حاكم زاملی: قومار خانەكانی بەغداد بوونەتە شوێنی سپی كردنەوەی پارە


ژیان: 
ئەندامێكی پێشووی ئەنجومەنی نوێنەران ئاشكرای دەكات قومار خانەكانی بەغداد بووەتە شوێنی سپی كردنەوەی پارەی خەڵكە گەندەڵەكانی ناو هێزە ئەمنیەكان و حەشدی شەعبی. 

حاكم زاملی، ئەندامی لیژنەی ئاسایش و بەرگری لە خولی پێشووی ئەنجومەنی نوێنەرانی عێراق، رایگەیاند: لەو هۆڵانەی یاری رۆڵێت دەكرێت، بڕێكی زۆری پارە سپی دەكرێتەوە. پێویستە رێكاری پێویستیان لە هەمبەر بگیرێتە بەر و رێگری لە سپیكردنەوەی پارە تێیاندا بگیرێت.

ماڵپەڕی بەغداد ئەلیوم لەزاری ناوبراو باسی ئەوەشی كردووە، پێش رووخانی بەعس، ئەو هۆڵانەی رۆلێتیان تێدا دەكرا، بردنەوە و دۆڕاندن لەسەر فیشە بوو. براوەكان فیشەكانیان دەبردە بانكی ناوەندی و پارەكەیان وەردەگرت. ئەو پارەی قوماری پێوە دەكرا، زۆر سنووردار بوو. بەڵام ئێستا بە سەدان ملیۆن دۆلار بەهەدەر دەدرێت و ئەوەش پرۆسەیەكی ئاشكرای سپیكردنەوەی پارەیە.

ئەو لەبارەی پێناسی ئەو خەڵكانەوە ئاشكرای دەكات كە  ژمارەیەكیان بانگەشەی ئەوە دەكەن كە سەر بە حەشدی شەعبی بن لەناو هێزە ئەمنییەكانیش خەڵكانێك هەن كە پارەیان لە بازرگانیكردن بە نەوت و ماددە هۆشبەرەكان و چەكەوە دەستدەكەوێت. 

زاملی باسی ئەوەشی كرد ئەو پارانەی لە بازرگانی چەك و هۆشبەر و نەوت دەستیان دەكەوێت هۆڵانەی یاری رۆلێت و قومارخانەكاندا سپی دەكەنەوە.