سه‌رۆكی دروزه‌كان داوای جیابوونه‌وه‌ی سوه‌یدا له سوریا ده‌كات
حیكمه‌ت هیجری، ڕێبه‌ری ڕۆحی كۆمه‌ڵگه‌ی دروزه‌كان له سوریا ئه‌مڕۆ لە ڕاگەیاندراوێکدا داوای پشتیوانی نێوده‌وڵه‌تیی كرد، بۆ جیابوونه‌وه‌ی سوه‌یدا له سووریا.
حیكمه‌ت هیجری، ڕێبه‌ری ڕۆحی كۆمه‌ڵگه‌ی دروزه‌كان له سوریا له تۆمارێكی ڤیدیۆیدا بڵاوی كرده‌وه، "داوا له جیهان و گه‌لانی ئازاد ده‌كه‌ین له‌گه‌ڵ كۆمه‌ڵگه‌ی دروزه‌كان بوه‌ستن و هه‌رێمێكی جیا ڕابگه‌یه‌نن بۆ پاراستنی ئێمه لە سووریا جیا بکرێینەوە".
ڕاشیگه‌یاندووه، "گه‌شته‌كه‌مان به ناونیشانێكی نوێ ده‌ستیپێكردووەتەوە، دوای ئه‌و بارودۆخ و ئەزموونەی ئه‌م دواییه، كه مه‌به‌ست لێی قڕكردنی كۆمه‌ڵگه‌ی دروز بوو".
حیكمه‌ت هیجری سوپاسی ئه‌و وڵاتانه‌ی كرد، كه له پاڵ ئەوان وه‌ستابوون بۆ پاراستنی كۆمه‌ڵگه‌ی دروزه‌كان، دیارترینیان ئه‌مریكا و ئیسرائیل بوون.
به‌گوێره‌ی دوایین ئامار، كه له‌لایه‌ن ڕوانگه‌ی سووری بۆ مافه‌كانی مرۆڤه‌وه تۆماركراوه، لە توندوتیژییه‌كان زیاتر له هه‌زار و 600 كه‌س گیانیان له‌ده‌ستداوه.
|