سوودان; هەوڵێكی كودەتا شكستیهێنا

خۆپیشاندەرانی سودان

ژیان:

ئەنجومەنى سەربازی سودان ڕایگەیاند، هەوڵێکى کودەتایان پوچەڵکردووەتەوە کە ژمارەیەک ئەفسەری سەر بە سوپای وڵاتەکە ویستوویانە بیکەن.

جەمالەدین عومەر سەرۆکى لیژنەى  ئاسایش و بەرگری لە ئەنجومەنى سەربازی سودان ڕایگەیاند، 12 ئەفسەری پلە بەرزی سوپا  کە 7یان لە خزمەتتدابوون و 5یان خانەنشین بوون  پلانی کودەتاکەیان داڕشتووە و توانراوە سەرجەمیان دەستگیربکرێن.

ڕاشیگەیاندووە، ئەنجامدەرانی هەوڵی کودەتاکە دژى ئەو ڕێککەوتنەبوون کە لە نێوان ئەنجومەنى سەربازی و نوێنەرانی ئۆپۆزسیۆندا کراوە و ویستویانە حوکمی وڵات بە شێوەیەکى سەربازی بکەن.

جێی باسە لە مانگی نیسانی ئەمساڵدا و دوای زنجیرەیەك خۆپیشاندانی سەرتاسەری لە سوودان، سوپای ئەو وڵاتە كودەتای بەسەر عومەر حەسەن بەشیر سەرۆكی وڵات كرد و لەو كاتەوە تا ئێستا ئەنجومەنێكی سەربازی سودان بەرێوەدەبات.

لە رۆژانی رابردوودا ئەنجومەنی سەربازی و ئۆپۆزسیۆنی ئەو وڵاتە لەسەر شێوازی بەڕێوەبردن لە قۆناغی راگوزەر رێككەوتن، بە جۆرێك كە دەستەیەكی هاوبەش لە سەربازی و مەدەنیەكان لەو ماوەیەدا جڵەوی دەسەڵات بگرێتەدەست.