ناکۆکیێن ناڤبەرا ئێزدیان ژ میری بۆ بابەشێخی

15/11/2020
فۆتۆ: 

د کێمتر ژ دوو سالان دا ئێزیدیان دوو کەسایەتیێن گرنگ ژ دەستدان، میر تەحسین بەگ میرێ ئێزیدیان و شێخ خرتۆ حاجی ئیسماعیل بابە شێخێ ئێزیدیان کو پێگەھا بلند دناڤ ئۆلا ئێزیدیان ھەیە.

ھەرو وەک چاوا چەند مەھان بەریا نھا د ھەلبژارتنێن میرێ نوو ئاریشە و دابەشبوون دناڤبەرا کۆمەلگەھا ئێزیدی دا چێبوو، ئیرۆ ژی ب ھەمان ئاواوە ھەلبژارتنا بابە شێخێ نوێ، بێ ئاریشە و گرفت دەرباز نەبوو و جارەکە دن ئێزیدی ب سەر دوو بەرەیان دا دابەشبوون، بەرەیا زرای و بەرەیا نەرازی.

پشتی ٤٥ رۆژان ژ کۆچا داوی یا خرتۆ حاجی ئیسماعیل بابە شێخ و بابێ رووحی یێ ئێزیدیان، رۆژا شەمیێ ل ھۆلا کۆنفرانسا یا زانینگەھا دھۆکێ، د جڤینا میر و ئەنجومەنا بلندا رووحانی یا ئێزیدیان، بابە شێخێ نوو ھات ھەلبژارتن کو سێ کەسان خوە بەربژار کربوون، کو بریتی بوون ژ شێخ عەزام و عەلی شێخ ئیلیاس کوڕێ بابە شێخی بەرێ و شێخ فەرھاد خرتۆ کوڕێ بابە شێخێ بەرێ.

د ئەنجامێ دا میر و ئەنجومەنا بلندا رووحانی یا ئێزیدیان د جڤینا دھۆکێ دا، عەلی شێخ ئیلیا  وەک بابە شێخێ نوو یێ ئێزیدیان ھەلبژارتن،  میر حازم تەحسین بەگ میرێ ئێزیدیان پشترە د پرۆسکەکێ دا راگەھاند راستە تەڤایا ئێزیدیان ب ڤێ بریارێ نە رازینە، لێ ئیرۆ ئەز میرم و ھەموو بریارا ئێزیدیان د دەستێ من دایە

پۆستێ بابە شێخ کو لێڤەگەرێ بلندێ ئۆلا ئێزیدایە ل کوردستانێ و جیھانێ، د ھەیام چەندین سالێن دەربازبووی دا جۆرەک ژ رێکەفتنێ دناڤبەرا دوو مالباتێن ئێزیدیان دا ھاتیە دابەشکرن، واتە ھەر جارەکێ پۆستەک ل جەم مالباتەکێ دبە. ئەو ژی مالباتا شێخ خرتۆ و شێخ ئیلیاسە.

د ھەیاما ٢٥ سالێن دەبازبووی دا پۆستێ بابە شێخ ل جەم مالباتا یەکەم بوو و شێخ خرتۆ حاجی ئیسماعیل برێڤەبە بریە، میر و ئەنجومەنا بلندا رووحانی یا ئێزیدیان دبێژە ل سەر بنەمایا وێ رێکەفتنێ و بۆ چەسپاندنا دادپەروەریێ بریار دانە کەسەک ل بنەمالەیا شێخ ئیلیاس بۆ بابە شێخ ھەلبژێرن.

ئەو ئێزیدیێن ژ پرۆسکێ نەرازینە دبێژن ل جم وان جوداھی نینە عەلی یان فەرھاد ببە بابە شێخ، لێ پێدڤی بوو کەسایەتیێن ئێزیدی یێن شنگالێ و ناڤچەیێن دن ھاتبانە ڤەخواندن و کەسەک ژ ئالیێ ئێزیدیان ڤە ب تەوافوق ھاتبانە ھەلبژارتن نەک تەنێ ب بریارا میر بابە شێخ بێ ھەلبژارتن، لێ دڤیت ئێزیدی ھەموو ل سەرێ کۆک بن.

ئیزیدیێن کو ژ ھەلبژارتنا بابە شێخ یێ نووێ نەرازینە، ناڤەشێرن کو دەستوەردانا سیاسی د پرۆسەیێ دا ھاتیە کرن و پارتیا دیمۆکراتا کوردستانێ ب وێ یەکێ تۆھمەتبار دکەن.

پشتی ھاتنا داعشێ و ئاوارەبوونا ئێزیدیان، ئاریشە و ناکۆکی دناڤبەرا ئێزیدیان دا کوورتر بوون ب تایبەتی ل سەر برێڤەبرنا کاروبارێ ئیزیدیان، نھا یێن ل شنگالێ مانە ب نێزیکی ژ پەکەکە تێن دانین و یێن ئاوارەیێن دھۆکێ و ناڤچەیێن ژێر دەستێ پارتی بوونە نێرینا وان ب تەمامی جودایە و دان ب ھەڤدوو نادن.

سەرباری نەرەزایەتیان بریارە رۆژا چار شەمبیا داھاتی د رێورەسمەکێ دا ل پەرستگەھا لالشێ، شێخ عەلی ئیلیاس وەک بابە شێخێ نوو یێ ئێزیدیان دەست بەکار ببە.

شێخ عەلی ل ساڵا ١٩٧٩ ل شێخان ژ دایک بوویە و بابێ وی ژی بۆ ھەیاما ١٨ سالان ژ ١٩٧٨ ھەیا ١٩٩٥ بابە شێخێ ئێزیدیان بوو