دوو روداوی هاتوچۆی گەورە لە هەولێر رویاندا

دیمەنێک لە رووداوەکە

ژیان: 
كاتژمێر 1:50 خولەكی پاش نیوەرۆی ئەمڕۆ 30ی حوەزەیرانی 2019، لە جوتسایدی گەڕەكی عەدالەی نوێ لەهەولێر بارهەڵگرێك بەهۆی تیژڕەویی و بێئاگاییەوە كۆنترۆڵی لەدەستداوەو لەئەنجامی كۆنترۆڵ لەدەستدانەكەیدا خۆی كێشاوە بەدوو ئۆتۆمبێلی پارك كراو لەتەنیشتی ریگایەك.

موقەدەم فازل حاجی، وتەبێژی بەڕێوەبەری پۆلیسی هاتوچۆی هەولێر، رایگەیاند: یەكێك لەدوو ئۆتۆمبێلە لەدوای خۆپیاكێشانی بەهۆی توندی هێزی بەركەوتنەكە لەشەقام دەرچوەو خۆی كێشاوە بەدوو ئۆتومبێلی تردا، لەئەنجامی روداوەكەشدا زیانێكی زۆری ماددی بەر چوار ئۆتۆمبێلەكەو بارهەڵگرەكە كەوتوە.

ناوبراو لە لاپەڕەی خۆی لە تۆڕی كۆمەڵایەتی فەیسبوك ئەوەشی ئاشكرا كردووە كە روداوەكە زیانی گیانی لێنەكەوتووەتەوە داواش دەكات شۆفێرن زیاتر پابەندی یاساكانی هاتوچۆبن. 

هاوكات هەر ئەمڕۆ بەیانی بارهەڵگرێكی گەورە بەهۆی پێچكردنەوەی لە شوێنێك كە شوێنی پێچكردنەوەی یاسایی نەبووە تووشی پێكدادان بووە لەگەڵ ماتۆڕسكیلێك كە شۆفێرێك و دوو سەرنشینی لەسەر بووە، لە ئەنجامی رووداوەكەش شۆفێری ماتۆڕسكیلەكە و سەرنشینێك دەستبەجێ گیانیان لەدەستداوە و سەرنشینەكەی دیكەش برینداربووە.