موجتەبا میرزادە، باوکی موزیکی کوردی و فارسی

کاتێک لە پلەی یەکەمەوە دەیکەن بە دووەم دەڵێت خۆمن بۆ گەران و گەشت هاتم

`ژیان:

لە ساڵی 1945 لە شاری كرماشان لەدایكبووە. 

میرزادە خۆی سەرەتاكانی تێكەڵاوبونی بە هونەر و مۆسیقا دەگێڕێتەوە و دەڵێت: بۆ یەكەم جار بە فلووت دەستم پێ كردووە و دوای ئەوەش بە سەنتوور لەگەڵ براكەم لای دراوسێكەمان دەستمان پێ كرد. میرزادە لە پۆلی پێنجەمی سەرەتایی دەگەڕێتەوە كرماشان واتە ساڵی 1957و هەر لە هاوینی ئەو ساڵەدا یەكێك لە دۆستانی باوكم وتی بە باوكم كە ئایا ئەم كوڕەت ئاوا هۆگری هونەر و مۆسیقایە بەڵام بۆ خۆی سازی نییە حەیفە هەر ئەو ڕۆژە لەگەڵ باوكم چووین بۆ دووكانێك بە ناوی گوڵبەهار ئەو كات لە چوارڕێیانی ئوجاقی كرماشان بوو، ئەم دووكانە لەگەڵ تاران پەیوەندی ڕاستەوخۆی هەبوو، كەمانێكی بۆ كڕیم بە 70 تمەن، لەوانەیە باوەڕ نەكەن بەڵام تەواوی گۆرانییەكانی ڕادیۆ كرماشان و گۆرانییەكانی نەمر حەسەن زیرەك و ماباقی گۆرانیبێژانی ئەو سەردەمە هەر بەو كەمانە لێ دراون.

میرزادە دەگێڕێتەوە كەلەو كاتەدا لە كرماشان مامۆستایەكی كارزان و گەورەی وا نەبووە كە بچێتە لای بۆ فێربوونی دەرسی ڤیۆلۆن ئەوەی زانیویەتی سەرجەمی بە توانای خۆی و هەستی خۆی بووە،  

میرزادە ئەو كاتەی لە قوتابخانە بووە هەموو ساڵێك لەفێستیڤاڵی قوتابخانەكان لە بواری مۆسیقادا یەكەم بووە، لەسەر ئاستی شارە كانی رۆژهەڵاتی كوردستان.. 
لە ساڵی 1959 چووەتە شاری سنە لەوێ لە ئۆركسترای شاری سنە كە ئەو كات حەسەنی كامكار ڕابەری بووە لە ژێر چاوەدێری ئەودا بۆ ماوەی ساڵێك ماوەتەوە و بەم شێوە توانیویەتی مەیدانێكی باش بۆ خۆی پەیدا بكا لەبواری مۆسیقادا پاشان دەبێت بە كارمەندی ڕادیۆ سنە لە ماوەی یەك ساڵدا زۆر وانەی گەورەی مۆسیقا لە مامۆستا كامكار فێر دەبێت. 

لە تەمەنی 17 ساڵیدا واتە لە ساڵی 1962 دەبێتە ئەندامی كۆڕی مۆسیقای ڕادیۆ كرماشان كە ئەو كات موحەممەدی عەبدوسەمەدی كە قەرەنەی لێ ئەدا خەڵكی شاری سنە و ڕابەری ئۆركێستراكە بوو.

 دوای ساڵێك لە ساڵی 1963 دەبێت بە ڕابەری ئۆركێسترای كرماشان، لە دوای ئەوە لەگەڵ هونەرمەندەكانی ئەو كاتە كە ئەهاتنە كرماشان بۆ تۆماركردنی گۆرانی ناسیاوی پەیدا دەكات و گۆرانییەكانیان بۆ تۆمار دەكات بۆ نمونە: حەسەن زیرەك، محەمەدی ماملێ، مەزهەری خالقی، ئیبراهیم خۆش نەوا، مورتەزا توندڕەو و هاشم ڕەبیعی. 

میرزادە دەڵێت: لەگەڵ زۆر گۆرانیبێژی كورد و فارسدا گۆرانیم تۆمار كردووە و كەمانم ژەندووە بەڵام لەو باوەڕەدام كە هیچیان وەك حەسەن زیرەكی نەمر نەبوون بەڕاستی زیرەك تەنیا بە حەسەن ئەكەوت، دڵنیام تا كورد مابێت مەحاڵە ڕۆڵەیەكی تری وەك حەسەن زیرەك بە خۆیەوە ببینێ. زۆربەی زۆری خەڵكی كوردستان ئەڵێن ئەگەر میرزادە نەدەبوو حەسەن زیرەكیش وا نەدەبوو. بەڵام من ئەڵیم ئەگەر حەسەن زیرەك نەدەبوو منیش هیچ نەبووم و من و حەسەن تەواوكەری یەك بووین چۆن ئەو كاتە كە من لەدایكبووم واتە ساڵی 1945هەر ئەو ساڵە حەسەن زیرەك لە بەغدا چەندین بەرهەمی بەرزی تۆمار كردووە.

لە ساڵی 1945لە فێستیڤاڵێكی مۆسیقادا لە شاری رامسەر بە كۆكردنەوەی 13 خاڵ لە 20 بە شێوەیەكی نافەرمی یەكەم بوو بەڵام پلەی یەكەمی درایە محەمەدڕەزا لوتفی لە كاتێكدا ئەو لە 20 خالچەكە تەنها 10 خاڵی كۆ كردبویەوە، لەو بارەیەوە میرزا دەڵێت "بێ ئینسافی بوو چونكە ئەو ژەنیارێكی بەناوبانگ بوو، ئەویان كرد بە ئەوەڵ و منیش بووم بە دووهەم چونكە من تەنیا بۆ سەیری دەریا و خۆشی چووبووم".

میرزادە لە ساڵی 1967دا ئەگەڕێتەوە بۆ تاران لە زانكۆ و لە پەیمانگای هونەر جوانەكان وەردەگیردرێ، بەڵام ماوەیەكی زۆر ناخایەنێ و دەگەڕێتەوە كرماشان. 
بۆ ماوەیەكی زۆر دەبێتە سەرۆكی ئۆركێسترای ڕادیۆ تاران و چەندین بەرهەمی سەركەوتوو تۆمار دەكات. بێجگە لە ڤیۆلۆن كە سازی سەرەكی خۆیەتی چەند ئامێری تری مۆسیقی وەك پیانۆ، تار، سێ تار و كەمانچە ژەندووە و هەروەها بۆ زۆربەی فیلمە ئێرانییەكانی ئەو سەردەمە مۆسیقای داناوە. 

مۆسیقای زیاتر لە 56 فیلمی داناوە 

لە دوای 40 ساڵ خزمەتكردن لە مۆسیقادا و لە خزمەتكردن بە هونەرلە رۆژی 19/7/ 2005دا لە تەمەنی 60 ساڵیدا لە نەخۆشخانەی تاران بە نەخۆشی دڵ كۆچی دوایی كردووە هەر لەوی بەخاك سپێردراوە.