پۆلیسی هەرێم: سزای مامەڵەکردن بە 'جی پی ئێس' 10 ساڵ زیندانیکردنە

وتەبێژی پۆلیسی هەرێمی کوردستان ڕایدەگەیەنێت، مامەڵەکردن بە ئامێری 'جی پی ئێس' بە هەموو شێوەیەک قەدەغەیە.

وتەبێژی پۆلیسی هەرێمی کوردستان ڕایگەیاند "بە گوێرەی ماددەکانی 25 و 26ـی یاسای سزادانی عێراقی تایبەت بە بەشی پەیوەندی و زانیارییەکان، هەر کەسێک کڕین و فرۆشتن 'بە جی پی ئێس' بکات بۆ ماوەی 10 ساڵ زیندانی دەکرێت."

ئاماژەی بەوەشداوە کە 'جی پی ئێس' وەک ئامێرێکی چاودێری ناسێنراوە، بۆیە هاوردەکردن، کڕین و فرۆشتنی دەبێت لەژێر چاودێری و ڕێنماییەکانی وەزارەتی گواستنەوە و گەیاندن بێت، لەبەرئەمەش مامەڵەکردنی بە ئۆنلاین قەدەغەیە.

ئەوەشی خستەڕوو، هەرچەندە ئەمە لە هەرێمی کوردستان نەبووەتە دیاردە، بەڵام هەر کەسێک سکاڵای هەبێت بەدواداچوونی ورد بۆ کەیسەکەی دەکەن.