هاوڵاتیبونی فەخری لە مهاباد درایە عەدنان كەریم


ژیان: 
شارەوانی و ئەنجومەنی شاری مەهاباد لەكاتی ئەنجامدانی كۆنسێرتی (عەدنان كەریم) لە شارەكەدا نازناوی هاوڵاتیبوونی فەخرییان بەخشییە ئەو هونەرمەندە.

هونەرمەند عەدنان كەریم لەگەڵ ئۆركێسترای فیلارموونیكی موكریان بە هاوكاری دایرەی فەرهەنگ و ئیرشادی ئیسلامی و شارەوانی مەهاباد، ماوەی سێ رۆژ لە هۆڵی وەحدتی شارەوانی ئەو شارە كۆنسێرتێكی ئەنجامدا. 

لەو كۆنسێرتەدا هاوڵاتیبوونی فەخری مەهاباد لەلایەن شارەوانی و ئەنجومەنی ئەو شارە درایە ئەو هونەرمەندە و تیایدا هاتووە "ئەوەی لە سروە باڵسووكتر سنوورەكان دەبڕێ و لە پەپوولە هێمنتر لەسەر پەڕەی دڵان دەنیشێ، هەستی پیرۆزی لە هونەر هەڵكشاوە".

لەو پۆرترەیتەدا ئەوەش هاتووە "هیچ خەڵاتێك نییە ئامپای ڕۆحی گەشی هونەرمەندانی ڕاستەقینە بێت و بەم بۆنەیەوە كە ئەمڕۆ بە زایەڵەی سۆزی دەنگی هەمیشە سەوزتان شاری مەهاباد بەهاری پێدەكەوێ، وێڕای ڕێزو حورمەتی بێبڕانەوەمان، بەوپەڕی شانازییەوە نازناوی شارۆمەندی فەخریتان وەك پێزانین پێدەبەخشرێ".

هونەرمەند عەدنان كەریم بەشێك لە داهاتی كۆنسێرتەكەی لەو شارە پێشكەشی خەڵكی لێقەوماوی لافاوەكەی ئێران كرد.