دەنگدانی ئاشكرا یان دەنگدانی نهێنیی؟

دیمەنێک لە دانیشتنی خولی نوێی پەرلەمانی کوردستان

ژیان: کەمال چۆمانی

مادەی چوار، یەكەم خاڵی پێنجەم، لە قانونی كاراكردنەوەی دامەزراوەی سەرۆكایەتیی هەرێمی كوردستان دەڵێت "سەرۆك لە دەنگدانێكی ئاشكرا..." هەڵدەبژێردرێت.

هەندێك كەس رەخنە لەو خاڵە دەگرن. من بەپێچەوانەوە، پێموایە، بۆ پێشڤەچونی دیموكراسیی و شەفافییەت، پێویستە ئەندام پارلەمانان بەئاشكرا دەنگبدەن نەك بەنهێنیی بۆ ئەوەی ئەندام پارلەمانەكان زیاتر هەست بە بەرپرسیاریی بكەن لە بەرانبەر دەنگدەرانیان و گەل.

دەنگدەران و گەلیش بتوانن باشتر لێیان بپرسنەوە كاتێك دەنگ بە پرسێك دەدەن كە لەگەڵ ویستی ئەوان و بانگەشەكانی ئەندام پارلەمانەكە لە رابردودا ناگونجێت. بۆ نمونە، لە هەڵبژاردنی سەرۆكی هەرێمدا، هیچ ئەندام پارلەمانێك ناتوانێت خەڵك لە خشتە ببات و بڵێت دەنگی بە سەرۆك نەداوە، بێگومان بۆ ئەو دەنگدەرانەی كە دەنگدان بە سەرۆك بە كارێكی باش نازانن.

بەدڵنیاییش دەزانم لە كوردستان پارلەمان و ئەندام پارلەمانان لەلایەن مەكتەب سیاسییەكانەوە قوڕمیش و كۆنترۆڵ كراون، بەڵام لە دەنگدانی ئاشكرادا باشتر ئازایەتیی ئەندام پارلەمانانمان بۆ دەردەكەوێت ئایا گوێ لە ئیرادەی دیموكراسیی و وڵاتییان و دەنگدەران دەگرن یان بەرژەوەندییەكانی مەكتەب سیاسییەكانیان و خانەی راپەڕاندن و ئەنجومەنی باڵا و ئەوانەی لە پشتی مەكتەب سیاسیی و خانەی راپەڕاندن و ئەنجومەنی باڵان.




تۆڕی هەواڵی ژیان بەرپرس نییە لە ناوەڕۆکی ئەم نوسینە