‪)‬تۆ هۆیەكی باش بویت بۆ دواخستنی ئەم فەزیلەتە، كات ئیتر لەمە باشتر نابێت) ڤیڵدا

ژاوێن شاڵی

ژیان: ژاوێن شاڵی 

تاكە رستە‌و دۆكۆمێنتێك كە لەناو لاپتۆپەكەیدا ئامادە بوو،  ئەمە وەسیەت‌و پەیامێكە بۆ كەسێكی دیاریكرا‌و رێكەوت نییە كە ئەمیش وەك هەموو وێنەو بابەت‌و دۆكۆمێنتەكانی تری پێش ئەم كارەی لەلایەن خودی خۆیەوە نەسڕاونەتەوە، یەك لە ئۆفیسەرەكان وایگوت.

ئەم رستەیە تاكە كلیل‌و پەیامی بوڵێڵی دەەستی پۆلیس بوو، كۆدەكەش ناوی تۆ بوو كە دەبوایە وەك پاسۆرد بۆ  چوونە ناو ئەم پۆتۆپیایە لێبدرێت، تۆ كێ بوی؟ 

پاش چەند خولەكێكی تر لە پشكنین مۆبایلێك لەژێر پشتی قوربانییەكە دەدۆزرێتەوە كە تەنها ژمارە‌و ناوێك تیادا تۆمار كراوە، تۆ كێ بویت؟

نازم رەوشت

من، ساڵانێكی زۆرە بەدەست خۆمەوە گیرم خواردووە، لەو وەهمەی كە منم نە خۆمم هەرگیز بۆ قوتار دەكراو، بەدەست غروری رۆژهەڵاتییانەی پیاوبوونیشمەوە دەستم نەدەچووە بوونێك، كە ئیتر نییە.

رینگ.. یەكەمین زەنگ وەڵام دەدەمەوە، بەجۆرێك بوار بۆ شۆك‌و تێڕامان ناهێڵمەوە، ئێستا دەتوانم یانزە هۆكار زیاترت پێ بڵێم كە بۆچی بەپەلە‌و نەمهێشت زەنگێكی تر لێبدا، لەترسی ئەوەی نەكا زەنگی هیوای درۆ یاخو بیركردنێكی كوشندە‌و وەستانی ساتەوەختێكی پەنجە لەسەر ناوەكەم بێ ویستی هۆشی ئەم زەنگەی پێ  لێدابێت‌و بەپەلە‌و لەیەكەمین زەنگدا دایبخاتەوە‌و بۆئەوەشی من نەتوانم هەواڵی بپرسم بلۆكم بكاتەوە، بەهەرحاڵ ئێستا كاتی روون كردنەوە نییە، بەپەلە وەڵام ئەدەمەوە، بێ ویستی خۆم‌و بۆ یەكەمینجار بە گیانەكەم وەڵامی ئەدەمەوە.. دەنگە دەنگێكی زۆر دێت‌و گوێم لەنێویاندا تەنیا لە وشەی بڵەد تێدەگەم، دەزانم خوێنە.. بە ئینگلیزی قسە دەكەن‌و منیش ١٥ ساڵە لە فەرەنسا دەژیم، لە كوردی‌و عەرەبی‌و فەرەنسی زیاتر هیچ زمانێكی تر بەتایبەت ئینگلیزی تێناگەم چەند وشەیەكی كەمی نەبێت.. بڵەد هاوار دەكەم بڵەد.. نابێت ڤیڵدا خوێنی لێ بڕوات، سەرم لێ تێكدەچێت ئەو هەموو دەنگە دەنگی پیاوو ژاوە ژاوە چییە‌و بۆ لە مۆبایلی ڤیڵدا بەدەست پیاوێكەوەیەو چی روویداوە‌و هەزار‌و یەك پرسیار‌و چەند خولەكێك دەنگم دەلەرزێت‌و دڵە خورپەكەم وەك دەهۆڵ سنگم دەكوتێت، بە ئینگلیزییەكی تێكشكاو دەڵێم نۆ ئنگڵش، كوردش ئۆڕ فرەنچ پلیس.. 

لە خەوەكەمدا ببوم بە گرێیەكی گەورە‌و لەنێو دەستەكانی ئاسماندا خەریك بوو دەكرامەوە، بەكرانەوەی دەزانم بەر كۆشی، بەر جەستەی، بەر باخی نەرماییە تەڕەكانی دەكەوتم

دەزانم پۆلیسە‌و دڵم بۆ حادیسە دەچێت، لەو لەحزەیەدا هەزار‌و یەك نەفرەت‌و جوێن بۆ خۆم‌و تەمەڵی‌و پشت كردنە ئینگلیزیم دەنێرم، سودی نییە..
پڵیس، پڵیس ئەو وشەیە بەهاورێكی تێكەڵ بە گریانەوە دەڵێمەوە هەر ئەوەندەم لەدەست دێت‌و لەپڕێكدا لەنێو قەبرێكدا خۆم دەبینم‌و نازانم چۆن بە چ زمانێك ئەوانەی سەرەوە تێگەیەنم كە من زیندووم خۆڵەكەی سەرم راماڵن، بەس من لەم لەحزەیەوە خۆڵی دنیا بەسەر چاوو ژیانی منەوەیە.. 
كابرای پۆلیسی ئینگلیز چەند قسەیە دەكات كە تەنها لە سۆرییەكەی تێدەگەم‌و تەلەفونەكە دادەخرێتەوە، هڵەو هلڵە‌و هڵاااااو پڕ بە ئاسمان‌و خودا‌و هەموو جڕو جانەوەر‌و بوونەوەرەكانی دنیا هاوار ئەكەم دەنگ نییە.

پاش كەمتر لە چارەكێك مۆبایلەكەم دووبارە زەنگ لێدەدات‌و هیچ ژمارەیە دیار نییە، گومانەكەم دەبێتە یەقین‌و دەزانم ئێستا پۆلیس ئیتر لە ژمارەی رەسمی خۆیانەوە زەنگم بۆ دەكەن، هڵەو ،، دەنگێك وەك ئەوەی باگردێك بەسەریدا كەوتبێت قورس‌و وەك نووزە كز دەڵێت سڵاو برا.. شاگەشكە‌و غەمگین دەڵێم سەرچاوان برا گیان، چی بووە تخوا؟ تۆ موتەرجمیت راستە؟ تكایە تكایە پێم بڵێ چی بەسەر ڤیڵدا هاتووە، دەنگەكە ئیستێك دەكات‌و بەڵێ من وەرگێڕم‌و لە پۆلیش دیپارتمێنتی سان ئەنتۆنیۆوە قسەت لەگەڵ دەكەم، دەڵێت برام بەسەبرو  خۆڕاگربە‌و من دەنگم دەمرێت، گوێم لە قرچەی ئێسكەكانمە كە لەنێو خۆیاندا دەكرتێن‌و وەك تیژایی بەردی شكاو لەگۆشتم دەچەقن، كابرا قسە دەكات‌و شی دەكاتەوە كە خانمێك لە ئەپارتمێنتی فێرئەوەی جی ٧ بە مردووی دۆزراوەتەوە كە خوێنێكی زۆر لەدەمی هاتووە‌و لەهیچ جێیەكەوە بە دەمانچە یان چەقۆ یان هەر شتێكی تر نەپێكراوە، ئێستا لەلایەن تیمەكانی پۆلیسەوە بەرەو نەخۆشخانە بەڕێ دەخرێت‌و هەموو جۆرە پشكنینێكی تەواو دەكەین تا بزانین هۆكار چی بووە‌و خۆی كوشتووە یان كوژراوە، بەڵام ئۆفیسەرەكە دەڵێت بەپێی پشێشبینییە سەرەتاییەكانمان بێت پتر لە رووداوی خۆكوژی دەچێت‌و من بەسەر سەگبابی‌و غرور‌و نا مەردی‌و دڵڕەقی‌و دەبەنگی خۆمەوە دەگریم م  هاوار دكەم‌و دەڕشێمەوە، هاوار دەكەم‌و دەڕشێمەوە‌و سەرم بەر خۆم دەكەشم‌و دەگریم.. سەرم بە سەلاجەكەدا هەموو خواردن‌و خواردنەوەكانی ناوی بەسەر خۆمدا دەكەم، دەچمە سەر فەیس بووكە نەفرەتییەكەم‌و دوایین پۆستی خۆم لەسەر كار‌و چالاكیی‌و شان‌و شەوكەتی شكاوی خۆم دەسڕمەوە‌و دەنووسم بە دڵێكی زەلیل‌و زمانێكی شكاوەوە مەرگی خۆم، مەرگی دەنگی خۆم ڤیڵدای نازدارتان پێ رادەگەیەنم، شاشەی لاپتۆپەكە بەتووندی شكاندی دادەدەمەوە، ئیتر كارم بە دنیا‌و میدیا‌و لێبوكەكانی ناوی خۆ نمایش كردن نییە، ڤیڵدا كوشتمی، ئەو لە مردنیشیدا لە من ئازاتر‌و چەكەكانی لە بێدەنگی‌و سەگبابی من بەهێز تر بوو، وەك سێكسەكانمان كە هەمیشە خەوی لە چاوی من دەزڕاند‌و بۆخۆشی بە راحەتبوونێكی تێكەڵ بە گریانێكی مناڵانە كە لەسەدا هەشتای خۆشەویستیم بوو لەخۆشیا دەگریا‌و لەنێو چاڵایی شانم خەوی لێدەكەوت.

دەزانم پۆلیسە‌و دڵم بۆ حادیسە دەچێت، لەو لەحزەیەدا هەزار‌و یەك نەفرەت‌و جوێن بۆ خۆم‌و تەمەڵی‌و پشت كردنە ئینگلیزیم دەنێرم

ببورن شاعیرانە بوو، باڵام من چ زمانێكی تر بەڵەد نیم تا ئەم ژانەی پێ بگێڕمەوە، پیاوێكی گێژم، تەنیا لەنێوان وشەكاندا ئازام‌و لەمڕوەوە یاریزانێكی باشم، ڤیڵداش یەكەمین‌و دواهەمین ژن دەبێت كە گەرمترین‌و بەر تەڕترین شیعرەكانمی پێ نوسیم. ڤیڵدا كە لە ئەپارتمێنتی جەی ٧ی فێرەوەیدا منی كوشت‌و خۆشی بە كراسێكی كەتانی سپییەوە گۆرانی بۆ سەرۆك دەڵێت، مۆنرۆكەی ئیتر شیعر نانوسرێت.

لە دادگا نەمتوانی قسە بكەم، بەهەوڵی تاكە براكەم‌و هاوڕێ‌و دۆستەكانیشم نا، تەنانەت سایكۆلۆژیستەكە هەموو ئازاییەكەی لەوەدابوو توانی فرمێسكێكی نیو مەتر درێژتر لە چاوەكانم بێنێت.

حەوت شەو مانەوە لە بەشی دەروونی ئەو نەخۆشخانەیەدا حەوت ناخۆشترین دنیای دروست كراوی من بوو، كە تۆ‌و غەمەكانت پایەكانی خۆیان تیایا بەرزتر‌و بیرەكانی بیرەوەرییان قوڵتر دەكردەوە، ئاخر من دەتوانم زیاد لە ١١ هەزار ستایشی جوانیی تۆ بگێڕمەوە كە چاوم ئیتر لێیان بێبەش دەبێت، ١١ هەزا خۆشی تۆ كە وە سێو سوور‌و شیرین‌و لێوەكانت وەك بەرسیلە مزر بوون كە ئەوەندەت حەز لێبوون بەمناڵی چەندین جار لەسەر لێكردنەوەی بەرسیلەی مێوەكەتان لەلایەن دایكتەوە لێدانت خواردبوو، خۆ هەر خۆت بوویت بە رووە میهرەبان‌و شیرینی خەندە‌و چاڵی شەكری نێوان روومەتەكانتەوە بۆت دەگێڕامەوە، ئیتر بەرسیلەی هەموو مێوەكانی دنیا ناتوانم تامی بێ تۆییم بیر بەرنەوە.

حەوتەمین رۆژی مانەوەم لە خەستەخانە پێیان راگەیاندم كە ئۆفیسەری لێكۆڵەر خۆی هاتووە تا لەنزیكەوە بمبینێت‌و لەحاڵم ئاگادار بێت، هەرچییەك بێت نازانم بۆچی بوو چونكە نەمن لە زمانی ئەوم دەزانی‌و نەئەویش بە زمانەكانی من شارەزاییەكی هەبوو، بۆ ئیتر هەموو زمانەكانی دنیا چما دەیانتوانی دەربارەی من هیچ بڵێن؟ من بەڕاستی ئیتر مشتێك چڵ‌و چێو بووم‌و بەرگەی كۆكەیەكی قورسم نەدەگرت‌و حەزم دەكرد مردن لەیەكێك لەو حەبی خەوانەدابێت كە هەموو شەوێك لە ٨ ی ئێوارەدا دەرخواردیان دەدام.

ئۆفیسەر كوڕێكی قژ رەشی چاو سەوز، باڵا بەزر‌و خۆشڕوو دەردەكەوت، ئەو خۆشڕووییە دوورنبییە بەشێك بووبێت لە كارەكەی‌و تێكەڵەیەكیش لە سۆز‌و بەزەییەك كە من وەك چنگی گورگ دەمویست لە چاوەكانی دەری بێنم‌و پێی بڵێم لەگەڵ مردووێكدا ئیتر قسە ناكرێت. ئەو بەیانییە تەنها تۆزێك دانیشت‌و پەی بەوە برد بێدەنگی جوانترین زمانی ئاخاوتنە كەدەشێت لەو بێوانەدا رووبدات، رۆیشت.

بەیانی ژمارە حەوتە‌و بەخەونێك دەبێت بمرم،  حاڵم شڕ شڕەو بۆیەكەمجار دەرزی هێور كەرەوم لە دیمەنێكی هەروەك فیلماكانی سینەمادا بۆ بەكاردێنن، لەو فیلمانەی كە چەندینجار من‌و ڤیڵداكەم پێكەوە، لە فەرەنسا‌و میزۆری‌و سان ئەنتۆنیۆ لەسەر شاشەی سینەمادا سەر لەسەر شان تەماشامان كردبووم.

لە خەوەكەمدا ببوم بە گرێیەكی گەورە‌و لەنێو دەستەكانی ئاسماندا كە ڤیڵدابوو خەریك بوو دەكرامەوە، بەكرانەوەی دەزانم بەر كۆشی، بەر جەستەی، بەر باخی نەرماییە تەڕەكانی دەكەوتم كە بەماچێكی من بۆ مەلەی چێژێكی گەرم ئامادە دەبوون، لەنێوان هەستی بەربوونەوە ناو باوەشی ڤیڵدا‌و تەقەی بچوكی دەرگا  خەوبینین بە كەوتنە سەر رانی ڤیڵدا، بەر شێوەی بێڕەحم‌و سادری پەرستارە جاپانیزەكە كەوتم‌و راپەڕیم، بەهەموو هێزی خۆم هاوارم كرد بەسەریدا‌و لەوكاتەدا هەرچی بەدەممدا هات نەمگەڕاندەوە، لە جوێن لە سوكایەتی لە رەچم كردن، بو كورتی من چیتر نازم رەوشتی فۆتۆگرافەر نەبووم كە وێنەیەكی زیندووی ڤیڵدام بەهەموو حۆرییەكانی بەهەشتە جەهەنەممیەكەی محەمەدییەكان نەدەگۆڕییەوە.

پەرستارەكە جاپانیزەكە دێتە ژوورەوە‌و پێموایە هاتنەوەی دووبارەی جەنابی ئۆفیسەرم پێ رادەگەیەنێت، بەسەریا هاواردەكەم مەگەر من مەیموونم‌و ئەو كەیفی بە هەڵپەڕینم دێت؟ تەبعەن تێمناگات، منیش كە ئیتر من نیم‌و لەنێوان یانزەی شیرینی ڤیڵدادا تا ئەبەد ون‌و بەسەر یانزە هەزار یادەوەریدا ورد‌و خاش بووم. 

ڤیڵدا ژمارە یانزەی خۆشدەویست، ئەو ژنێك بوو لە ژمارە، ژمارە‌و كاتی هیچ روداێكی ژیانی لەیاد نەدەكرد، بێ تۆماركردنیش هەموویان لە زاكیرەدا نەقشیان بەستبوو، 11‪/‬2 رۆژی بەدنیاهاتنی‌و 11‪/‬11‪/‬2012 یش بەرواری یەكتر ناسینی ئێمە بوو، لەنێو شەمەندەفەرێكدا كە هەریەكێكمانی بۆ ئەدرەسێكی جیاواز دەبرد. ئیتر بە ئەڵمانیا‌و شەمەندەفەرەكانیشیدا گوزەر ناكەم.

حەوتەمین رۆژی مانەوەم لە خەستەخانە پێیان راگەیاندم كە ئۆفیسەری لێكۆڵەر خۆی هاتووە تا لەنزیكەوە بمبینێت‌و لەحاڵم ئاگادار بێت، هەرچییەك بێت نازانم بۆچی بوو چونكە لە زمانی ئەوم نەدەزانی

ئۆفیسەرەكه بێشتە ژوورەوە هەروەك جاری رابردوو تێدەگات‌و ‌ قەدری حاڵەتەكەم دەگرێت، خۆم ئاوا دەخڵافێنم.

بیركردنەوە لەوەی لەكوێم نازانم؟،  من تەنها ئەوەندەم لەبیرە براكەم وەك جانتا پێچامیەوە‌و ئێستا لە ئەمریكام، لە سان ئەنتۆنیۆ، بەڵام لە لەبەردەم ئەپارتمێنی j 7 دا نیم‌و ڤیڵدا بەخۆی‌و بۆنو بەرامەی قژی هەمیشە تەڕ‌و سورییەوە چاوەڕێم ناكات، لێرەم لەبەشی دەروونی نەخۆشخانەی مێرسی لە نهۆمی دووەم لە چاوەڕوانی هیچدا پاڵكەوتووم.

لەكوێ بووم؟ ئها، پەرستارەكە دەكەمە دەرەوە، دەچمەوە ناو خۆم، لەناو ڤیڵدادا نقووم بووم، ئەو چركەساتانە رووداوەكان عەقڵیان لەدەست دەدەن، ئاگام لەكار‌و ناوبانگ‌و چالاكی‌و نمایشەكانم‌و گیرفان پڕ كردنەكانم نییە، دەست بۆخۆم دەبەم‌و تۆ نادۆزمەوە، پارچە پارچە جلەكان لەخۆم دادەكەنم دەستم دەبەمەوە ناو خۆم، ئەندامی نێرینەم دەبینم‌و وەك مارمێلكەیەكی نەرمی پێكرا‌و بەسەر دەستمدا شۆڕبۆتەوە‌و تاكە ئەنداممە كە دەشێ بەر لەدڵم مردبێت، ئۆفیسەرەكە دێتە ژوورەوە، من تەواو بووم.

تێبینی‪:‬ بۆ كۆیاری برام..
كۆیار وەك من نەژی

من ڤیڵدام كوشت، تەنانەت ١١ مانگ بەرلەوەی ئەسڵەن بیر لەخۆكوشتن بكاتەوە، بۆیە بە مەرگی من هەرگیز غەمگین مەبە، ئاه هەر خۆم دەزانم دوایین رستەی جێهێڵدراوی ڤیڵدا دوایین پەیامی ئەو بۆ من‌و سڕینەوەی هەموو ژمارەكانی جگە لە من یانی چی، نا ڤیڵدای من، نا..