وەزارەتی دارایی: کارمەندانی ئەو بانکانەی مووچە دابەش دەکەن پشووی سبەینێ نایانگرێتەوە
سەرچاوەیەک لە وەزارەتی دارایی ئاشکرای کرد، بەهۆی دابەشکردنی مووچەوە کارمەندانی ئەو بانکانەی مووچە دابەش دەکەن پشووی سبەینێ نایانگرێتەوە.
سەرچاوەیەک لە وەزارەتی دارایی و ئابوریی هەرێم راگەیاند: سبەینێ دووشەممە ١ی نیسانی ٢٠٢٤، کە لە دامودەزگاکانی حکومەتی هەرێم پشووی فەرمییە، بەڵام دابەشکردنی مووچە بەپێی ئەو خشتەیەی کە راگەیەندراوە بەردەوام دەبێت و ئەو بانکانەی مووچە دابەشدەکەن کراوەدەبن.
بە گوێرەی خشتەی دابەشکردنی مووچە، کەپێشتر وەزارەتی دارایی هەرێم بڵاویکردەوە: سبەی دووشەممە ١ـی نیسانی ٢٠٢٤، مووچەی وەزارەتەکانی بازرگانی و پیشەسازی، سامانەسروشتییەکان، گواستنەوە و گەیاندن، کشتوکاڵ و سەرچاوەکانی ئاو، شارەوانی و گەشتوگوزار، ئاوەدانکردنەوە و نیشتەجێکردن و رۆشنبیریی و لاوان دابەشدەکرێت.
حکومەتی هەرێمی کوردستان رایگەیاند، سبەی دووشەممە ١ـی نیسانی ٢٠٢٤، بە بۆنەی سەری ساڵی ئاشوورییەکان، لە سەرجەم دامودەزگاکان پشووی فەرمییە.
|