ئەمەریكا بەشداری شەڕی قەندیل‌و پەكەكە دەكات؟

گەریلا

ژیان: ئەنوەر حسێن (بازگر)
بەشی چوارەم

-رۆژی 17/7/2019 بەراگەیاندنی (كەجەكە) كەسەرحەد ڤارتۆ لێپرسراوی پەیوەندییەكانیان لەبۆردومانەكنی فرۆكەی توركیا گیانی لەدەستداوە، هەر لەهەمان ڕۆژدا 17/7/2019 رووداوی هێرشكردنە سەر جێگری كۆنسوڵگەری لەهەولێر‌و كوشتنی، ئەگەرچی د. باهۆز ئەرداڵ بێ ئاگایی پەكەكەی راگەیاند، بەڵام دەستخۆشی لەكارەكتەرە كرد، ئەگەرچی لێكۆڵینەوەكانی ئاسایشی هەرێم پەكەكەی بەرپرسیار لەو كارە، بارودۆخەكە تەواو دژوارتر دەركەوت، كەپێناچێت بەهێواشی دابمركێتەوە، واتا هەموو ئاماژەكان باس لەشەڕێكی توند‌و گەرم دەكەن.

بەپێی لێدوانی د. باهۆز ئەرداڵ ئەندامی بەرمانداری (HPG) ئەو كەسەی كورژاوە لەهەولێر میت بوو نەك دبلۆمات‌و سەرپەرشتی كارەكانی میت‌و ئۆپراسیۆنەكانی دژی پەكەكە كردوە، بەڵام بێ ئاگایی حزبەكەشی لەو كوشتنە دەربڕی. 

لەئێستادا هیچ كام لەئاماژەكان باسی بەشداری واشنتۆن لەشەڕی قەندیلدا ناكەن‌و بگرە بێ دەنگیش نابن

هەندێك سەرچاوە باس لەوە دەكەن، كوشتنی ئەم بەرپرسەی توركیا، رەنگە بیانویەك بێت بۆ رێگا خۆشكردنی توركیا بۆ هێرشكردنە سەر پەكەكە‌و وەكو ئەوەی دژی كەمپی مەخموور دەستی دایە بۆردومانی كەمپەكە، بەڵام تا ئێستا دیار نییە رووداوەكە چۆن روویداوە، كەئایا پەكەكە بەرپرسیارە یان بێ ئاگایە. 
ئاماژەكان دەڵێن "خراپی پەیوەندییەكانی توركیا‌و واشنتۆن هیچ یارمەتیدەر نییە بۆ هەلكردنی چرای سەوزی واشنتۆن بۆ هاوكاری ئەنكەرە، بۆیە ئەنكەرە پەلامارەكانی دەستپێكردە تا بڵێ گەر واشنتۆن هاوكاریش نەبێت، ئەوكارە هەر دەكات"، بەڵام چەند فاكتەر ئاماژەن بۆ فشار لەسەر ئەنكەرە‌و گوێ نەدان بەهەڕەشەكانی ئەنكەرە:

یەكەم: پشتیوانی بەردەوام‌و ناردنی چەك‌و كەلوپەلی سەربازی بۆ هێزەكانی سوریای دیموكرات (هەسەدە) لەرۆژئاوای كوردستان، رێگری لەداخڵبوونی ئەنكەرە لەگرێ سپی، دروستكردنی ناوچەی ئارام كەرەچاوی داخوازییەكانی هەسەدە دەكات.

دووەم: گوێ نەدانی واشنتۆن بەهەڕەشەكانی توركیا‌و نیگەرانییەكانی پارتی دیموكرات، بەبوونی هێزەكانی پەكەكە لەشەنگال‌و كەمپی مەخمور. بەچرای سەوزی عێراق‌و ئێران.

سێیەم: ناردنی مەسج‌و پەیامی واشنتۆن بۆ پژاك لەپەیوەست بەكێشەكانی ئێرانەوە لەپاڵ دیموكرات‌و كۆمەڵە، مەسجێكن ناڕاستەوخۆ پشتیوانییە لەپەكەكە.

ئەمەریكا دەزانێت كەپەكەكە لەجەمسەری نەیارەكانی خۆیەتی، بەڵام نەدەست لەپەكەكە هەڵدەگرێت نە لەئەنكەرە

چوارەم: سەرەڕای هەموو ئەوانە، بەڵام هێشتا مانای ئەوە نییە، واشنتۆن پشتگیری سیاسەتەكانی پەكەكە دەكات، وەكو چۆن بەڕەسمیش دژایەتی خۆی لەگەڵ سیاسەتەكانی ئەنكەرە بەتەواوەتی دەرنەبڕیوە، یان هێشتا بڕیاری جددی نەداوە بۆ دژایەتی ئەنكەرە، چونكە گەر ئەو كارەیكرد راستەوخۆ یارمەتی پەكەكە دەدات‌و لەلیستی تیرۆر دەریدەكات‌و چەكی پێشكەوتووی پێدەدات، بەڵام لەبەرامبەر سەرەڕۆییەكانی توركیادا، هێشتا پەكەكەی وەكو گوشار داناوە.

راستە واشنتۆن گەمارۆی ئابوری كاریگەری داناوە‌و ڕۆڵی هەیە لەدابەزینی نرخی دراوی توركی‌و نیگەرانی نزیكبوونەوەی لەمۆسكۆ‌و قەتەر، دەخالەتی لەلیبیا، تاكڕەوی، رێز نەگرتنی مافی مرۆڤ، زیندانی پەرلەمانتاران‌و دژایەتی لەگەڵ گوللەن، كارتی فشاری واشنتۆن.
بەڵام زۆر جاری تر پەیوەندییەكانی واشنتۆن‌و تاران بەمشێوەیە خراپبوە، لەگەڵ روودانی ئاڵوگۆڕی ناوچەیی‌و رووداوگەلی گەرم‌و گرنگ واشنتۆن ڕووی لەئەنكەرە كردۆتەوە.

بۆیە لەئێستادا هیچ كام لەئاماژەكان باسی بەشداری واشنتۆن لەشەڕی قەندیلدا ناكەن‌و بگرە بێ دەنگیش نابن، كەئەمە لەقازانجی پەكەكەیە، بەڵام ڕەنگە فاكتەرێك كەزۆر گرنگە وابكات واشنتۆن ڕوو لەئەنكەرە بكاتەوە‌و بەشدار بێت یان نەخشەڕێژ بێت لەپەلاماردان یان چاوپۆشی لەكۆنتڕۆڵی قەندیل، ئەگەری شەڕی ئێران‌و ئەمەریكایە، كەئاماژەكان زۆرن بۆ ئەو شەڕە.

ئەوەی شەڕی قەندیل‌و كۆنتڕۆڵكردنی دواخستوە، نەبوونی چرای سەوزی ئەمەریكایە

ئەمەریكا باش دەزانێت پەكەكە، هێزێكە چەندە دژی بیت، بەڵام جاروبار مەیلیت بەلایدا دەچێت، بەتایبەتی كەزۆر پەرجوو دروستدەكات‌و هێزەكانی وەك ئەمەریكا دەخاتە ژێر كاریگەری خۆیەوە.

مەسەلەن پەیەدە گەورەترین هێز بوو كەلە كۆبانی‌و رۆژئاوا پەرجوی نواند دژی داعش، یان هەسەدە بوو بارەگای سەرەكی داعش لە(رەقە) گرت‌و (١٠) هەزار چەكداری داعشی دەستگیركردووە كەبەشێكیان هاوڵاتی ئەوروپین. ئەوە كارێكە بەعێراق، ئێران سوریا‌و تەنانەت هاوپەیمانی نێودەوڵەتیش نەكرابوو.
بۆیە ئەمەریكا ئەو وێنە گشتییەی لەبەر چاوە ئەوەش دەزانێت كەپەكەكە لەجەمسەری نەیارەكانی خۆیەتی (تاران، بەغدا، دیمەشق..)، بەڵام بەو بارودۆخەشەوە نەدەست لەپەكەكە هەڵدەگرێت. نە لەئەنكەرە.

ئەمەریكیەكان ڕوو بەمیدیا دەڵێن: ئێمە مامەڵە لەگەڵ پەكەكە ناكەین.

هیچ راستی تێدا نییە، چونكە جەمیل بایك هاوسەرۆكی (كەجەكە) بەخۆمی وت: ئەمەریكا هاتونەتە قەندیل، ئەوەش دەزانین كەئەمەریكا شەش مانگ جارێك دەچێتە قەندیل‌و هەموو ئاڵوگۆرییەكی زانیاری لەنێوانیاندا هەیە.

كوشتنی بەرپرسەكەی توركی لەهەولێر بیانویەك بوو بۆ توركیا هێرش بكاتە سەر قەندیل وەك چۆن هێرشی كردە سەر كەمپی مەخمور

جیا لەوەی واشنتۆن دەزانێت جیا لەپەكەكە، نە (پەیەدە) نە (پژاك) نە (هەسەدە) كەسێ هێزن واشنتۆن یارمەتیان دەكات، بڕیار‌و ئینیرژی لەپەكەكە‌و خودی عەبدوڵڵا ئۆجەلان وەكو كارێزمای خۆیان دەناسن، ئەوەش دەزانێت لیستی یارمەتی‌و چەك‌و كەلوپەلی سەربازی كەدەگاتە رۆژئاوا، رۆژی دواتر لەقەندیلە‌و قەندیل بڕیار دەدات، كێ فەرمانداری هەسەدە یان پەیەدەیە.

بەڵام لەگەڵ ئەوەشدا. ئەمەریكا نایەوێت لەرووی میدیا ئەم روەی خۆی نیشان بدات.

بۆیە ئاماژەكان دەڵێن، ئەوەی شەڕی قەندیل‌و كۆنتڕۆڵكردنی دواخستوە، نەبوونی چرای سەوزی ئەمەریكا‌و رێگرییەكانییەتی.

بەڵام ئەمە مانای ئەوە نییە، ئەنكەرە ئەم خەیاڵەی لەمێشكی خۆی دەركردووە.