سەبارەت بە نرخی دەرمانە روسیەکە روونکردنەوە دەدرێت

هەولێر

كۆمپانیای ئاوا مێدیكا لەبارەی ئەو دەرمانەی بۆ چارەسەری كۆڕۆنا لە هەرێمی کوردستان دروستدەکرێت، روونکردنەوەیەکی بڵاوکردەوە.

لە روونکردنەوەکەدا هاتوو، كۆمپانیای ئاوامێدیكا یەكەمین كارگەی درووستكردنی دەرمانە لە مێژووی كوردستاندا و لە ڕیزی كارگە ئەوروپییەكانیش دادەنرێت لە وەزارەتی تەندرووستی عێراق, كە بە پێشكەوتووترین و سەردەمیانەترین ئامێر و ستافی پرۆفیشناڵ كاردەكەن.

ئاماژە بەوەشکراوە، بەستنی گرێبەست لەگەڵ كۆمپانیای Glenmark وە پێدانی ئەو متمانە گەورەیە بە كۆمپانیای ئاوامێدیكا بۆ درووستكردنی (Favipiravir)  لەناو عێراق و وڵاتانی ناوچەكەش گەواهی ئاست بەرزی و كوالیتی بەرزی ئاوامێدیكامان پێدەڵێن .

ئەوەش خراوەتەڕوو، كۆمپانیای ئاوامێدیكا ڕەچاوی سەرجەم ڕێكارە زانستی و یاسایی یەكانی كردووە لە دروستكردن و دابەشكردنی دەرمانی Fabivir .

كۆمپانیای ئاوا مێدیكا راشیگەیاندووە، نرخی Fabivirبە كەمتر لە 70% ـــی نرخی ئەو گرێبەستەی كە وەزارەتی تەندرووستی عێراق كردبووی لەگەڵ كۆمپانیایەكی ڕووسی خەمڵاندووە و نرخەكەش 165 دۆلارە بۆ هەرپاكەتێكی 40 دەنكە حەپی .

دەشڵێت، نرخی فرۆشتن بە وەزارەتی تەندرووستی عێراق و هەرێمی كوردستان هەمان نرخە .

دووپاتیشیکردووەتەوە، فابیڤیر لە زۆربەی وڵاتانی ئاسیا و بەدیاری كراویش ( ڕووسیا و هیندستان و یابان و ئیمارات و قەتەر و سعودیە) بەكاردێت بۆ چارەسەری تووشبووانی كۆرۆنای نوێ بە پشتبەستن بە چەند لێكۆڵینەوەی كلینیكی ئەرێنی لەو وڵاتانە .

هەر لە روونکردنەوەکەی كۆمپانیای ئاوا مێدیكادا هاتووە، ڕێكخراوی تەندروستی جیهانی پاڵپشت و هاندەری سەرەكی بوو لە دروستكردنی فابیڤیر لە ناوخۆی عێراق، هەر ئەوانیش هاریكاربوون ئامۆژگاری كاربوون لە داڕشتنی پرۆتۆكۆڵی چارەسەری تووشبووانی كۆرۆنای نوێ و دانانی فابیڤیر لە چوارچێوەی پرۆتۆكۆڵەكە .

ئاماژەی بەوەشکردووە، فاڤیپراڤیر لەناو پرۆتۆكۆڵی وەزارەتی تەندروستی دانی پێدانراوە و لەژێر چاودێری پزیشكی پسپۆڕ بەكاردێت .

کۆمپانیاکە دەشڵێت، لەكاتە سەختەكاندا بە ئەركی خۆیان زانیوە هاوكاری حكومەتی هەرێمی كوردستان و وەزارەتی تەندروستی بکەن، هەر لە شەڕی دژ بە داعش و هەتا سەردەمی كۆرۆنا هەمیشە پاڵپشتی وەزارەتی تەندروستی بووە و هاوكارییەكانی خۆی گەیاندووە، لە داهاتووشدا لەسەر هەمان ڕێچكە بەردەوام دەبێت و هاوبەشێكی سەرەكی پێشخستنی كەرتی تەندروستی دەبێت لە كوردستان و عێراق .

ئەم رووندکردنەوەیە دوای ئەوە دێت، کە د. گۆران عەبدوڵڵا پزیشک و دکتۆرا لە سیاسەتی نێودەوڵەتی تەندروستی لە نامەیەکی کراوەدا بۆ سەرۆکایەتی دواکاری گشتی هەرێم رایگەیاند، بازرگانییەکی مەترسیدار بە دەرمانی فاڤیپراڤیرەوە دەکرێت و ئەو درەمانە کە بە بڕی ٢٠٠ دۆلار بە حکومەتی هەرێمی کوردستان دەفرۆشرێت، نرخەکەی لە هندستان تەنها بە یەک دۆلارە.