تورکیا.. دادگا سزای ٢٧ ساڵ زیندانیکردنی بۆ ڕۆژنامەنووسێک دەرکرد
دادگای تورکیا ئەمڕۆ چوارشەممە سزای ٢٧ ساڵ زیندانیکردنی سەپاند بەسەر ڕۆژنامەنووسی ناسراوی تورک (جان دۆندار) کە لە وڵاتی ئەڵمانیا دادەنیشێت، بە تۆمەتی هاوکاریکردنی ڕێکخراوێکی تیرۆریستی و سیخوڕێکردن.
دۆندار کە پێشتر سەرنوسەری ڕۆژنامەی (جموهریەت)ی ئۆپۆزسیۆن بووە و لە لایەن دادگای ئیستنەبوڵەوە تاوانبار کرا، لەسەر بڵاوکردنەوەی لێکۆڵینەوەیەک، کە ئاماژە دەکات بەوەی دەزگای هەواڵگری تورکیا چەک و کەلوپەلی سەربازیی ڕادەستی گروپە ئیسلامییەکان کردووە لە سوریا.
لەناوەرۆکی حوکمەکەدا ئاماژە کراوە بەوەی دادگا سزای ١٨ ساڵ و شەش مانگی سەپاندووە بەسەر دۆنداردا، بە تاوانی بڵاوکردنەوەی زانیاری نهێنی و سیخوڕی، هەروەها بە سزایەکی دیکەی زیندانی بە ٨ ساڵ و ٩ مانگ بە تۆمەتی هاوکاریکردنی ڕێکخراوێکی تیرۆریستی، بە تایبەت تۆڕی فەتحوڵا گویلەن سەرۆکی بزوتنەوەی خزمەت.
لە ساڵی ٢٠١٦شدا دادگا سزایەکی دیکەی ٥ ساڵ و ١٠ مانگ زیندانیکردنی سەپاند بەسەر دۆنداردا، بە تۆمەتی بڵاوکردنەوە و ئاشکراکردنی نهێنی دەوڵەت لە دۆسیەیەکدا کە بووە مایەی توڕەکردنی رەجەب تەیب ئەردۆغان سەرۆک کۆماری تورکیا.
بەڵام دادگای باڵا لە ساڵی ٢٠١٨دا ئەو حوکمەی هەڵوەشاندەوە و فەرمانیکرد بە دادگا بە دووبارە دادگاییکردنەوەی دۆندار بە تۆمەتی سیخوڕیکردن بۆ ئەوەی سزاکەی توندتر بکرێتەوە.
دوای تاوانبارکردنەکەی لە ساڵی ٢٠١٦دا دۆندار ڕوویکردە ئەڵمانیا و داوای مافی پەنابەرێتی کرد لەو وڵاتە.
|