هێرشەکان بۆ سەر ئەم بەرپرسەی یەکێتی بۆ لەم کاتەدا؟


ژیان: میران محەمەد
لەم چەند ساڵەی دواییدا، هیچ کەس بەهێندەی شێخ لاهور  نەیتوانیوە لە بنکەی جەماوەریی یەکێتی تێبگات، لێدوانەکانی جگە لە رەهەندی سیاسی هاوکات گوزارشت لە ناخ و بیرکردنەوەی هەزاران کادر و لایەنگری یەکێتی دەکات بەبەڵگەی ئەوەی هیچ کۆبوونەوەیەکی جەماوەریی هاوشێوە و پڕلەکارلێکی نێوان سیاسی و جەماوەر بەدی ناکرێت بەتایبەت لە ناوچە جێناکۆکەکاندا. 

لەنێو ئەو نەوە سیاسیە بوێرە نوێیەی یەکێتیدا کە ئێستا پشکی شێریان بەرکەوتووە و هەوڵی راستکردنەوەی هاوکێشەکان دەدەن، رەنگە ئەمیان بڵندگۆی ناخی جەماوەرێکی دڵشکاوبێت کە بەدەنگی بەرز گلەیی لە هەموو سیاسەتێکی سڕینەوە و بەرژەوەندخوازی دەکات و رەخنە لەوانە دەگرێت کە هەموو قوربانیدانێک بێ ئەرزش دەکەن. 

ئاخر ساڵانێکە ئەوانەش کە لە ناخی خۆیاندا گلەیی و رەخنەیان لەدۆخەی سیاسی هەیە لەبەر ئیعتباراتی دیکە خۆیان لەم خواستە جەماوەرییە قورسانە بەدوورگرتووە. 

شێخ لاهور وەک هەر گەنجێکی سیاسی دەیتوانی خەون بە پلە و پۆست و پێگەی جۆراوجۆرەوە ببینێت ئەمما بەو ئاراستە سیاسیەی هەڵیبژاردووە دەیسەلمێنێت ئامادەیە یەکەم کەس خۆی بکاتە قوربانی خواستەکانی بنکەی جەماوەری. 

هاواری ئەم پێچەوانەی نمایشی هەر سیاسیەکی دیکەیە لە کەناڵە پرۆفیشناڵەکانەوە هاوار بۆ دۆخی مناڵانی غەدر لێکراوی ناوچە جێناکۆکەکان بکات، دەنگی ئەم گەرچی تووڕەیە بەڵام هێشتا گوزارشت لە بێ دەرەتانی باوک و دایکی شەهیدان و خەڵکی بەشمەینەتی ئەم وڵاتە دەکات کە بە رۆح و بەگیان پشتیوانی کوردایەتی و خاکپەروەریان کردووە و ئێستا نیگەرانن. 

ئەو دەیتوانی لەگەڵ هەموو لایەنەکان دۆستایەتی بکات و بە پلەکانی حزبی و حکومیدا بەئاسانی سەرکەوێ بەڵام بۆ ئەوە ناکات؟ بۆچی ئامادەیە لەگەڵ لایەنەکانی تر تێکی بدات؟ بێگومان بەوردی باری لاری سیاسی دەخوێنێتەوە و لەروانگەی هاوسەنگی و مافی رەوای هەموو لایەکەوە، ئارەزووی ژیانێکی سیاسی تەندروست بۆ کوردستان دەخوازێت، ململانێی ئەو چەندە توندە هێندەش دوورە لە نیفاقی سیاسی و حەق وایە لەناو خۆی یەکێتی و لایەنەکانی دیکە رێز لەو راشکاویەی بگرن کە دەربڕینە لە بۆچوونی جەماوەرێکی فراوانی کۆمەڵانی خەڵکی کوردستان




تۆڕی هەواڵی ژیان بەرپرس نییە لە ناوەڕۆکی ئەم نوسینە