردنی تۆمەتباران بەپێی ماددەی ٤٠٥-٣١ لەیاسای سزادانی عیراقی، لێکۆڵینەوەکانی پۆلیس بەردەوام بوو بۆ دۆزینەوەو دەستگیرکردنی تۆمەتباران.

دەشڵێت: سەرەنجام توانرا لەڕۆی ٢٤ی١ی ٢٠٢٤ هەریەکە لە تۆمەتباران ( ک ،ێ  و ڕ،ێ ) لەلایەن هێزەکانی بەڕێوەبەرایەتی پۆلیسی پارێزگای سلێمانییەوە دەستگیربکرێن .

پۆلیسی سلێمانی ئاماژی بەوەشکردووە: لەکاتی لێکۆڵینەوەکاندا دەرکەوت هەردوو تۆمەتبار برای تۆمەتباری شەهیدکردنی (ڕێپێدراوی پۆلیس ڕزگار ئەحمەد )ن، و تۆمەتبار (ک ،ێ ) پێشینەی تاوانی هەیەو پێشتر بەبڕیاری بەڕێز دادوەرو لەلایەن دادگاوە سزادراوە.

ئەوەشخراوەتەڕوو: لەئێستادا تۆمەتباران بەندن و لەلایەن بنکەی پۆلیسی ڕزگارییەوە پەڕاوی لێکۆڵینەوەیان بۆ کراوەتەوە.