دوو كەس بە تۆمەتی سوتاندنی خێمەی ئاوارەكان دەستگیردەكرێن

یەکێک لەو کەمپانەی سووتێندرا

ژیان: کەرکوک ناو

تەنیا لە هەفتەیەكدا چوار جار ئاگر لە كەمپی ئاوارەكانی چەمشكۆ لە پارێزگای دهۆك كەوتۆتەوە، بە تۆمەتی سوتاندنی كەمپەكەش دوو كەس دەستگیردەكرێن.

فەیسەڵ عەلی، دانیشتوی كەمپی چەمشكۆ، بە (كەركوك ناو)ی وت "روداوی یەکەم بەهۆی شورتی کارەباوە بوو، من خۆم نزیك بووم لە شوێنی كەوتنەوەی ئاگرەكە، 17 خێمە بە تەواوی سوتان، بەڵام روداوەکانی دووەم، سێیەم و چوارەم، گوماندەکرێت بە ئەنقەست بێت".

بێوار عەبدولعەزیز، لێپرسراوی بەشی راگەیاندن لە بەڕێوەبەرایەتی بەرگری شارستانی دهۆک بە(کەرکوک ناو)ی وت "بەداخەوە لە روداوی ئاگركەوتنەوەی چوارەمدا کاتێك تیمه‌کانی ئێمه‌ گەیشتنە كەمپەكە، بەشێك لە خەڵكی ناو كەمپەكە رێگرییان دەكرد لە چونی ئۆتۆمبێلەكانمان بۆ لای ئاگرەكە".

وتیشی "ئێمەش گوماندەكەین خۆیان ئاگر لە خێمەكانیان بەربدەن بۆ ئەوەی له‌ جیاتی خێمه‌ لە هەمان شوێن بە بلۆك شوێن بۆ خۆیان دروستبكەن".

هاوکات، مه‌ئمون یه‌حیا، به‌ڕێوه‌به‌ری که‌مپەكە، بە (كەركوك ناو)ی وت "دوو که‌سمان به‌ تۆمه‌تی سوتاندنی خێمه‌کان له‌لایه‌ن پۆلیسی که‌مپه‌وه‌ ده‌ستگیرکراون و ڵێکۆڵینه‌وه‌یان له‌گه‌ڵدا دەكرێت".

ئەو وتیشی "راسته‌ هه‌موو خێمه‌کان به‌ شۆرتی کاره‌با نه ‌سوتاون، ئێمه‌ش گومانمان هه‌یه،‌ به‌ڵام تاوه‌کو به ‌ته‌واوی نه‌زانین کێ ئه‌م کاره‌ی کردووه‌ ناتوانین په‌نجه‌ی تۆمه‌ت بۆ هیچ که‌سێک درێژ بکه‌ین".