وتەبێژی دەزگای ئاسایشی هەرێمی کوردستان: بە فەرمی رەتی دەکەینەوە هیچ کەسێک بێ سەروشوێن نییە

وتەبێژی دەزگای ئاسایشی ھەرێمی کوردستان چەند زانیاری و نهێنییەک لەسەر رووداوەکانی لالەزار ئاشکرا دەکات و دەڵێت، "بە فەرمی رەتی دەکەینەوە هیچ کەسێک بێ سەروشوێن نییە، لە 19 کەس زیاتر، هیچ بریندارێکی دیکە نییە".

عەقید سەلام عەبدولخالق، وتەبێژی دەزگای ئاسایشی ھەرێمی کوردستان رایگەیاند: ئێمە لە سەرەتاوە بە چەندین شێوازی مەدەنی داواکرابوو ئەو تۆمەتبارانە خۆیان رادەستی هێزەکان بکەن، بەڵام خۆیان رادەست نەکرد.

ئاماژەی بەوەشدا: ئەم رووداوە لە ئەنجامی باکگراوندێکی چەند رۆژە بووە و لەژێر چاودێری ووردی دەزگای ئاسایشدا بوون. ئەم کەسانە پلانگێڕییەکیان هەبوو، پلانیان دانابوو کەسێکی گرنگ تیرۆر بکەن، بافڵ تاڵەبانی، سەرۆکی یەکێتی نیشتیمانی کوردستان یەکێک بوو لەو کەسانە. بەم نزیکانەش ووردەکاری دانپێدانان و پلانەکە بڵاودەکەینەوە. 

باسی لەوەشکرد: چەند کەسێک پلانەکەیان دانابوو، هێزی "میلیشیا"ـیان دروست کردبوو، بە پەیوەندی تەلەفۆنی چەند جارێک داواکراوە خۆیان رادەستی لایەنی پەیوەندیدار بکات چونکە فەرمانی گرتنمان پێبووە، بەڵام رێگەیان نەداوە تەنانەت فەرمانی گرتنەکە لە پرسگەکە بچێتە ژوورەوە. هەروەها بە بڵندگۆ داوا دەکرا کە خۆیان رادەست بکەن بۆ ئەوەی رێگربن لەو رووداوە نەخوازراوە کە بووە هۆی شەھیدبوونی سێ کارمەندمان. 

لەبارەی ژمارەی قوربانیانی روداوەکەوە، وتەبێژی دەزگای ئاسایش ئەوەی ئاشکراکرد: سێ شەهید هەیە و زیاتر نییە لە هێزە ئەمنییەکان، لە لالەزاریش، بەگوێرەی داتای پزیشکی داد، تەنها دوو کەس کوژراون و بە کۆی گشتی لە هەردوولا پێنج کەس.

چەند کەس لە لازار بوون لە شەوی رووداوەکە، عقید سەلام رایگەیاند: ژمارەی هێز، بە دیاریکراوی ١٥٠ بۆ ٢٠٠ کەس بەشداربوون. چونکە زانیاری هەبوو چەندین جۆری چەک لەو ناوچەیە هەبووە. ئەوەش بۆ ڕای گشتی بڵاودەکەینەوە، بە هیچ جۆرێک هێزە ئەمنییەکان درۆنی خۆکوژییان بەکارنەهێناوە و پێشیان نەبووە، بەڵام بە بەڵگە هەبووە چەندین درۆنی خۆکوژی لەنێو لالەزار هەبووە. 

لە رووداوەکەدا کێ درۆکی پێ بووە؟، وتەبێژی دەزگای ئاسایش ئەوەشی ئاشکراکرد کە، بەپێی دانپێدانانی یەکێک لەو تۆمەتبارانە، درۆنێکی خۆکوژی لەکاتی تاقیکردنەوەیدا لەنێو لالەزار کەوتبووە خوارەوە.

هێمای بۆ ئەوەشکرد: چەندین جۆری چەک و تەقەمەنی لە لالەزار دەستی بەسەرداگیراوە لەوانمە M٤، نارنجۆک، دۆشکە، BKC، چەکی نیشانەشکێن و چەکی بێدەنگ و درۆنی خۆکوژی، ئاڵتون و پارە دەستی بەسەردا نەگیراوە. بەڵام چەند جۆرێک تابلۆی جیاوازی ئۆتۆمبێل دۆزراونەتەوە. دەبێت لێکۆڵینەوە لەم بابەتە بکەین.

لە بارەی بێسەروقشوێن بووانەوە باسی لەوەکرد کە، بە فەرمی رەتی دەکەینەوە هیچ کەسێک بێ سەروشوێن نییە، لە ١٩ کەس زیاتر، هیچ بریندارێکی دیکە نییە.