هەڵسوڕاوێكی گۆڕان بۆ ژیان: دەبوو سەركردەكانی گۆڕان لەگەڵ ئاشكرابونی ئەنجامەكانی هەڵبژاردن دەستیان لەكار بكێشایەتەوە


ئاریان تاوەگۆزی، هەڵسوڕاوی دیاری بزوتنەوەی گۆڕان لەئەوروپا، لەبارەی ئەو پڕۆژانەی لە ماوەی رابردوودا دراوەتە بزوتنەوەكەیان بە (تۆڕی هەواڵی ژیان)¬ی وت "سەبارەت بە كێشە ناوخۆییەكانی بزوتنەوەی گۆڕان بۆچونی جیاواز هەیە، بەڵام هەر كاتێك بزوتنەوەكە گەشتە ئەو قەناعەتەی ئەو ئەنجامەی لە هەڵبژاردنەكانی ئەم دواییە بەدەستی هێنا كارەساتێك بوو نەك تەنها شكست ئەوە یەكەم هەنگاوە بۆ چارەسەری كێشەكان پاشان بەخۆداچونەوەیەكی رەخنەگرانەی پێویستە، وابزانم لەهەڵسوڕاوان و دۆستان و خەمخۆرانی گۆڕانكاری لە كوردستانەوە پێشنیار و نیمچە پرۆژەی زۆر خراوەتە ڕوو كە گۆڕان پێویستە بە مێشكێكی كراوە و دوور لەهەموو توندییەك و دەمارگیرییەك وەریانگرێت و بیانقۆزێتەوە و سوپاس و پێزانینی بۆ ئەو كەسانەش هەبێت".

ئاماژەی بەوەشكرد دەبێت بزوتنەوەی گۆڕانكاری بنچینەیی لەشێوازی كار و تێگەشتنی بۆ بارودۆخەكە بكات چونكە هەڵەكان كەم نین بەڵام زۆرترین دڵسۆز بۆ گۆڕانكاری دەوری ئەو بزوتنەوەی داوە و پێویستە باوەشیان بۆ بكاتەوە نەك تەرك و دورە پەرێزیان بخات. 

تاوەگۆزی ئەوەش روندەكاتەوە دەستی لەپۆستەكەی لەبزوتنەوەی گۆڕان كشاندۆتەوە بەڵام دەستبەرداری گۆڕان نەبووە‌و وتی "دەست لەكار كێشانەوەی من تەنها لە پۆستەكەم بوو نەك لە بزوتنەوەی گۆڕان، ویستم ئەوەی كە بە قەول (قسە) دەیكەم بە فیعل (كردار) یش ئەنجامی بدرێت و دەبێت دەست لەكار كێشانەوە بكرێتە كلتور لەنێو سیاسەتمەدارانی كوردستان".

جەختیش دەكاتەوە كە چاوەڕێ بوون ژمارەیەك لەسەركردەكانی گۆڕان هەمان شەوی بڵاوكردنەوەی ئەنجامەكانی هەڵبژاردن دەستیان لەكار بكێشایەتەوە نەوەك سێ مانگی تر، چونكە ئەوە دەست لەكاركێشانەوە نابێت ئەوە دەركردنە. 

پڕۆژەكەی گۆرانخوازانی ئەوروپا جەخت لەسەر ئەوە دەكەنەوە "بازنەی دەسەڵات لەبزوتنەوەی گۆڕان تاكڕەوە، گوێ ناگرێ ‌و تەنیا ئەوە دەكات زەینی خۆی دەیخوازێ".