سۆران لە ناوچەیەكی گەشتیاری بۆ ناوچەی مەرگ

سۆران بەدەست خراپی رێگاوە دەناڵێنێت
رووداوێکی هاتوچۆ_ ئەرشیف

ژیان: هێما چۆمانی

دەیان ناوچەی گەشتیاری لەقەزاكانی سۆران، چۆمان‌و رواندز بوونی هەیە، بەڵام بەهۆی خراپی رێگاوبان بۆتە ناوچەیەك بۆر وداوی هاتوچۆو ناوچەی مەرگ.

عەلی محەمەد، گەشتیارێكی خوارو ناوەڕاستی عێراق لەهاوینەهەواری گەلی عەلی بەگ بۆ ژیان وتی "مخابن ئەو ناوچە گەشتیاریە ئەو رێگاوبانە خراپەی هەیە، پێویستە رێگاوبانەكان باشتر بكرێن بۆئەوەی گەشتیاری زیاتر روو لەوناوچەیە بكەن".

ئەو گەشتیارە باسی لەوەشكرد، هەموو رێگاكانی ئەو ناوچە گەشتیاریە یەك سایدی رۆیشتنن ئەمەش مەترسی لەروداوی هاتوچۆ زیادكردووە.

رۆژانە گوێبیستی روداوی هاتوچۆدەبین لەو ناوچەیە بەتایبەت لە رۆژانی هەینی كە گەشتیارێكی زۆر روو لەوناوچەیە دەكەن.

لایخۆشیەوە دلاوەر لەتیف، بەڕێوبەری پەیوەندیەكان لە بەڕێوبەرایەتی هاتوچۆی سۆران بۆ ژیان دەڵێت، لەگەڵ ئەوەی سنووری قەزای سۆران، چۆمان, مێرگە سۆرو ڕواندز ناوچەیەكی گەشتیاریە‌و هاتوچۆی زۆر لەسەر ئەم ڕێگایانەیە، بەڵام وەك پێویست بایەخ بەم ڕێگەیە نەدراوەو ڕوداوی هاتوچۆی زۆری تێدا ڕوودەدات‌و سەرەڕای ئەوەی ڕێگایەكە بۆتە هۆی دەستكەوتنی داهاتێكی زۆر بۆ كوردستان بە گشتی.

باسی لەوەشكرد، روداوەكانی هاتوچۆ لەم سنوورە زیادیكردووە لە سەرەتای مانگی حەوتی ئەمساڵ بە بەراورد بە مانگی حەوتی ساڵی پار، بەشێوەیەك ئەمساڵ 10 روداوی هاتوچۆ رویداوە‌و شانزە كەس بوونە قوربانی، لەبەرامبەردا ساڵی رابردوو 7 ڕووداوی هاتووچۆ رویدانوە.

وتەبێژی هاتوچۆی سۆران هۆكاری زیاد بوونی ڕوداوەكان دەگەڕێنێتەوە بۆ خراپی ڕێگاكان، بەجۆرێك هەموو رێگاكان یەك سایدن‌و چاڵ‌و چۆڵی زۆریان تێدا دروست بووە، بەهۆی ئەوەی هیچ نۆژەنكردنەوەیەك نەكراوە.