دهۆك؛ مەترسی لەناوچوونی شوێنەوارەكان هەیە

داوا دەكریێت پەرلەمانی كوردستان یاسایەكی تایبەتی بۆ دەربكات
یەکێک لە شوێنەوارەکانی دهۆک

 ژیان: عەمار عەزیز

پارێزگای دهۆك لە رووی شوێنەوارەوە دەوڵەمەندەو ژمارەیەك شوێنەواری زۆر كون لە پارێزگاكەدا بوونی هەیە، لە ئێستاشجا مەترسی لەناوچونیان لەسەرە.

بەپێی بەدواداچوونی ژیان، چەندین ناوچەی شوێنەواری لە پارێزگای دهۆك مەترسی لەناو چونیان لەسەرەو تاوەكو ئێستاش هیچ كەس خۆیی بەخاوەنی ئەو ناوچە شوێنەواریانە نازانێت.

حەسەن ئەحمەد، بەرێوەبەری شوێنەواری لە پارێزگای دهۆك بۆ ژیان  ووتی "زۆربەی شوێنەوارەكان سنوری پارێزگای دهۆك هیچ پاسەوانێكیان نیە، پێش ماوەیەك حكومەتی هەرێم بەنیاز بوو هەزار و 500پۆلیس بۆ پاراستنی شوێنەوارەكان‌و شوێنەكانی گەشتیاری دامەزرێنێت، بەڵام تاوەكۆ تاوەكو ئێستا ئەوە جێبەجێ نەكراوە".

ئاماژەی بەوەشكرد، شوێنەوار بەشێكی گرنگن لە ئاسایشی هەر نەتەوەیەك، بوویە پێوسته بەرێوەبەرایەتیەكانی شوێنەواری لە هەرێمی كوردستان بخرێنە سەر دەزگای ئاژانسی پاراستنی هەرێم ئەوكات بە باشترین شێوە شوێنەوارەكان دەپارێزرێن، یان بكرێتە دەستەیەكی سەربەخۆ كە راستەوخۆ سەر بە سەروكایەتی هەرێم یاخود ئەنجۆمەنی وەزیران بن.

پێش ماوەیەك هەندێك كەس دەستدرێژیان كردبوو سەر شوێنێكی شوێنەواری لە سنوری پارێزگای دهۆك‌و هەوڵیان دابوو شوێنەوارەكە تێك بدەن تاڕادەیەك شوێنەوارەكە تێكدراوە، دوای ئەوە لە دادگا سكاڵا لەلایەن بەرێوەبەرایەتی شوێنەواری دهۆك تۆماركرا، لە ئێستادا رێكارە یاساییەكان بە شێوەیەكی ئاسایی بەرێوە دەچن‌و چاوەڕوانی بڕیاری كۆتایی دادگا دەكەین .

باسی لەوەشكرد، ڕاستە دەستدرێژی بۆ سەرشوێنەوارەكان لە سنوری پارێزگای دهۆك كەمەو هێشتا نەبووتە دیاردە، بەڵام تاوەكو ژیان بەردەوام بێت بە یەكجاری بنەبڕ نابن‌و هەر ڕودەدەن، هەروەها هەماهەنگیەكی باشمان هەیە لە گەڵ دەزگا ئەمنیەكانی شاری دهۆك‌و زۆر هاوكاری ئێمە دەكەن بۆ پاراستنی شوێنەوارەكان، ئەو حالەتەی ڕوداوە ناچێتە قالبی ئەوەی كە ئێمە بڵێن بووتە دیاردەو بەردەوامە، بەپێچەوانەوە تاڕادەیەكی باش كۆنتروڵە.

زیاتر لە هەزار ناوچەی شوێنەوار لە بەرێوەبەرایەتی شوێنەواری دهۆك تۆماركراون، بەرێوەبەری شوێنەواری پارێزگاكەش بە پێویستی دەزانێت، لەم خولەی پەرلەمانی كوردستان یاسایەكی تایبەت بە پاراستنی شوێنەوارەكان دەربكات.