ئاماری 10 مانگی رابردووی روداوەكانی هاتوچۆی پارێزگای هەولێر ئاشكرا دەكرێت


لەراگەیەندراوەكەی بەڕێوەبەرایەتی هاتوچۆی پارێزگای هەولێر كە وێنەیەكی دەست (تۆڕی هەواڵی ژیان) كەوتووە، هاتووە "لەماوەی 10 مانگی یەكەمی ئەمساڵدا لەشاری هەولێر و دەوروبەری بەقەزای كۆیەشەوە كۆمەڵێك روداوی هاتووچۆ كەوتونەتەوە كە ژمارەیان هەزارو 119 روداو بوون".

بەپێی راگەیەندراوەكە "لەئەنجامی ئەو روداوانەدا 214 هاووڵاتی گیانیان لەدەستداوەو هەزارو 212ی دیكەش بەبرینی جۆراوجۆر بریندار بوون، جگە لەزیانی ماددی زۆر كە بەدەیان ملیۆن دۆلار دەخەمڵێنرێت و بەر موڵك و ماڵی هاوولاتیان و موڵكی گشتی كەوتوە".

راگەیەندراوەكە روونكردنەوە دەدات "ئەگەر بەراوردێك بكەین لەگەڵ ژمارەی روداوەكانی ساڵی رابردوو لەماوەی ئەو 10 مانگەدا، دەبینین كە رێژەو ژمارەكەی زیادی نەكردوە، بەڵكو لەوانەیە كەمیشی كردبێت، بەڵام هۆكاری روداوەكان دەگەڕێنەوە بۆ ئەوەی ئەگەر كەموكوڕییەك لەڕێگاوبانەكان هەبێت و هۆكاربوبێت بۆ كەوتنەوەی روداوەكە بەزووی چارەسەری بكەین".

راگەیەندراوەكە جەخت دەكاتەوە "90%ی روداوەكان بەهۆی تیژڕەۆییەوە بووە كە ئەمەیان بۆتە بەڵایەك بۆ سیستمی هاتووچۆ و بۆتە مۆتەكەی مەرگ كە رۆژانە خوێنی گەنج و لاوەكانمان دەڕێژێت."

راگەیەندراوەكە داوا لە شۆفێران دەكات پابەندی رۆیشتن بن بەوخێراییەی كە هاتووچۆ بۆی  دیاریكردوون.