یاسا جێبەجێكردن

کورتەچیرۆکی عەگیدی کەوادرێژ لە چایخانەی حەمە قۆری
عەگیدی كەوادرێژ: قوربان لەو دوو كرێكارە كامیان كوردە ئەوەیان بێگوناهە!

ژیان: نەبەز گۆران

ماڵمان لەرەحیم ئاوابوو، لەبەر بێئیشی نا، لەبەر تەمەڵی بەیانی تا ئێوارە لەچایخانەكەی حەمە قۆری خۆش دادەنیشتم. ئەم چایخانەیە جمەی دەهات لەخەڵكی وەك من. عەگیدی كەوادرێژ یەكێك بوو لەو پیاوانەی لەشەبەقی بەیانییەوە تا ئێوارە لەسوچێكی چایخانەكە دادەنیشت، خۆی كردبوو بە هەڵهێنەری هەرچی مەتەڵی دونیایە. (بەینی خۆمان بێت، لێشی دەزانی‌و هیچی لەدەست دەرنەدەچوو.) 

واباوە كەلەچایخانە دادەنیشی، باسی هەمووشتێكی ئەم دونیایە بكەی، تەنها شتێك باسی ناكەیت تەمەڵیەكان‌و بێئیشییەكانی خۆتە. (هەرمیلەتێك چایخانە‌و تەزبیحی زۆری تیابوو، ئەو میلەتە بێئیشترین میلەتە.) 

واباوە كەلەچایخانە دادەنیشی، باسی هەمووشتێكی ئەم دونیایە بكەی، تەنها شتێك باسی ناكەیت تەمەڵیەكان‌و بێئیشییەكانی خۆتە

بازۆر باسی شتەكان نەكەم، رۆژێك دەمەو چێشتانگان، حاكم فەریدی سەربۆیاخكراو، بەهەڵەداوان خۆیكرد بە چایخانەكەدا. بەروخساریدا دیاربوو زۆر شێوابوو، فایلێك لەبن دەستی‌و هەركە دانیشت داوای چاییەكی كرد. پێمسەربوو حاكم هاتووەتە چایخانە. (كێشە نییە لای خۆمان هەمووشتێك ئاساییە، تەنانەت ئاساییە حاكم ببێتە شاگردی چایخانەش!) ئەو پیاوە كەڵەگەتە وا پەشۆكابوو شانوملی شل بووبوونەوە، رەنگی سپی هەڵگەڕابوو، بەدەم چاخواردنەوە زوو زوو فایلەكەی دەكردەوە‌و سەیرێكی دەكرد‌و دایدەخستەوە و، لەتەنیشت خۆی دایدەنا. وامزانی بەس من سەرنجی دەدەم، تومەس زۆربەی خەڵكەكە هەستیان بەو شێواویەی كردووە. وەك عادەتی هەمیشەی خۆی، عەگیدی كەوادرێژ لەوسەرەوە سەری هەڵداو پرسی: ئەرێ‌ جەنابی حاكم بۆ پەشۆكاویی؟

حاكم بەخێسەیەكەوە سەیرێكی كردو وابزانم جوابی نەداوە.

دیسان پرسی: ئەرێ‌ برام ئێرە چایخانەیە خۆ دادگا نییە، شتێك بڵێ‌ بزانم بۆت چارە ناكەم.

حاكم: كاكە ئەمە خۆ مەتەڵە پوچەكان نیین، تۆ هەڵیبێنی، ئەمە كێشەی یاساییە، ئیشی تۆنییە دەستوەردەیتە یاساوە.

عەگید كەوادرێژ: ئێ‌ خۆی یاسا مەتەڵە. هەركەسێك كلیلی پێبێت دەرگاكە دەكاتەوە. 

حاكم: سەرێكی راوەشاند‌و بێدەنگ بوو.

هەرمیلەتێك چایخانە‌و تەزبیحی زۆری تیابوو، ئەو میلەتە بێئیشترین میلەتە 

هەرچۆنێك بێت عەگیدی كەوادرێژ تەنگی پێهەڵچنی‌و ئەویش فایلەكەی گرت بەدەستییەوە‌و لەداخا وەك وتاربێژی خۆپیشاندەرێك هەڵسایە سەرپێ‌و بەنابەدڵییەوە بەدەنگی بەرز وتی: جەنابی كەوادرێژ بفەرموو بزانم هیچ تێدەگەیت.

كێشەیەكی یاسایی هەیە. كێشەكە ئەمەیە.

خاوەن ماڵێك دوو كرێكار دەهێنێت دیواریان پێدروستبكات. دوو كرێكارەكە پێكەوە دیوارەكەیان دروستكردووە. دوای رۆژێك دیوارەكە روخاوە بەسەر خاوەن ماڵەكەدا‌و كوشتویەتی، خاوەنانی كوژراوەكە داوای یاساییان تۆماركردوە، تۆ لەشوێنی من بیت لەو دوو كرێكارە كامیان بەتاوانبار دەزانیت‌و كامیان بێتاوان؟ لەكاتێكدا بە پێی شاهیدەكان‌و بەپێی وتەكان هەردووكیان وەك كرێكار بەژدارن لەدروستكردنی دیوارەكە. تۆ حاكم بیت هەردووكی تاوانبار دەكەیت؟ یان یەكیان تاوانبار دەكەیت؟ 
كە چیرۆكەكەی گێرایەوە هەموومان كەوتینە بیركردنەوەوە، راستیدەكرد دەبێت كامیان بێتاوانبێت‌و كامیان تاوانبار؟! كەچی لەم حەپەسان‌و بێدەنگیەی چایخانەكەدا، عەگیدی كەوادرێژ هەتا هێزی تیابوو بە دەنگە ناخۆشەكی قاقایەكی لێدا!

حاكم: ئەوە بەچی پێدەكەنیت كەوادرێژ؟!

عەگیدی كەوادرێژ: قوربان زۆر ئاسانە

حاكم: ئاسانییەكە لەچیدایە؟

عەگیدی كەوادرێژ: قوربان دڵنیام زۆر ئاسانە.

حاكم : سەر مەخە سەرم تكایە، ئاسانییەكەی لەچیدایە.

عەگیدی كەوادرێژ: قوربان لەو دوو كرێكارە كامیان كوردە ئەوەیان بێگوناهە!

حاكم: یانی چی؟

خاوەن ماڵێك دوو كرێكار دەهێنێت دیواریان پێدروستبكات. دوو كرێكارەكە پێكەوە دیوارەكەیان دروستكردووە. دوای رۆژێك دیوارەكە روخاوە بەسەر خاوەن ماڵەكەدا‌و كوشتویەتی

عەگیدی كەوادرێژ: قوربان حەپەسانی ناوێت كوردەكە بێگوناهە، چونكە بەبیانوی دەستوێژ‌و میزكردنەوە ئیشی نەكردوە‌و خۆی دزیوەتەوە. ئیتر بۆچی خۆت تێكدەدەین، برۆ یاسا جێبەجێبكە‌و كوردەكە بەردەو ئەویتر دەستگیركە چونكە تاوانبارەو، وەسەلام.