تەندروستی دهۆک: حەوت تووشبووی دیکەی کۆرۆنا چاکبوونەوە
یەکێک لە نەخۆشخانەکانی تایبەت بەکۆرۆنا لە هەرێمی کوردستان
فۆتۆ: ئەرشیڤ
دهۆک
بەڕێوەبەرایەتی گشتی تەندروستی دهۆک رایگەیاند، حەوت تووشبووی دیکەی کۆرۆنا چاکبوونەوە و بەوەش کۆی گشتی چاکبووانی کۆرۆنا لە پارێزگاکە گەیشتووەتە ٣٠٠ کەس.
بەڕێوەبەرایەتی گشتی تەندروستی دهۆک لە راگەیەندراوێکدا بڵاویکردەوە، ئەمڕۆ پێنجشەممە ٢٣ی٧ی٢٠٢٠، حەوت تووشبووی دیکەی ڤایرۆسی کۆرۆنای نوێ COVID-19 ، دوای وەرگرتنی چارەسەر بەتەواوەتی چاکبوونەتەوە و نەخۆشخانەیان جێهێشتووە.
ئاماژەی بەوەشکرد، پشکنینی تایبەتی یەک لەدوای یەک بۆ تووشبووەکان کراوە تا ئەو کاتەی کە ئەنجامی پشکنینەکانیان نێگەتیڤ دەرچووە و دواتر بڕیاردراوە بنێردرێنەوە ماڵەوە.
بەڕێوەبەرایەتی گشتی تەندروستی دهۆک راشیگەیاند، بە چاکبوونەوەی ئەو حەوت نەخۆشە، کۆی گشتی چاکبووانی کۆرۆنا لە پارێزگای دهۆک گەیشتووەتە ٣٠٠ کەس و لە ئێستادا تەنها ٦٨ تووشبووی کۆرۆنا لە نەخۆشخانە ماون و لەژێر چاودێری پزیشکیدان.
|