بافڵ جەلال تاڵەبانی: کرێکاران رۆڵێکی گرنگ و کاریگەریان لە ئاوەدانکردنەوە و گەشەکردنی هەرێمی کوردستان گێڕاوە
لە رۆژی جیهانی کرێکاراندا سەرۆکی یەکێتی نیشتمانی کوردستان پەیامێکی بڵاوکردەوە و رایگەیاند، " پیرۆزباییەکی گەرم لە کرێکارانی کوردستان دەکەم و هیوای سەلامەتی و ژیانێکی باشتریان بۆ دەخوازم".
دەقی پەیامی بافڵ جەلال تاڵەبانی سەرۆکی یەکێتی نیشتمانی کوردستان :
بەبۆنەی رۆژی جیهانیی کرێکارانەوە، پیرۆزباییەکی گەرم لە کرێکارانی کوردستان دەکەم و هیوای سەلامەتی و ژیانێکی باشتریان بۆ دەخوازم.
کرێکارانی کوردستان رۆڵێکی گرنگ و کاریگەریان لە ئاوەدانکردنەوە و گەشەکردنی هەرێمی کوردستان گێڕاوە و پایەیەکی سەرەکیی کۆمەڵگەکەمانن بۆ بونیادنانی داهاتوویەکی گەشتر. ئێمە بە رێزەوە لە پێگە و هەوڵەکانیان دەڕوانین و دەستی ماندووبوونیان دەگووشین، هەروەها سڵاو بۆ رۆحی پاکی ئەو کرێکارانە دەنێرین کە لەکاتی کاردا گیانیان لەدەستداوە.
یەکێتیی نیشتمانیی کوردستان لەهەناوی کرێکاران و رەنجدەرانەوە گەشەی کرد، ئەو مێژووە پڕ لە سەروەری و قوربانیدانەی لەیادنەکردووە و خۆی بە بەشێک لەئێوەی سەربەرز دەزانێت. کارکردنیش بۆ بەدەستهێنانی ماف و باشترکردنی ژیان و گوزەرانتان بە ئەرکی خۆی دەزانێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
|