دابەشکردنی پارەی بژمێرەکان بۆ دوای پشوەکانی سەری ساڵ دوادەکەوێت
بەهۆی پشوەکانی سەری ساڵەوە دابەشکردنی پارەی بژمێرەکانی پرۆسەی سەرژمێری لە هەرێمی کوردستان دوادەکەوێت، چاوەڕوان دەکرێت دوای دەستپێکردنەوەی دەوام دابەشدەکرێت
مەحمود عوسمان بەرێوەبەری جێبەجێکاری سەرژمێری گشتی دانیشتوان لە هەرێمی کوردستان رایگەیاند: چاوەڕوان بووین بەر لە پشووەکانی سەری ساڵ پارەی بژمێرەکان دابەشبکرێت، بەڵام لە ٢٥ـی ئەم مانگەوە لە هەرێمی کوردستان پشوو راگەیەندراوە و ئەمەش کاریگەری هەبووە، چونکە رێکارەکانی گواستنەوەی پارە بۆ بانکەکان ئەلیکترۆنییە و لە هەرێمی کوردستان دەوامی بانکەکان نییە.
ئاماژەی بەوەشداوە: ٢٧ هەزار بژمێر و مامۆستا و بەڕێوەبەر مافی وەرگرتنی بڕی ٢٥٠ هەزار دیناریان بۆهەر مانگێکی کارکردن هەیە، لیستی ناوی بژمێرەکان ئامادەکراوە و سەرجەم رێکارەکانی وردبینیکردن کۆتاییان هاتووە.
ئەمە لەکاتێکدایە، لە ٢٠ـی تشرینی دووەمی ٢٠٢٤، لە عێراق و هەرێمی کوردستان سەرژمێریی گشتیی دانیشتوان بەشێوەی کردەیی دەستیپێکرد و بە سێ قۆناغ بەڕێوەچوو لە ١٤ـی کانوونی یەکەم کۆتایی هات، ١٢٠ هەزار بژمێر بەشدارییان لە پرۆسەکەدا کرد.
|