ئەگەر خالقی ببێتە ئیتڵاعاتیش هێشتا هونەرەكەی باڵایە !

مەزهەر خالقی

ژیان: هەڵمەت عەلی 

خالقیم لە ڕێگەی ئاواز و گەرووە زێڕینەكەیەوە ناسیوە، لینكی پەیوەندی من بە خالقییەوە تەنها هونەرەكەیەتی نەك شتێكی دی، ئەو لەلای من دەروێشی تەكێی عەشق و هونەر بوە نەك كارەكتەرێكی سیاسی، ئەوەندەی بەلامەوە گرنگ بووە هونەرەكەی ئەو تەریب بە ڕەسانەیەتی ئێمە هەنگاو بنێ و لانەدا، هێندە بەلامەوە گرنگ نەبوە خالقی چۆن بیر ئەكاتەوەو هەڵوێستە سیاسییەكانی چین.

ئەوەندەی بەلامەوە گرنگ بوە خالقی لەكوێدا دەوەستێ و هونەرەكەی لەلوتکەدا دەهێڵێتەوە، هێندە بەلامەوە گرنگ نەبوە چۆن ڕەفتار ئەكاو سلوكی كۆمەڵایەتی چۆنە، پەیمانی من لەگەڵ ئەو تەنها پەیمانە لەگەڵ دەنگی، پەیمانە لەگەڵ ئەو هەست و سۆزە ئەبەدییەی لەگەروییدا ئامادەگی هەیە، ئێمە هێشتا لەوە نەگەیشتوین خالقی وەك هونەرمەندو خالقی وەك كارەكتەرێكی كۆمەڵایەتی لەیەكدی جودان، تێناگەین لەوەی ئاشنایەتی زۆرینەمان ئاشنایەتیە بەو چریكە جاویدانییەی چەند دەیەیەكە بە گوێماندا دەچریكێنێ، نەك ئاشنایەتی بە ئەكتیڤێستێكی سیاسی، لای من ئەگەر خالقی ببێتە ئیتڵاعاتیش هێشتا هونەرەكەی بەباڵایی دەمێنێتەوە، هێشتا تینوێتی بیابانی ڕۆحمان بە دەنگە ناوازەكەی ئەو دەشكێ ... 

سەیرم پێدێ خەڵكانێك لەسەر هەوڵێستێك، سەردانێك، بەشداری لە كۆنفرانسێك، خالقی و هونەرەكەشی ڕەتبكەنەوە، بڕیاربدەن چیتر گوێ لە دەنگە ئەفسوناویەكەی نەگرن، ڕاست و چەپ بكەونە شكاندن و بێبەهاكردنی كەسایەتی و هونەرەكەی ئەو، باشە خۆ خالقی پەیوەندی ژێربەژێری لەگەڵ دەسەڵاتدارانی ئێران نەبەستوە، خیانەتی لە نیشتمانەكەی نەكردووە، تەنها وەڵامی بانگهێشتنامەیەكی داوەتەوە و دەیەوێ لەو ڕێگەیەوە دەرفەتی شادبونەوە بە شارو زێدی خۆی بۆ بڕەخسێ، ئیدی ئەمە كوفر نیەو دونیای وێران نەبوە، ئەگەر بانگهێشتنامەی هاوشێوە ئاڕاستەی داریوش و موعین و هونەرمەندە ناودارەكانی دیكەی فارسیش بكرێ بە گرەنتی پاراستنی گیان و ژیانیان، ئەوا دوور نیە ئەوانیش ئەو هەنگاوە بنێن، ڕەنگە لەبری تەخوینكردن، پێشوازییەكی بەرفراونیشیان لەئاستی جەماوەریدا لێبكرێ، بەڵام سەیرە ئەم هەڵایە لەسەر خالقی دروست ئەكرێ لەكاتێكدا ئەزمونی هاوشێوە لە هەردوو ئەدیبی گەورەی كورد (هێمن و هەژار)یشدا دووبارە بۆتەوە بەبێ ئەوەی تەخوین و تەشهیر بكرێن، دواجار ئەم هەنگاوە بەمانای تەسلیمبون و ڕازیبون بەو سیستمە سیاسی و حكومڕانیە نییە كە لە ئێستاكێی ئێراندا باڵادەستە. 

ئەگەر خالقی تەنها كارەكتەرێكی سیاسی بوایە ڕەنگە ڕەخنەكان لەشوێنی خۆیدا بوایە، بەڵام سەیر لەوەدایە ئێمە چاوەڕوانیەكانمان لە هونەرمەندان و ئەدیبان و ڕۆشنبیران زیاترە وەك لە كارەكتەرە سیاسییەكان، لەكاتێكدا سیاسییەكانمان بە دەیان هەنگاوی مەترسیدار دەنێن كەچی كاردانەوەكان بەوشێوەیە نین، ئەمەش ئیشكالیەتە گەورەكەی كۆمەڵگەی ئێمەیە ...




تۆڕی هەواڵی ژیان بەرپرس نییە لە ناوەڕۆکی ئەم نوسینە