لە فەرەنسا؛ جارێكیتر لێكۆڵینەوە لە دۆسیەی ساكینەجانسز دەكرێتەوە

ئەو سێ چالاکوانەی لە پاریسی تیرۆر کران

ژیان: 
جارێكیتر لێكۆڵینەوە لە دۆسیەی ساكینە جانسز و هاوەڵەكانی دەكرێتەوە، بۆ ئەوەی بزانرێت دەزگای هەواڵگری میتی توركیا رۆڵی لەو هێرشەی پاریسدا چی بووە. 

ژان لویی مالترە، پارێزەری دۆسیەی ساكینە جانسز، رایگەیاند: پەڕاوی لێكۆڵینەوە كراوەتەوە و لەمەوبەدوا لێكۆڵینەوە دەربارەی ڕۆڵی میتی تورك لە كۆمەڵكوژییەكەدا دەكرێت.

ناوبراو بە ئاژانسی هەواڵی فوراتی راگەیاند: دەزگای دادوەری قبووڵی كردووە لێكۆڵینەوە لەم بابەتەدا بكات و هێشتا ڕوون نییە لێپرسینەوەكان چەند دەخایەنێت.

ئەو پارێزەرە وتیشی: دوای مردنی بكوژی تۆمەتبار لە زیندان ئێمە ڕامانگەیاندبوو ئەو كەسە تەنیا نییە بەڵكوو شانە نهێنییەكانی توركیا چەكیان پێداوە، لە دۆسیەی پێشوودا تەنیا دەربارەی بكوژ عومەر گونەی لێكۆڵینەوە دەكرا، بەڵام لە هەمان دۆسیەدا ڕۆڵی میت بەشێوەیەكی ڕوون دەستنیشان كرابوو.

عومەر گیونەی، بكوژی ساكینە جانسز و هاوەڵەكانی دوای چەند هەفتەیەك لە دەستپێكردنی لێكۆڵینەوه،‌ لە ساڵی 2016 بەشێوەیەكی گوماناوی لە زیندان مرد. دۆسیەكەی ناوبراو بە شێوەیەكی كرداری داخرابوو بەڵام خانەوادەی قوربانییان ڕەتیانكردبوویەوە دۆسیەكە بەو شێوەیە كۆتایی بێت. بۆیە لە 12.3.2018 سەرلەنوێ سكاڵایان تۆمار كردەوە.