ژمارەیەك كۆچبەر لەدەریای ئیجە رزگاركران


ئاژانسی ئانادۆڵ لەبارەی ئەو كۆچبەرە رزگاركراوانەوە بڵاوی كردۆتەوە، بەپێی ئەو زانیارییانەی وەرگیراون بەرەبەیانی ئەمڕۆ زانیاری لەسەر گیرخواردنی گرووپێكی 40 كەسی لە كۆچبەرانی نایاسایی لەسەر دورگەیەك دراوە و داوای بەدەمەوە چوونیان كراوە.

ئاژانسەكە ئەوەشی خستۆتەڕوو، دوای لێكۆڵینەوە لە بابەتەكە دوو هەلیكۆپتەر و بەلەمێكی هێزەكانی ئاسایشی كەناراوەكانی توركیا كەیشتنە دوورگەی یومورتا لەنێو دەریای ئیجە و دەستیان بە هەوڵەكانیان كرد بۆ رزگاركردنی كۆچبەرەكان.

هەروەها ئەوەش ئاشكرا كراوە، ئەو هێزە توانیویانە لەهەڵمەتەكەدا 44 كۆچبەر رزگاربكەن كە ژن و منداڵیشیان تێدابووە و دواتر گەیاندرانە بەندەری ئایڤاڵك.

هەربەپێی ئەو زانیارییانە لەئێستادا هەوڵەكانی گەڕان و رزگاركردن لەناوچەكەدا كۆتایی پێهێنراوە.