شاندێکی هەرێمی کوردستان گەیشتە بەغدا

وەزارەتی پلاندانانی هەرێمی کوردستان ڕایگەیاند، شاندێکی باڵای حکومەتی هەرێمی کوردستان بۆ پرسی سەرژمێری گشتی دانیشتوان گەیشتنە بەغدا.

لە راگەیەندراوەکەی وەزارەتی پلاندانانی حکومەتی هەرێمی کوردستان هاتووە، "ئەمڕۆ دووشەممە 28ی تشرینی یەکەمی 2024 شاندێکی باڵای حکومەتی هەرێمی کوردستان بە سەرۆکایەتی د. دارا رەشید، وەزیری پلاندانانی حکومەتی هەرێم و د. ئومێد سەباح، سەرۆکی دیوانی ئەنجومەنی وەزیران و د. ئامانج رەحیم، سکرتێری ئەنجومەنی وەزیرانی هەرێم و سیروان محەمەد، بریکاری وەزارەتی پلاندانانی هەرێم سەردانی بەغدای پایتەختیان کرد".

ئاماژە بەوەکراوە، "ئامانجی سەردانەکە، دیدارو کۆبوونەوەیە لەسەر پرسی سەرژمێری گشتی دانیشتوانی عێراق و هەرێمی کوردستان لەگەڵ لایەنە پەیوەندیدارەکانی عێراق کەوا بڕیار  لە مانگی داهاتوودا  لەبەرواری 20ی تشرینی دووەمی 2024 ئەنجام بدرێت".