ژمارەیەك هەڵسوڕاوی گۆڕان دەستیان لەكار كێشایەوە


ژیان: 
ئەمڕۆ لە شارۆچكەی خورماتوو، 15 هەڵسوڕاوی بزوتنەوەی گۆڕان، لەئاستی مەكۆی شارۆچكەكە بەدەركردنی راگەیەندراوێك وازهێنانیان لە بزووتنەوەكە راگەیاند.

بەگوێرەی‌ راگەیەندراوێك كە ئەمڕۆ بڵاویان كردووەتەوە ئەو هەڵسوڕاوانە هۆكاری دەست لە كار كێشانەوەیان رونكردووەتەوە و دەڵێن: بێ هەڵویستی بزوتنەوەی گۆڕان بەرامبەر بە ناوچە دابڕێنراوەكان و سەردان نەكردنیان بۆ خورماتوو و بێهەڵویستیان دوای رووداوەكانی 16ی ئۆكتۆبەر، دوو هۆكارن بۆ ئەوەی كە دەست لە كار بكێشنەوە.

ئەو هەڵسوڕاوانەی دەستیان لەكار كێشاوەتەوە بریتین لە بەرپرسی بازنە و دەستەی ئەنجومەنی مەكۆی خورماتوو و رایەڵەی مامۆستایان و خوێندكاران و كاسبكاران و وەرزشكاران و بەرپرسی پەیجوری و كاندید بۆ ئەنجومەنی نوێنەرانی عێراق.

ئەو باسیان لەوەش كردووە كە "بەلاڕێدابردنی بزوتنەوەكە لەسەر رێبازەكەی نەوشیروان موستەفا" و گوێنەگرتن و جێبەجێ نەكردنی داواكاری هاوڵاتیانیش بەشێكیترە لە هۆكارەكانی دەست لەكار كێشانەوەیان.