گرنگترین ڕووداوەكانی ئەمڕۆی جیهان


ژیان: سەنگەر سەید قادر

تۆڕی هەواڵی ژیان كورتەی هەواڵەكانی سەر ئاستی جیهان كۆ دەكاتەوە و بە رونكردنەوەیەك كورت لەگەڵیدا بۆ خوێنەرانی دەگوازێتەوە.


١- ئێران بە حیزبوڵا هەڕەشە لە ئیسرائیل دەكات: حسین سەلامی فەرماندەی گشتی سوپای پاسداران ڕایگەیاند حیزبوڵا ئەزمونێكی زۆر لە شەڕی سوریا دا بەدەسهێناوە و بەتەنها توانای لەناوبردنی ئیسرائیلی هەیە

٢-حەسن ڕۆحانی سەرۆك كۆماری ئێران ڕایگەیاند بونی ئەمەریكا ناوچەكەدا سەرچاوەی بەرهەم هێنانی تیرۆرە و كۆكردنەوە و ناردنی هێزی ئەمەریكی بۆ كەنداوی عەرەب تەنها بۆئەوەیە ئەمەریكا دەیەوێت گیرفانی وڵاتانی كەنداو خاڵی بكاتەوە و بیان دۆشێت

٣-- ئیمارات ڕایگەیاند حوسیەكان بەكرێگیراوی ئێرانن: ئەنوەر گرگاشی وەزیری ئیمارات بۆ كاروباری دەرەوە ڕایگەیاند سەردانی وەفدی باڵای حوسیەكان بۆ ئێران و كۆبونەوەیان لەگەڵ خامەنەئی بەڵگەیەكی ڕوونە كە وەك بەكرێگیراوی ئێران كاردەكەن

٤--توركیا بنكەیەكی سەربازی نوێ لە قەتەر دەكاتەوە: ڕۆژنامەی حوریەتی توركی ڕایگەیاند توركیا بنكەیەكی سەربازی نوێ لە ناوچەی خریفی قەتەر دەكاتەوە و هێزێكی زیاتر ڕەوانەی قەتەر دەكات ئەمەش دەبێتە دووەم بنكەی سەربازی توركی لە قەتەر دوای ئەوەی لە ساڵی ٢٠١٧ لەكاتی گەمارۆدانی قەتەردا توركیا بنكەی سەربازی تارق بن زیادی لە قەتەر كردوە

٥- لە ماوەی ٤ ساڵدا ١٥ كۆگای چەك و تەقەمەنی حەشدی شەعبی تەقیوەتەوەو دەیان كوژراو برینداری لێكەوتوەتەوە و پەرلەمانی عێراقیش داوا دەكات سەربازگەكان ببرێنە دەرەوەی شارەكان

٦- بەپێی ڕاپۆرتی ڕۆژنامەی وۆڵ ستریت جۆرناڵ بەنتاگۆن لێكۆڵینەوەكانی لە كوژرانی سەربازێكی لە موسڵ دەستپێكردوە كە بەشێوەیەكی گوماناوی هەفتەی ڕابردوو لەكاتی هاوكاریكردنی سەربازانی سوپای عێراقدا كوژراوە

٧- سوپای سوریا بە هاوكاری سوپای ڕوسیا لە پیشڕەویەكانی لە پارێزگای ئیدلب و حەما بەردەوامە و هەردوو شارۆچكەی مەتحەنات و تەل عیسای ستراتیژی لە ئیدلب كۆنترۆڵ كردوەتەوە و گەشتوەتە دەروازەی شاری خان شەیخونی پێگەی سەرەكی بەرەی نوسرە

٨-لە كەمپی عین حلوەی ئاوارەكانی فەلەستین لە لوبنان پێكادان لە نێوان چەكدارانی بزوتنەوەی فەتح و ڕێكخراوی عەسەبەی ئەنساردا ڕویدا بەهۆی كوژرانی سەركردەیەكی عەسەبەی ئەنسارەوە ئاڵۆزی دروست بووە

٩- لە تونس دەسەتەی هەڵبژاردنەكان ٦٦ كاندیدی لە كۆی ٩٧ كاندیدی هەڵبژاردنی سەرۆك كۆماری دورخستەوە بە هۆی نەبوونی مەرجەكانی خۆ كاندید كردنەوە

١٠- بەریتانیا دەستگیركردنی هاوڵاتیەكی بەریتانی ڕاگەیاند لەلایەن ئێرانەوە بە تۆمەتی سیخوڕی كردن و داوای كرد هەرچی زووە ئازاد بكرێت

١١-چین داوای لە ئەمەریكا دەكات سنوری خۆی نەبەزێنێت: وەزارەتی دەرەوەی چین ڕایگەیاند پێویستە ئەمەریكا دەست بەلوتیدا نەكات لە هۆنگ كۆنگ و سنوری خۆی نەبەزێنێت چونكە پرسی هۆنگ كۆنگ پرسێكی ناوخۆی چینە و ڕێگە بە ئەمەریكا نادەن دەستێوەردان بكات و سوپای چینیش ڕێگەی لە دوو كەشتی سەربازی ئەمەریكی گرت بچنە هۆنگ كۆنگ، ئەم وەڵامەی چین دوای هەڕەشەكەی دوێنێی ترەمپ هات كە ڕایگەیاند چین هێزی جوڵاندوە بەئاراستەی هۆنگ كۆنگ و ئەوەش چین دەخاتەبەردەم مەترسی

١٢-مەترسی هەرەس هێنانی ئابوری جیهان: بانكی فیدراڵی ئەمەریكا ڕایگەیاند قەرزەكانی ڕەهنی خانوبەرە لە ئەمەریكا ڕێژەی پێوانەی تێپەڕاندوە و گەشتوەتە ٩ ترلیۆن. ٤٠٠ ملیار دۆلار كەئەمە زۆر لەو ڕێژەیە زیاترە كە ساڵی ٢٠٠٨ بووە هۆی داڕمانی ئابوری جیهان

١٣- عیمران خانی سەرۆكی پاكستان وەك تەحەدایەك ڕایگەیاند سەردانی كشمیر دەكات و لە پرسی كشمیردا تا كۆتایی ئامادەین بجەنگین و پیویستە هندستان هەڵەكەی ڕاست بكاتەوە و بڕیاری هەڵوەشاندنەوەی حوكمی زاتی كشمیر هەڵوەشێنێتەوە

١٤- محمد ئال شێخ ی نوسەری دیاری سعودی داوای كرد ڕێگە نەدرێت فەلەستینیەكان حەج بكەن چونكە پێ نەزان و ئاژاوە گێرن لە ساڵی ١٩٧٠ لوبنان میوان داری كردن شەڕی ناوخۆیان بەرپاكرد و ئەردەن میوانداری كردن دواتر ڕووبەڕوی سوپای ئەو وڵاتە بونە ئەوان تەنها ئیسرائیل دەزانێت 
چۆن مامەڵەیان لەگەڵ بكات

١٥- لە سوماڵ لە بنكەیەكی سەربازی سوپای سوماڵ دوو ئۆتۆمبیل تەقینەوە و دەیان سەرباز كوژران و بریندار بوون، بزوتنەوەی گەنجانی سوماڵی باڵی قاعیدە بەرپرسیارێتێ خۆی لە هێرشەكە ڕاگەیاند

١٦- لە ئەفغانستان لە هێرشێكی تاڵیباندا بۆسەر چەند بنكەیەكی هیزەكانی پۆلیس شەش چەكداری تاڵیبان كوژران، ئەمەش دوای ئەوە دێت 
دوینێ ئەمەریكا كۆتایی قۆناغێكی نوێی دانوستانەكانی لەگەڵ تاڵیبان راگەیاند.