وەزارەتی بەرگری ئەمریکا: هێزەکانمان لەسەر داوای عێراق ماونەتەوە
وتەبێژی وەزارەتی بەرگری ئەمریکا رایدەگەیەنێت: هێزەکانی ئەمریکا لەسەر داوای عێراق دەمێننەوە و پلانی کشانەوەیان لە خاکی عێراق لە ئارادانییە.
پاتریک رایدەر، وتەبێژی وەزارەتی بەرگری ئەمریکا پنتاگۆن رایگەیاند، هێزەکانی ئەمریکا لە عێراق لە ئەرکەکانیان بەردەوام دەبن و پلانی کشانەوەیان نییە، ئاگادارنین بەغداد بە رەسمی داوای کشانەوەی هێزەکانی ئەمریکای کردبێت و ئەوان لەسەر داوای عێراق ماونەتەوە بۆ بەرەنگاربوونەوەی داعش.
ئاماژەی بەوەشکردووە، گفتوگۆکانی ١١ی ئەم مانگە لەبارەی شەڕی دژی داعش و هەماهەنگی ئەمنی و تەکنینی نێوان واشنتۆن و بەغداد بووە، گۆڕینی ئەرکەکانی هێزەکانی هاوپەیمانان لە عێراق لەلایەن بایدنەوە پێداچونەوەی بۆ دەکرێت.
پێشتر لێپرسراوانی عێراق چەندینجار باسیان لە کشانەوەی هێزەکانی ئەمریکا و تەواوی هاوپەیمانان لە عێراق کردووە.
رۆژی ١٠ی ئەم مانگەش ئەنجومەنی نوێنەرانی عێراق لەسەر داوای ١٠٠ پەرلەمانتار کۆبوەوە و داوایانکرد، حکومەتی عێراق بڕیارێکی ئەنجومەنەکە کە لە ساڵی ٢٠٢٠ دەری کردووە بۆ کشانەی هێزەکانی هاوپەیمانان لە عێراق جێبەجێ بکات، بەڵام سونە و بەشێک لە فراکسیۆنە کوردییەکان بەشداری کۆبونەوەکەیان نەکرد.
|