وەزیری دارایی پێشوو رێگایداوە بە نایاسایی پەتاتە بێتە هەرێمەوە


ژیان:  
پەرلەمانتارێكی گۆڕان ئاشكرای دەكات كە وەزیری پێشوی دارایی كە لە پشكی حزبەكەی بوو رێگای داوە بە نایاسایی پەتاتە بێتە هەرێمی كوردستانەوە و دەڵێت وەزیری كشتوكاڵ ئەو پڕۆسەیەی راگرتووە. 

دابان محەمەد، ئەندامی پەرلەمانی كوردستان لە فراكسیۆنی گۆڕان، چەند نوسراوێكی بڵاو كردەوە دەڵێت"لە كاتێكدا جوتیاران لەبەر ساغ نەبونەوەی بەرهەمەكانیان، ڕۆژانە زیانێكی زۆر دەكەن و بەشێكیان بەرهەمەكانیان فڕێدەدەن، بەڵام وەزیری پێشوی دارایی ڕێگای داوە بە هاوردەكردنی هەزاران تۆن لە بەروبونی دەرەوە بە نایاسایی و بەخشتنی لە گومرگ".

هەرچەندە نوسراوەكە بەڕەزامەندی لیژنەیەك بووە و رێگا دراوە بە هاوردەكردنی پەتاتەی تایبەت بە دروستكردنی جپس، ئەو پەرلەمانتارە دەڵێت "لە كاتی پێگەیشتنی بەرهەمی ناوخۆیی نیشتمانی، ڕێگا دراوە بە هاوردەكردنی 5 هەزار تۆن پەتاتە، كە ئێستا تەنی ناوخۆ بە 350 دینارە".

پەرلەمانتارەكەی گۆڕان كە وەزیری دارایی پێشوو لەسەر پشكی بزوتنەوەكەی بووە وەزیر بەڵام دواتر بووە پارتی باسی ئەوەشی كردووە "ئەم ڕێگاپێدانە بە بێ ئاگاداری لایەنی پەیوەندیدار كراوە، كە وەزارەتی كشتوكاڵە و هیچ وێنەیەكی نوسراوەكەیان بۆ نەنێردراوە".

دابان ئەوەشی راگەیاندووە "نوسراوەكانمان داوە بە وەزیری نوێی كشتوكاڵ، بڕیاری داوە ڕایگرێت و پرۆسەكە هەڵوەشێنێتەوە، لەبەر ئەوەی زیانی بە جوتیاران و بەرهەمی ناوخۆش گەیاندوە، وەك فراكسیۆنی گۆڕان كەیسەكەمان داوە بە داواكاری گشتی و دەستەی نەزاهە تا لە ڕوی یاساییەوە ڕێكاری پێویست بگرنە بەر".