خۆشەویستی بەمەرجی خودبیرچوونەوە 11/03/2021 فۆتۆ: ‎لازۆ ئازاد هەرگیز لە خۆت پرسیوە من تا کوێ خۆشویستراوم؟ تا کوێ بەهاو بوون و دەنگم لای خێزان وکەسە نزیکەکانم جێگای بایەخ بووە؟ تا کوێ سەرکەوتن و هەوڵەکانم جێگای دڵخۆشی و شانازی بووە بۆ ئەوانەی بۆم گرنگن؟ پرسیووتە من تا کوێ وویستراوم؟ هاوڕێکانت لەبەر چی هاوڕێتی تۆیان دەوێت؟ تۆ دەزانی مەرجی ئەوانیتر لە بەرامبەر خۆشویستنتدا چییە؟ دەزانم ئەمانە پرسیاری سادە و ئاسانی رۆژانە نین. پرسیارگەلێک نین بخوازین بەدەم خواردنەوەی چاییەکی دارچینییەوە بیری لێبکەین و لە خۆمانی بکەین . قسەکردن لەسەر سۆز و خۆشەویستی بە گشتی نەک ئاسان نییە بگرە بۆ زۆر کەس کارێکی سامناکە. ئەگەر بێت و تایبەتتریشیکەینەوە بە کەسێک\ کەسانێک کە بۆمان گرنگن ئەوە هەر زۆر ترسناکترە، هەروەک ئەوەیە خۆمان بخەینە ناو بیرێکی تاریکەوە کە هەرگیز ڕێگایەکی ڕزگاربوونمان لەبەردەمدا نەبێت، یان لە ناو ژوورێکی تاریکی بێ پەنجەرە و دەرگادا بین و هیوایەک نەبێت بۆ بینینەوەی ڕووناکی . ئایا خۆشەویستی هەستێکی سەربەخۆ و ئازادە؟ ئایا لکێنراو نییە بە هیچ شتێکی ترەوە؟ بۆ نموونە ئەوەی دەیانەوێت چۆن بین؟ چۆن بیربکەینەوە؟ چ جۆرە ژیانێک بژین و چۆن ڕەفتار بکەین؟ بیروباوەڕەکانمان چۆن بن؟ ئایدۆلۆژیامان چییە؟ ئایا بارگاوی نییە بە داواکاری و جێبەجێکردنیەوە؟ مەرجێک نییە بۆ قبوڵکردنمان؟ ئایا وەک خۆت، وەک ئەوەی هەیت وویستراویت؟ ئەم نووسینە هەوڵێکی زۆر بچکۆلە و سادەیی ژنێکە بۆ کەمێک ڕامان لەسەر بابەتی خۆشەویستی لە گۆشەیەکی پەنهانەوە، تەواو پەیوەستە بە ئەزموونی تاکەکەسیی خۆمەوە. گێڕانەوەی هەموو هەستەکانی بینین، بیستن،هەستپێکردن و بەرکەوتنە لەگەڵ ئەوانیتردا . دیارە هۆشیارم بەوەی ئەم بابەتە زۆر قوڵەو دەکرێت بەچەندین فۆرمی جیاواز و لە چەندین ڕەهەندی جیاوازەوە باسی بکەین. یان گەر بمانەوێت هەوڵ بۆ ڕاڤەکردن و توێژینەوە بدەین دەتوانین پەنا بەرین بۆ ئەو تیۆرییانەی کە لە هەموو ئەو زانستانەی پەیوەیستن بە مرۆڤەناسییەوە بەرهەمهاتوون. بەڵام ئەوەی هەمیشە جێگای سەرنجی من بووە، گێڕانەوەی سادە و تێرامانی مرۆڤەکان بووە بە ڕیوایەتی خۆیان کە زۆرجار هاوکاربوون بۆ بیرۆکەی نووسین و توێژینەوە و ئەو دیباتانەش کە لە دنیای ئەکادیمیا و لێکۆڵینەوەکاندا نووسەران و توێژەران سوودیان لێوەرگرتوون . بە هێواشی یان ڕەنگە باشتر بێت بە چرپە پێت بڵێم کە شتەکان بەو جۆرە نین کە هەمیشە بینیومانن و هەستمان پێکردوون و بیرمان لێکردوونەتەوە . ڕەنگە ئەوە بۆ بەرامبەرەکەمان و زیاتریش بۆ کەسە هەر نزیکەکانمان وەک دایک، باوک، خوشک،برا و هاوڕێکانمان جێگەی سەرسوڕمان بێت گەر ڕۆژێک لە رۆژان لێیان بپرسین تۆ بۆ منت خۆشدەوێت؟ یان گەر چۆن بم تۆ منت خۆشدەوێت؟ و تا کوێ و تا کەی منت خۆشدەوێت؟ بە چ مەرجێک و لەبەرامبەر چیدا سۆز و خۆشەویستی خۆتم پێدەبەخشیت؟ ڕۆژێک کچەکەم بەدەم وێنەکێشانەوە ووتی دایکە ئەگەر منداڵێک لە وانەکانی قوتابخانەدا باش نەبوو دایک و باوکی هەر خۆشیاندەوێت؟ گەر بە دڵی ئەوان جلوبەرگی نەپۆشی و تەنانەت ڕەنگی بۆیەی نینۆکەکەشی بەدڵی ئەوان نەبوو ئایا هەر خۆشیاندەوێت؟ ئەی ئەگەر بڕیاری دا ئیتر کچ نەبێت یان گەر کوڕبێت رۆژێک ئیتر بڕیار بدات کە نایەوێت کوڕبێت ئەو کاتە چی؟ بۆچی کچێکی ١٠ ساڵان بیر لەوە بکاتەوە لە دواڕۆژدا ببێتە پزیشک لەبەر ئەوەی باوکی پزیشکە، نەک لەبەر ئەوەی خۆی دەیەوێت؟ کچەکەم پرسی گەر هیچ شتێکی بە دڵی دایک و باوکی نەبوو ئایا هەر خۆشیان دەوێت؟ با بێیینەوە سەر گەورەکان، تۆبیرت لەوە کردۆتەوە کە براکەت لەبەر چی تۆی خۆشدەوێت؟ لەبەر ئەوەیە کە براتە و بێگومان براش خوشکی خۆی خۆشدەوێت یان دەکرێت لەبەر ئەوە بێت تۆ کچێکی ئاقڵ و گوێڕایەڵیت وگۆرەوییەکانی بۆ دەشۆیت؟ ئەی پوورت بۆچی لە هەموو میوانداری و کۆبوونەوە خێزانیەکاندا ستایشت دەکات؟ دەکرێت لەبەر ئەوە بێت تۆ کچێکی شەرمن و بێدەنگیت؟ چونکە ئەو پێی وایە بەتەنیا کچی بێدەنگ و شەرمن کچی چاکە و هەر بۆیە خۆشەویستیشە. دوور نییە لە ئێستاشەوە پرۆژەیەکی دابەستە بیت بۆ کوڕەکەی؟ یان باوکە ئازیزەکەت؟ گەر قژە درێژەکەت کورت بکەیتەوە و تەنانەت بخوازیت وەک ستیالێکی نوێش لایەکی بە تەواوەتی تەنک بکەیت هێشتا بە کچی خۆیت دەزانێت؟ هەموو ئەو پرسیارانەی دوودڵی لەسەر هەست و سۆزی مرۆڤ درووست دەکەن بەرهەمی بیرکردنەوە و ژانن، پرسیارگەلێکن هەندێجار تا ڕادەی شوناس وونکردن و کاڵبوونەوەمان دەمانبەن. پرسیارگەلێکن لەبەرامبەر هەموو ئەو (نا) و (نابێت) و (قبوڵنەکراوە) و (کەس شتی واناکەت) و (ئێمە بۆ خۆتمانە)و (لەوەتەی هەبووین هەروابووە و هەرواش دەبێت) و (تۆ بۆ قەت بە دڵی ئێمە ناکەیت) و (ئێمە ئەگەر دڵسۆزت نەبین واناڵێین) و (ئەگەر خۆشمان نەوێیت بێگومان دڵت ناشکێینین) ئاسان وەڵام نادرێنەوە . لە دنیای تۆدا خۆشەویستی ئازاد و سەربەخۆییە یان لکێنرا و بارگاوییە بە مەرج و داواکاریی ؟ من ئێستا سی و شەش ساڵم، دەتوانم بڵێم تا ئێستا زۆرجار کەوتوومەتە بەردەم پرسیاردانان لەسەر هەست و خۆشەویستی کەسە نزیکەکانم. گومان و دوودڵییەکانشم لەم ڕووەوە زۆربەی جارەکان لەو کاتانەدا بوون کە من بە پێوەر ، یاساو ڕێساو، دابوونەریت و وویستە تاکەکەسیەکان و داواکاریی خێزان و زۆرجاریش کۆمەڵایەتییەکانیانەوە نەجوڵاومەتەوە . ئەو کاتانە بووە کە ئاوڕدەدەیتەوە و ئیتر بە کچە ئاقڵ و گوێڕایەڵەکە ناناسرێیت، ئاوڕدەدەیتەوە و تەنیا لەبەر ئەوەی داوای مافە زۆر سەرەتاییەکانی خۆتت کردووە ئیتر کچە سەلار و سەنگینەکە نیت کە پورت بیەوێت پرۆژەیەک بیت بۆ کوڕەکەی (کە مافی خۆتە پرۆژە نەبیت بۆ هیچ کەسێک جگە لە خۆت)، ئاوڕدەدەیتەوە و هەر لەبەر ئەوەی هاوژیانی خۆت بە وویست و دڵی خۆت هەڵبژاردووە ئیتر حاشالێکرا و نەویستراویت، ڕەنگە پرۆژەیەکی خێزانەکەشت بیت بۆ تۆڵەسەندنەوە و کوشتن ! کەی یەکەم جار لە ئەنجامی گرژییەک،ڕووبەڕووبوونەوەیەک یان هەر ئەوەی ڕاوبۆچوونێکی سەربەخۆی خۆت هەبووە باجی کەمبوونەوەی خۆشەویستی ئەوانیترت داوە؟ یان گەر بۆ ماوەیەکی دیاریکراویش بووبێ لێێ بێبەری کراویت؟ چەند جار لەسەر ئەوەی بە دڵی ئەوانی تر خۆت نەگۆڕیوە چوونە دەرەوەکەت هەڵوەشێنراوەتەوە، نەک تەنیا ئەوە تەنانەت بە زارەکی و بە جەستەیش توندوتیژیت بەرامبەرکراوە؟ خوێندنەکەت بە دڵی ئەوانیتر هەڵنەبژاردووە و شکێنراویت و بەشکستخواردوو سەیرکراویت؟ بە دڵی ئەوان هاوژیانییت لەگەڵ کەسێکیتر نەکردووە و بە بێڕەوشتیان نەزانیویت؟ چەند جار بە ناوی ئەو هەموو خۆشەویستییە مەرجدارەیانەوە تۆ وویست و ئارەزوو و هیوا و خەونەکانی خۆت ناشتووە؟ چەند جار بێدەسەڵاتی و زەلیلی و بێزمانی خۆتت هەست پێکردووە؟ چەندجار لە بێ بەهاکردن و بێدەنگکردن و نەبینینتا خۆتت لەبەرچاو تاریک بووە؟ چەندجار پرسیارت لەسەر ڕەوشت و وویست و داواکارییەکانی خۆت داناوە و ڕێگایی خۆت و ژنبوونت وونکردووە؟ من ئێستا سی و شەش ساڵم و هێشتاش دڵنیانیم خۆشەویستی هەستێکی نەلکێنراو و بێبەرامبەر و سەربەخۆیە یان هەستێکە وەک پاداشتە و بەمەرجی خودبیرچوونەو و ئاوێتەبوون لە وویست و داواکارییەکانی ئەواندا پێتدەبەخشرێت!

خۆشەویستی بەمەرجی خودبیرچوونەوە

11/03/2021

فۆتۆ:

‎لازۆ ئازاد

هەرگیز لە خۆت پرسیوە من تا کوێ خۆشویستراوم؟

تا کوێ بەهاو بوون و دەنگم لای خێزان وکەسە نزیکەکانم جێگای بایەخ بووە؟ تا کوێ سەرکەوتن و هەوڵەکانم جێگای دڵخۆشی و شانازی بووە بۆ ئەوانەی بۆم گرنگن؟

پرسیووتە من تا کوێ وویستراوم؟ هاوڕێکانت لەبەر چی هاوڕێتی تۆیان دەوێت؟

تۆ دەزانی مەرجی ئەوانیتر لە بەرامبەر خۆشویستنتدا چییە؟

دەزانم ئەمانە پرسیاری سادە و ئاسانی رۆژانە نین. پرسیارگەلێک نین بخوازین بەدەم خواردنەوەی چاییەکی دارچینییەوە بیری لێبکەین و لە خۆمانی بکەین .

قسەکردن لەسەر سۆز و خۆشەویستی بە گشتی نەک ئاسان نییە بگرە بۆ زۆر کەس کارێکی سامناکە. ئەگەر بێت و تایبەتتریشیکەینەوە بە کەسێک\ کەسانێک کە بۆمان گرنگن ئەوە هەر زۆر ترسناکترە، هەروەک ئەوەیە خۆمان بخەینە ناو بیرێکی تاریکەوە کە هەرگیز ڕێگایەکی ڕزگاربوونمان لەبەردەمدا نەبێت، یان لە ناو ژوورێکی تاریکی بێ پەنجەرە و دەرگادا بین و هیوایەک نەبێت بۆ بینینەوەی ڕووناکی .

ئایا خۆشەویستی هەستێکی سەربەخۆ و ئازادە؟ ئایا لکێنراو نییە بە هیچ شتێکی ترەوە؟ بۆ نموونە ئەوەی دەیانەوێت چۆن بین؟ چۆن بیربکەینەوە؟ چ جۆرە ژیانێک بژین و چۆن ڕەفتار بکەین؟ بیروباوەڕەکانمان چۆن بن؟ ئایدۆلۆژیامان چییە؟

ئایا بارگاوی نییە بە داواکاری و جێبەجێکردنیەوە؟

مەرجێک نییە بۆ قبوڵکردنمان؟

ئایا وەک خۆت، وەک ئەوەی هەیت وویستراویت؟

ئەم نووسینە هەوڵێکی زۆر بچکۆلە و سادەیی ژنێکە بۆ کەمێک ڕامان لەسەر بابەتی خۆشەویستی لە گۆشەیەکی پەنهانەوە، تەواو پەیوەستە بە ئەزموونی تاکەکەسیی خۆمەوە. گێڕانەوەی هەموو هەستەکانی بینین، بیستن،هەستپێکردن و بەرکەوتنە لەگەڵ ئەوانیتردا .

دیارە هۆشیارم بەوەی ئەم بابەتە زۆر قوڵەو دەکرێت بەچەندین فۆرمی جیاواز و لە چەندین ڕەهەندی جیاوازەوە باسی بکەین. یان گەر بمانەوێت هەوڵ بۆ ڕاڤەکردن و توێژینەوە بدەین دەتوانین پەنا بەرین بۆ ئەو تیۆرییانەی کە لە هەموو ئەو زانستانەی پەیوەیستن بە مرۆڤەناسییەوە بەرهەمهاتوون. بەڵام ئەوەی هەمیشە جێگای سەرنجی من بووە، گێڕانەوەی سادە و تێرامانی مرۆڤەکان بووە بە ڕیوایەتی خۆیان کە زۆرجار هاوکاربوون بۆ بیرۆکەی نووسین و توێژینەوە و ئەو دیباتانەش کە لە دنیای ئەکادیمیا و لێکۆڵینەوەکاندا نووسەران و توێژەران سوودیان لێوەرگرتوون .

بە هێواشی یان ڕەنگە باشتر بێت بە چرپە پێت بڵێم کە شتەکان بەو جۆرە نین کە هەمیشە بینیومانن و هەستمان پێکردوون و بیرمان لێکردوونەتەوە .

ڕەنگە ئەوە بۆ بەرامبەرەکەمان و زیاتریش بۆ کەسە هەر نزیکەکانمان وەک دایک، باوک، خوشک،برا و هاوڕێکانمان جێگەی سەرسوڕمان بێت گەر ڕۆژێک لە رۆژان لێیان بپرسین تۆ بۆ منت خۆشدەوێت؟ یان گەر چۆن بم تۆ منت خۆشدەوێت؟ و تا کوێ و تا کەی منت خۆشدەوێت؟ بە چ مەرجێک و لەبەرامبەر چیدا سۆز و خۆشەویستی خۆتم پێدەبەخشیت؟

ڕۆژێک کچەکەم بەدەم وێنەکێشانەوە ووتی دایکە ئەگەر منداڵێک لە وانەکانی قوتابخانەدا باش نەبوو دایک و باوکی هەر خۆشیاندەوێت؟ گەر بە دڵی ئەوان جلوبەرگی نەپۆشی و تەنانەت ڕەنگی بۆیەی نینۆکەکەشی بەدڵی ئەوان نەبوو ئایا هەر خۆشیاندەوێت؟ ئەی ئەگەر بڕیاری دا ئیتر کچ نەبێت یان گەر کوڕبێت رۆژێک ئیتر بڕیار بدات کە نایەوێت کوڕبێت ئەو کاتە چی؟

بۆچی کچێکی ١٠ ساڵان بیر لەوە بکاتەوە لە دواڕۆژدا ببێتە پزیشک لەبەر ئەوەی باوکی پزیشکە، نەک لەبەر ئەوەی خۆی دەیەوێت؟ کچەکەم پرسی گەر هیچ شتێکی بە دڵی دایک و باوکی نەبوو ئایا هەر خۆشیان دەوێت؟

با بێیینەوە سەر گەورەکان، تۆبیرت لەوە کردۆتەوە کە براکەت لەبەر چی تۆی خۆشدەوێت؟ لەبەر ئەوەیە کە براتە و بێگومان براش خوشکی خۆی خۆشدەوێت یان دەکرێت لەبەر ئەوە بێت تۆ کچێکی ئاقڵ و گوێڕایەڵیت وگۆرەوییەکانی بۆ دەشۆیت؟ ئەی پوورت بۆچی لە هەموو میوانداری و کۆبوونەوە خێزانیەکاندا ستایشت دەکات؟ دەکرێت لەبەر ئەوە بێت تۆ کچێکی شەرمن و بێدەنگیت؟ چونکە ئەو پێی وایە بەتەنیا کچی بێدەنگ و شەرمن کچی چاکە و هەر بۆیە خۆشەویستیشە. دوور نییە لە ئێستاشەوە پرۆژەیەکی دابەستە بیت بۆ کوڕەکەی؟

یان باوکە ئازیزەکەت؟ گەر قژە درێژەکەت کورت بکەیتەوە و تەنانەت بخوازیت وەک ستیالێکی نوێش لایەکی بە تەواوەتی تەنک بکەیت هێشتا بە کچی خۆیت دەزانێت؟

هەموو ئەو پرسیارانەی دوودڵی لەسەر هەست و سۆزی مرۆڤ درووست دەکەن بەرهەمی بیرکردنەوە و ژانن، پرسیارگەلێکن هەندێجار تا ڕادەی شوناس وونکردن و کاڵبوونەوەمان دەمانبەن. پرسیارگەلێکن لەبەرامبەر هەموو ئەو (نا) و (نابێت) و (قبوڵنەکراوە) و (کەس شتی واناکەت) و (ئێمە بۆ خۆتمانە)و (لەوەتەی هەبووین هەروابووە و هەرواش دەبێت) و (تۆ بۆ قەت بە دڵی ئێمە ناکەیت) و (ئێمە ئەگەر دڵسۆزت نەبین واناڵێین) و (ئەگەر خۆشمان نەوێیت بێگومان دڵت ناشکێینین) ئاسان وەڵام نادرێنەوە .

لە دنیای تۆدا خۆشەویستی ئازاد و سەربەخۆییە یان لکێنرا و بارگاوییە بە مەرج و داواکاریی ؟

من ئێستا سی و شەش ساڵم، دەتوانم بڵێم تا ئێستا زۆرجار کەوتوومەتە بەردەم پرسیاردانان لەسەر هەست و خۆشەویستی کەسە نزیکەکانم. گومان و دوودڵییەکانشم لەم ڕووەوە زۆربەی جارەکان لەو کاتانەدا بوون کە من بە پێوەر ، یاساو ڕێساو، دابوونەریت و وویستە تاکەکەسیەکان و داواکاریی خێزان و زۆرجاریش کۆمەڵایەتییەکانیانەوە نەجوڵاومەتەوە .

ئەو کاتانە بووە کە ئاوڕدەدەیتەوە و ئیتر بە کچە ئاقڵ و گوێڕایەڵەکە ناناسرێیت، ئاوڕدەدەیتەوە و تەنیا لەبەر ئەوەی داوای مافە زۆر سەرەتاییەکانی خۆتت کردووە ئیتر کچە سەلار و سەنگینەکە نیت کە پورت بیەوێت پرۆژەیەک بیت بۆ کوڕەکەی (کە مافی خۆتە پرۆژە نەبیت بۆ هیچ کەسێک جگە لە خۆت)، ئاوڕدەدەیتەوە و هەر لەبەر ئەوەی هاوژیانی خۆت بە وویست و دڵی خۆت هەڵبژاردووە ئیتر حاشالێکرا و نەویستراویت، ڕەنگە پرۆژەیەکی خێزانەکەشت بیت بۆ تۆڵەسەندنەوە و کوشتن !

کەی یەکەم جار لە ئەنجامی گرژییەک،ڕووبەڕووبوونەوەیەک یان هەر ئەوەی ڕاوبۆچوونێکی سەربەخۆی خۆت هەبووە باجی کەمبوونەوەی خۆشەویستی ئەوانیترت داوە؟ یان گەر بۆ ماوەیەکی دیاریکراویش بووبێ لێێ بێبەری کراویت؟

چەند جار لەسەر ئەوەی بە دڵی ئەوانی تر خۆت نەگۆڕیوە چوونە دەرەوەکەت هەڵوەشێنراوەتەوە، نەک تەنیا ئەوە تەنانەت بە زارەکی و بە جەستەیش توندوتیژیت بەرامبەرکراوە؟ خوێندنەکەت بە دڵی ئەوانیتر هەڵنەبژاردووە و شکێنراویت و بەشکستخواردوو سەیرکراویت؟ بە دڵی ئەوان هاوژیانییت لەگەڵ کەسێکیتر نەکردووە و بە بێڕەوشتیان نەزانیویت؟ چەند جار بە ناوی ئەو هەموو خۆشەویستییە مەرجدارەیانەوە تۆ وویست و ئارەزوو و هیوا و خەونەکانی خۆت ناشتووە؟ چەند جار بێدەسەڵاتی و زەلیلی و بێزمانی خۆتت هەست پێکردووە؟ چەندجار لە بێ بەهاکردن و بێدەنگکردن و نەبینینتا خۆتت لەبەرچاو تاریک بووە؟

چەندجار پرسیارت لەسەر ڕەوشت و وویست و داواکارییەکانی خۆت داناوە و ڕێگایی خۆت و ژنبوونت وونکردووە؟

من ئێستا سی و شەش ساڵم و هێشتاش دڵنیانیم خۆشەویستی هەستێکی نەلکێنراو و بێبەرامبەر و سەربەخۆیە یان هەستێکە وەک پاداشتە و بەمەرجی خودبیرچوونەو و ئاوێتەبوون لە وویست و داواکارییەکانی ئەواندا پێتدەبەخشرێت!