وردەکارى بردنى ئەرشیفى تەلەفزیۆنى کوردی کەرکوک بۆ بەغدا

پێشکەشکارێکی کەناڵی دێرینی کوردی کەرکوک ڕایگەیاند لە چەند رۆژی ڕابردوودا ئەرشیفی کەناڵەکە بردراوە بۆ بەغدا.

هاشم جەباری بێژەری کوردی کەناڵەکە بە تۆڕی هەواڵی ژیانی ڕاگەیاند ئەو 25 ساڵ بێژەر و بەرپرسی بەشی تەنسیق بووە و هەموو کاسێتەکان خۆی رێکیخستوون.

دەشڵێت بۆ پاراستنی ئەو ئەرشیفە سەردانی دەیان بەرپرسی کوردی کردوە و کەمپینی بۆ ڕاگەیەندراوە،بەڵام بەداخەوە دواجار ئەرشیفەکە بردرا بۆ بەغدا و نەتواندرا بپارێزرێت.

هاشم جەباری ئاماژەی بەوەشکرد ئەو ئەرشیفە کە ئەرشیفی گرنگی کوردە لە بەغدا لە ژێر زەمینێکدا فڕیی دەدەن و بەهۆی سەرما و گەرماوە لەناو دەچێت و کەسی خەمی لێ ناخوات.

ئاشکراشیکرد لە ئەرشیفەکەدا 117 درامای کوردی هەبوون کە 14 یان رەنگاورەنگ و ئەوانەی دیکەیان رەش وسپی بوون.

هەروەها 1250 گۆرانی تێدابووە بەهەرسێ زمانی کوردی و تورکمانی و سریانی و بەرنامەی تایبەت بە منداڵان.

کەناڵی کوردی کەرکوک لە ساڵی 1967 کراوەتەوە و هەتا 1999 بەردەوامبووە، رۆژانە سێ کاتژمێر و شەوانە شەش کاتژمێر پەخشی کردوە.

هاشم جەباری چیرۆکی داخستنی کەناڵەکە بەوجۆرە دەگێڕێتەوە و دەڵێت "لە مانگی نیسانی 1999 تەها یاسین رەمەزان کە خۆی کوردبوو هاتە کەرکوک و پیانوتبوو پەخشی کەناڵی کوردی ناگاتە چەمچەماڵ، ئەویش وتبوی کەرکوک شاری عەرەبە چۆن کەناڵی کوردی هەیە،بۆیە هەر ئەو رۆژە بڕیاری داخستنی کەناڵەکە درا".