دۆفرۆشەكە ئیتڵاعاتە، مجەوەرەكەش میتە


ژیان: حەمە نووری

لەچاوی ئێرەوە تەماشای هەولێر ودهۆك بكەین پڕە لە میتی تورك و پڕە لەجاسوسە سەر سورەكانی ئەتاتورك و پڕە لە لەندەهورەكانی ئەنقەرە ،لامان وایە لەوێ تەنانەت بەڕێوەبەری پۆستەی ئامیدیش سەربە میتە وبەرێوەبەری ئاوی هەریر ئەفسەری میتە و پرسگەكەی ئەوقافی زاخۆش بەسەری ئەتاتورك سوێند دەخوات، مجەوەرەكەی ئاكرێ ئیعاز و پەیامی لە ئەنقەرەوە بۆ دێت.پێچەوانە ببینەوە لەچاوی ئەوێیەوە تەماشای ئێرەی سلێمانی بكرێت ،وێنەكە لەبەرژەوەندی فارسە. واتەماشادەكرێت سلێمانی پڕەلە ئیتڵاعات ،ئێواران قاسم سولێمانی لەسەهۆڵەكە پیاسە دەكات،شەربەتفرۆشەكەی مەزادخانەكەی سەرەوە سەر بە قەرارگەیە و قەسابەكەی كانی پانكەش راستەوخۆ لەگەڵ قومدا پەیوەندی هەیە،چایچییەكی پێنجوین ئەفسەرێكی پلە بڵندی ئیتلاعاتە وحاجی كەریمی دۆفرۆشیش بۆ سیاسەت دۆ دەفرۆشیت لە دەربەندیخان گەرنا بەقەدەر ئایەتوڵایەك لە ئێران دەستی دەڕوات.

ئەوەی ئەم وێنەی دروستكردەوە كە ئیران لەسلێمانی خاوەن ماڵە وهەموان لێرە فایلی ئیتڵاعاتمان هەیە وتوركیش لە هەولێر تەراتێن دەكات و گەورە وگچكە هەویەی میتیان پێیە ،هاوڵاتیانی سادەنین ،بەڵكو قەڵەم بەدەست ورۆژنامەنوسە بەڕێزەكانە كە وێنەی جیاواز دەدەن بەشارەكان . 

بەشێك لەقەڵەم بەدەستەكانی ئێرە هەولێریان كردوە بە لانەی میت و بەشێك لەقەڵەم بەدەستەكانی ئەویش لایان وایە قاسم سولێمانی رەفیقی هەموو رۆژنامەنوسەكانە لە سلێمانی. لەگەڵ ئەمەشدا درۆیە بڵێن سلێمانی وهەولێر وهەڵەبجە و دهۆك لانەی میت و ئیتڵاعات نییە بەڵام دروستكردنی ئەو وێنە زەقە بۆ شارەكان وتەراتێتنی دەزگا سیخوڕییەكان تەنها لە خەیاڵاتی رۆژنامەنوسەكاندا هەیە ئەوەش ناگەڕیتەوە بۆ دڵسۆزی نەتەوەیی بەڵكو دەگەڕێتەوە بۆ بەرەی دابەشبونی رۆژنامەنوسان بەسەر رەنگەكان.

گەورە رۆژنامەنوس عەرەب هەیكەل دەنوسێت :لەدوای چوونی سادات بۆ تەلئەبیب ،لاشاوی پیاوی ئیسرائیلبوون لەناو میدیای عەرەبیدا دەستی پێكرد ،تەنانەت گەیشتە ئەوەی كە ئیسرائیل هەموو شتێكی خۆی بیرچووەتەوە خەریكی كڕینی رۆژنامەنوسەكانە بێ ئاگا لەوەی ئیسرائیل لای گرنگ نەبوو چی لەسەر دەنوسرێت چونكە دەیزانی عەرەب خۆی قەت یەك دەنگ نابێت .

جا ئیتڵاعات و میت چاكدەزانێت كورد چەند خێڵێكە ونە یەكدەگرێت ونە زاخۆییەك هەستی بەرامبەر سلێمانی هەیە ونە ئامێدییەك هەڵبجەییەكی خۆشدەوێت ئیتر بۆ بمانكڕن ،خۆمان خۆمان فرۆشتوە.




تۆڕی هەواڵی ژیان بەرپرس نییە لە ناوەڕۆکی ئەم نوسینە