ئەوکاتەی شوانێک نهێنییەکی سەربازیی گەورە ئاشکرا دەکات

بنکەیەکی سەربازیی نهێنیی ئیسرائیل لە عێراقدا هەیە

ئەمەش بەپێی ڕاپۆرتە نوێیەکان، بنکە سەربازییە نهێنییەکە لە بیابانەکانی عێراقدا دامەزرێنراوە. ئامانجی سەرەکیی ئەم بنکەیە، پاڵپشتیکردنی هێرشە ئاسمانییەکانی ئیسرائیل و جەنگی ئەو وڵاتەیە دژی ئێران.

هەماهەنگی لەگەڵ ئەمریکا

ئەم بنکەیە بێ هۆ دروست نەکراوە، بەڵکو ماوەیەک پێش دەستپێکردنی جەنگ و بە ئاگاداریی و زانیاریی تەواوی ویلایەتە یەکگرتووەکانی ئەمریکا دامەزرێنراوە.

بنکەکە

ئەم پێگە نهێنییە هێزی تایبەت و ناوەندێکی لۆجیستی بۆ پاڵپشتیی هێزی ئاسمانیی ئیسرائیلی تێدایە، جگە لە هەبوونی تیمەکانی گەڕان و ڕزگارکردن کە ئەرکیان دەستوەردانە لە ئەگەری کەوتنەخوارەوەی هەر فڕۆکەوانێکی ئیسرائیلیدا.

شوانێک نهێنییەکەی ئاشکرا کرد

لە مانگی ئازاری ڕابردوودا، بنکەکەبەڕێکەوت ئاشکرا بوو؛ کاتێک شوانێکی عێراقی هەواڵی دەربارەی چالاکییەکی سەربازیی نائاسایی و جووڵەی گوماناویی کۆپتەرەکان لە ناوچەکەدا بڵاوکردەوە.

هێرشی ئاسمانی بۆ ڕێگری لە ئاشکرابوون

کاتێک حکومەتی عێراق هێزە ئەمنییەکانی بۆ لێکۆڵینەوە لە زانیارییەکانی شوانەکە نارد، هێزە ئیسرائیلییەکان دەستبەجێ هێرشی ئاسمانییان ئەنجامدا بۆ دوورخستنەوەی هێزە عێراقییەکان و ڕێگریکردن لە ئاشکرابوونی پێگە نهێنییەکە.

هەڵوێستی عێراق لە نەتەوە یەکگرتووەکان

لە دوای ئەم ڕووداوانە، عێراق سکاڵایەکی فەرمی پێشکەشی نەتەوە یەکگرتووەکان کرد و تێیدا ئەمریکای بە بەرپرسیار لە هێرشە ئاسمانییەکان و بوونی هێزی بیانی لە وڵاتەکەیدا تۆمەتبار کرد، بەڵام سەرچاوە ئاگادارەکان تێوەگلانی واشنتۆنیان لە ئەنجامدانی ئەو هێرشانە ڕەتکردەوە.

سەرچاوە: پەنجەرە