دانە غاز: داهاتمان لە هەرێم دوو هێندە زیادی کردووە

داهاتی كۆمپانیای دانە غاز لە چارەكی یەكەمی ئەمساڵدا بەراورد بە هەمان ماوەی ساڵی ڕابردوو، لەسەدا ١١٧ زیادیكردووە

ژیان:
كۆمپانیای دانە غاز رایدەگەیەنێت داهاتی كۆمپانیاكەیان لە هەرێمی كوردستان لە چارەكی یەكەمی ئەمساڵدا دوو هێندە زیادیكردووە.

لە ڕاگەیەندراوێكدا كۆمپانیای دانە غاز بڵاویكردووەتەوە، داهاتی كۆنسێرتیۆمی پێرڵ پێترۆڵیۆم، لە بەرهەمهێنانی غازی سروشتی و غازی شلكراو لە هەرێمی كوردستان ١١٢ ملیۆن دۆلار بووە.

ڕاشیگەیاندووە" بەو پێیەی كە كۆمپانیای دانە غاز لە سەدا سی و نۆی پشكەكانی پێرڵ پێترۆڵیۆمی هەیە، پشكی كۆمپانیاكە لە فرۆشتنی غازی سروشتی و گازی شلكراو لە چارەكی یەكەمی ئەمساڵدا ٣٩ ملیۆن دۆلارە".

ئاماژەی بەوەشکردووە، داهاتی كۆمپانیای دانە غاز لە چارەكی یەكەمی ئەمساڵدا بەراورد بە هەمان ماوەی ساڵی ڕابردوو، لەسەدا ١١٧ زیادیكردووە.