سلێمانى؛ پەردە لەسەر پەیکەرى جەمال نەبەز لادرا

پەیکەری د. جەمال نەبەز

ژیان:

لە مەراسیمێکدا لە شاری سلێمانی، پەردە لەسەر پەیکەری زمانزان و مێژوونووس و نووسەری کورد، پڕۆفیسۆر دکتۆر جەمال نەبەز لادرا، جەختیشکرایەوە، کە پێکهێنانی یەکێتیی کورد بکرێتە فاکتەری درێژەدان بە ڕێبازەکەی جەمال نەبەز.

پێشنیوەڕۆى ئەمڕۆ شەممە بە ئامادەبونى پارێزگار و ژمارەیەک لە هاوڕێیان و کەسوکار و بنەماڵەى جەمال نەبەز، لە هۆتێل فەرەحى شارى سلێمانى پەردە لەسەر پەیکەرى ئەو بیرمەند و نوسەرەی کورد لادرا.

پەیکەرەکە لەلایەن نیعمەت تۆفیق، خوشکی د.جەمال نەبەز جێبەجێکراوە و پەیکەرساز چێنەر نزار دروستیکردووە، لە بەردەم هۆتێل فەرەح-ی شاری سلێمانیدا دانرا، کە یەکێکە لە شوێنە کەلەپوورییەکانی سلێمانی و دەکەوێتە سەر شەقامی مەولەوی.

د. جەمال نەبەز كەسایەتییەكی دیاری نیشتمانی‌ و نەتەوەیی‌ و ئەكادیمی کوردە، لە كانونی یەكەمی ساڵی (1933) لەشاری سلێمانی دایك بوە، قۆناغەكانی خوێندنی لە سلێمانی تەواو كردوە و لە ساڵی (1950) له‌ زانكۆی به‌غدا، فیزیا و ماتماتیكی خوێندوه‌.

د. جەمال نەبەز خاوەنی خەرمانێكی دەوڵەمەندە لە بەرهەمی مێژویی‌ و ئەدەبی‌ و زانستی‌ و رۆژنامەگەری‌ و زمان و خزمەتی گەورەی بە كتێبخانەی كوردی كردوە و لە (8/12/2018) لە وڵاتى ئەڵمانیا کۆچى دوایی کرد.