ئارێز عەبدوڵا: ئەوەی پارتی دەیكات دژ بە سلێمانی خزمەتكردنی بێ بەرامبەرە بە دوژمنانی کورد

لەبەرامبەر ئەو تۆمەتانەی كە لە ڕۆژنامەی خەباتی زمانحاڵی پارتی بڵاوكراونەتەوە گوایە لە سنووری سلێمانی ڕاهێنان بە چەكدرانی پەكەكە دەكرێت، چاودێریكی سیاسی ئاماژە بەوەدەكات ئەو تۆمەتانەی كە پارتی بۆ یەكێتی و ئیدارەی سلێمانی دروستیكردوون و دەیانكات، خزمەتكردنی دوژمنانی كوردە و دژی بەرژەوەندییە گشتییەكانی گەلی كوردە.

ئارێز عەبدوڵا، چاودێری سیاسی و ئەندامی پێشووی مەكتەبی سیاسی یەكێتی ڕاگەیاند: ئەو تۆمەتانەی كە پارتی بە ئاشكرا و بێ گوێدانە پارێزگاریكردن لە بەرژەوەندیە گشتییەكانی گەلەكەمكان دەیانخاتە پاڵ یەكێتی و ئیدارەی سنووری پارێزگای سلێمانی خزمەتكردنێكی بێبەرامبەرە بە دوژمنانی گەلی كورد، لە كاتێكدا پارتی لەڕێگەی دەزگایەكی فەرمی زمانحاڵی خۆیەوە ئەو تۆمەتانە ئاراستەی یەكێتی و ئیدارەی سلێمانی بكات ئەمە كارەساتە كە خۆیشی دەزانیت ئەوەی وتراوە ناڕاستە.

ئاماژەی بەوەشكرد، ئەوەی دەوترێت چەكداری پەكەكە لە سلێمانی هەن و ڕاهێنانیان پێدەكرێت درۆیەكی شاخدارە، بەڵام دەكرێت لایەنگرێكی ئەو حزبە لە سلێمانی هەبیت هەروەك لە هەولێر و دهۆك و ئەنقەرە و هەموو دنیاش لایەنگر هەر هەبووە و  دەبێت، چونكە پەكەكە حزبێكی ئایدۆلۆژییە و لەسەرتاسەری دنیا لایەنگریان هەیە، بۆیە ئەمە ناكاتە ئەوەی لە سلێمانی هەبن و لەهەولێر و دهۆك بوونیان نەبێت.

ئەو چاودێرەی سیاسییە ئەوەشی خستەڕوو، پارتی بەم كارانەی دژ بە بەرژەوەندییە باڵاكانی گەلەكەمان دەوەستێتەوە و لەهەمان كاتیشدا بیانوو دەداتە بە توركیا بۆ ئەوەی بەردەوام بێت لە هێرشكردنە سەر سنووری سلێمانی و زیان گەیاندن بە بەرژەوەندی هاووڵاتیان، هاوكات ئەم جۆرە سیاسەتەی پارتی دەبێتە هۆی تۆخكردنەوەی جیاوازیكردن لە نێوان هەولێر و سلێمانی و دروستكردنی دووبەرەكی زیاتر لە پێناو بەرژەوەندی توركیا.