تەندروستی سلێمانی بۆ ژیان: هەڵمەتی كوتانی منداڵان پێنج رۆژ دەخایەنێت

بەهۆی ئەو هەڵمەتانەوە لە ساڵی 2000 وە لە هەرێمی كوردستان هیچ حاڵەتێكی ئیفلیجی منداڵان تۆمار نەكراوە

ژیان: ڕابەر مەحموود

وتەبێژی تەندروستی سلێمانی ڕایدەگەیەنێت، هەڵمەتی كوتان دژی ئیفلیجی منداڵان لە هەرێمی كوردستان دەستی پێكرد و بڕیاریشە ماوەی پێنج رۆژ بخایەنێت كە منداڵانی خوار تەمەن پێنج ساڵ دەگرێتەوە.

د.ئەیاد نەقشبەندی، ووتەبێژی تەندروستی بۆ (تۆڕی هەواڵی ژیان) ووتی"هەڵمەتەكە ئەمڕۆ دەستی پێكردوە كە هاوكاتە لە گەڵ ڕۆژی جیهانی تەندروستیدا، بۆ ئەو مەبەستەش 536 تیمی دوو كەسی و 138سەرپەرشتیاری دەرەكی و ناوەكی لەم هەڵمەتەدا بەشدارن".

نەقشبەندی ئەوەشی خستەڕوو، 253 هەزار منداڵ كە لەیەك تەمەنی رۆژ تاوەكو پێنج ساڵ دەگرێتەوە.

ئیفلیجی منداڵان نەخۆشییەكی درمی ڤایرۆسی ترسناكە، بەزۆری توشی منداڵانی خوار تەمەن پێنج ساڵان دەبێت و دەبێتە هۆی ئیفلیج بون یاخود مردن، ئەمڕۆ یەكشەممە هەڵمەتی كوتانی منداڵان لەسەرتاسەری هەرێمی كوردستان دەستی پێكرد. 

هاوكات هەر ئەمڕۆ (د.خاڵس قادر) وتەبێژی وەزارەتی تەندروستی هەرێمی كوردستان ڕایگەیاند"بەهۆی ئەو هەڵمەتانەوە لە ساڵی 2000 وە لە هەرێمی كوردستان هیچ حاڵەتێكی ئیفلیجی منداڵان تۆمار نەكراوە، بەڵام دەبێت ئەوەشمان لەبیرنەچێت كە تائێستا لە وڵاتانی دراوسێمان ئەو نەخۆشییە بونی هەیە و پێویستە بەردەوامبین لەرێگریكردن لە نەخۆشیەكە".