ئەكزیما (بیرۆ) چییە


ژیان: شەیما

ئەكزیما (بیرۆ) یەكێكە لە باوترین نەخۆشییەكانی پێست‌و جۆرە هەوكردنێكی پێستە، كە درووست دەبێت لە ئەنجامی لاوازی بەشی سەرەوەی پێست، هۆكاری ئەو هەوكردنەش دەگەڕێتەوە بۆ ووشكی پێست یاخود بەركەوتنی ڕاستەوخۆی ئەو ماددانەی كە هۆكارن بۆ هەستیاری وەك سابوون یان بە هۆكارەكانی تری ژینگە. 

عەلی یوسف، پسپۆڕی نەخۆشییەكانی پێست‌و جوانكاری‌و چارەسەركردن بە لەیزەر بۆ ژیان، باس لە نەخۆشی ئەكزیما دەكات‌و دەڵێت"ئەكزیما (بیرۆ) نەخۆشییەكی زۆرباوە كەتووشی منداڵ‌و گەورە دەبێت، لە هەندێك جۆریدا لەتەمەنی خوار دوو مانگی دەردەكەوێت لە سەری منداڵی تازە لەدایك بوو بەشێوە قەتماغەیەك، لە هەندێك جۆری تری لە تەمەنی پیریدا دەردەكەوێت، زیاتر لەوكەسانەی كە بەهۆی نەخۆشی دڵ‌و گورچیلەوە بەشی خوارەوەی قاچیان دەئاوسێت‌و تووشی برین ووشكی دەبێت".

 باسی لەوەشكرد، بیرۆ بەتەنها نەخۆشییەكی گواستراوە نییە، بەڵام كاتێك كە نەخۆشییەكە بۆ ماوەیەكی درێژ بێ چارەسەر بمێنێت‌و هەوكردنی پێست‌و موو یان نینۆك ڕووبدات، لەوانەیە كەڕوو یان بەكتریا بگوێزرێتەوە بۆكەسانی تر. 

بەقسەی دكتۆر عەلی، دووجۆربیرۆ هەیە جۆرێكی ناوەكییە كە لە تەمەنێكی زووەوە تووشی كەسەكان دەبێت، هۆكاری سەرەكی ئەم جۆرە بۆماوەیی دەور دەبینێت لە دیاریكردنی جۆری پێستەكە ( ووشك بێت یان چەور)، جۆری دووەمیان دەرەكییە كە بەهۆی بەركەوتن تووشی كەسەكە دەبێت، كە باوترینیان بەركەوتنی ئا‌و‌و پاككەرەوەكانە كە لە دەستی خانمان وەك شەق بردن‌و برینی جۆرا‌و جۆر.

 ئەو پسپۆرە باسی لەوەشكرد، دروستبوونی بیرۆ لە بەشەكانی پێست بە پێی جۆری بیرۆكە دەگۆڕێت، بۆ نموونە كڕێشی سەر كە جۆرێكە لە جۆرەكانی بیرۆی چەور كە لەبەشەكانی سەرەوەی پێست دروست دەبێت، لە لایەكی ترەوە ئەو بیرۆیەی كەدروست دەبێت لە ئەنجامی بەركەوتنی چیمەنتۆوە لە دەستی هەندێك كەس دەگاتە خانەقوڵەكانی دێرمس‌و دەبێتە هۆی خوێن لێهاتن‌و ئازارێكی زۆر ئەگەر چارەسەر نەكرێت.

 دەربارەی خۆپاراستن‌و چارەسەركردنی دكتۆر عەلی وتیشی "گرنگترین ڕێگا بۆ چارەسەركردنی بیرۆ دروكەوتنەوەیە لە هۆكارە دەرەكیەكانی درووستبوونی بیرۆك، وەكو دوركەونتەوە لە بۆیەكردنی قژلەوكەسانەی كە هەستیاریان بە بۆیە پەیداكردووە، بەكارهێنانی دەست كێش‌و جزمەی تایبەت لەكاتی كاركردن بۆماوەیەكی درێژبە ئاو‌و پاككەرەوەكان،هەروەها بەكارهێنانی كرێمی شێداركەرەوە بۆ ئەو شوێنانەی كە ووشك بوونەتەوە بە هۆی بیرۆكەوە وەك‌و ڤازلین سیلاڤێكس یان زینك". 

پزیشكی پسپۆڕی نەخۆشیەكانی پێست‌و جوانكاری باسی لەوەشكرد، لەكاتی هەوكردن زۆرجار پێویست بە بەكارهێنانی كۆرتیزۆن دەكات بۆكەمكردنەوەی سوربوونەوە‌و بەكارهێنانی كرێمی تایبەتی دژە بەكتریا‌و دژە كەڕوو، لە كاتێكدا كە تووشبوون بە بەكتریا یان كەڕوو ڕوویدایان پشكنین لە لایەن پزیشكی پسپۆڕی پێستەوە پێویستە.