عێراق دەروازەیەكی سنوری لەگەڵ ئێراندا بۆ ماوەی 10 ڕۆژ دادەخات
دەروازەی سنوری شەلامجە لەگەڵ ئێراندا لە باشووری عێراق
فۆتۆ:
حكومەتی عێراق بڕیاریدا بە داخستنی دەروازەی شەلامجەی سنوری وڵاتەكەی لەگەڵ ئێران بۆ ماوەی 10 رٍۆژ .
ئاژانسی هەواڵی ئێران لە زاری سەید عەلی موسەوی یاریدەدەری سەرۆكی ناوچەی ئەروەندی ئابوری لە پارێزگای خوزستان بڵاویكردەوە، لە یەكەم ڕۆژی جەژنەوە تا 10 ڕۆژ هەموو هاتوچۆ و جوڵەیەكی بازرگانی لەدەروازەی شەلامجەی سنوری رادەگیرێت .
موسەوی ئاماژەی بەوەشكرد، بەگوێرەی ئەو ئاگاداركردنەوەیەی كە لایەنی عێراقی پێی گەیاندوون، دەروازەكە لە ئێوارەی رٍۆژی پێنجشەممەی داهاتوەوە دادەخرێت و هەموو جموجوڵێكی بازرگانی تیا ڕادەگیرێت .
داواشی لە بازرگان و سەرمایەدارەكان كرد، ئەوانەی دەروازەی شەلامجە بەكاردەهێنن، رووبكەنە دەروازە سنورییەكانی دیكە، بۆ ئەوەی زیانیان پێ نەگات .
دەروازەی شەلامجەی سنوری دەكەوێتە دوور 15 كیلۆمەتری شاری خوڕەمشەهیری سەر بە پارێزگای خوزستان و لە بەشی عێراقیشەوە دەكەوێتە باشوری پارێزگای بەسرەوە، كە ماوەی چوار ڕۆژە بە فەرمانی كازمی هێزێكی ئەمنی تایبەت سەرپەرشی دەكات .
|