ژنانی داعش بۆمبێكی تەوقیت كراو


ژیان: شاناز هیرانی
دوای ئەو شكستە گەورەی بەر رێكخراوی داعش  كەوت لەدواین حەشارگە‌و موڵگەكانیان لەباغوزی سوریا‌و موسڵ لەعێراق، كە دواتر بوە هۆی رادەست بونی سەدان چەكداری ئەو گروپە‌و زیندانی كردنیان. ژنان‌و منداڵانی داعشیش ڕەوانەی كەمپی هۆل كران لەشاری حەسەكە، بۆ ئەوەی دواتر بدرێنە دادگا بەهۆی تێوەگڵانیان بەچەندین تاوانی تیرۆریستی‌و پاشان بریار دان لەچارەنوسیان بەتایبەتی ئەو ژنانەی لەڕۆژهەڵات‌و رۆژئاوای جیهانەوە هاتون‌و وڵاتەكانیان جارێكی تر ئامادە نین ئەو ژنانە وەربگرنەوە، چونكە بەمەترسی هەژماریان دەكەن بۆ سەر ئاسایشی وڵاتەكانیان‌و ناهێڵن جارێكی تر تێكەڵاوی كۆمەڵگەكانیان ببنەوە. بەو پێیەی تاكی زیان بەخشن.

ئەو ژنانە كەمپەكانیان كردووە بەئیمارەتێكی ئیسلامی لەبری ئەوەی هیچ جۆرە پەشیمانیەك نیشان بدەن لەسەر هاتنیان بۆ ناو خاكی خەڵافەت‌و مەسەلەی جیهاد كردن‌و بون بەداعش. ئەو ژنانە دەزگایەكیان دامەزراندووە بۆ ئەو ژنانەی خۆیان پێیان دەڵێن (ژنانی گوناه بار)‌و كردویانە بەبنكەیەك بۆ پلان‌و جێبەجێكردنی كردەوە تیرۆریستی دژی پاسەوانان‌و بۆتە ناوەندێك بۆ هاندانی چەكداران دژی هێزەكانی سوریا دیموكرات. لەلایەكی تریش بۆتە شوێنی بڵاوكردنەوە‌و زیندووكردنەوەی بیروباوەڕی توندڕەوی. 

هاوكات لەگەڵ خراپبونی بارودۆخی ژیان لەناو ئەو كەمپانە‌و نەبونی ئاوی پاك‌و چاودێری تەندروستی‌و تەزوی كارەبا، هەروەها نەدۆزینەوەی چارەسەرێك بۆ ئەو دۆخەیان، كەمپەكە وردە وردە بۆتە مۆ‌ڵگەیەكی تیرۆریستی‌و خاكێكی بەپیت بۆ بەرهەمهێنانی نەوەیەكی توندڕەو‌و رق لەدڵ بەرامبەر هەموو شتێك، بۆ تۆڵە كردنەوەی لەوانەی بونەتە هۆكاری مردنی كەسێكی نزیكیان، یان هۆكاری ئەو گوزەرانەی خراپەی ئەوان تێیدان.

بەم دوایانە تەوژمی هەڕەشەكان لەناو كەمپەكە زیاتریش بوون، هەروەها لایەنگرانی داعشیش لەتۆڕە كۆمەڵایەتیەكان زیاتر گرنگی بەو بابەتە

بەم دوایانەش تەوژمی هەڕەشەكان لەناو كەمپەكە زیاتریش بوون، هەروەها لایەنگرانی داعشیش لەتۆڕە كۆمەڵایەتیەكان زیاتر گرنگی بەو بابەتە دەدەن‌و هەڵمەتی جۆراوجۆر دەكەن بۆ ئازاد كردنیان.

یەكێكیش لەمەترسیدارترین نمونە لەتۆمارێكی ڤیدیۆدا دەردەكەوێت كاتێك ژمارەیەك كچ‌و ژنی باڵاپۆش دروشمی داعشیان بەرز كردۆتەوە‌و یەكێكیان داوا لەئەبو بەكر بەغدادی دەكات (فیداكار‌و خۆ بەخشان) ئامادە بكات بۆ ڕزگاركردنیان. خۆشیان بەبۆمبێكی تەوقیت كراو وەسف كرد كە هەركاتێك بێت جیهان گوێی لەدەنگیان دەبێت‌و ئەوەی لەداهاتووش بەڕێوەیە زۆر گەورەیە...

چەند رۆژێكیش لەمەوبەر، لەگرتەیەكی ڤیدیۆیدا ژمارەیەك منداڵ هەڕەشەی (پان كردنەوەی سەری هەڵگەڕاوان)‌و گێڕانەوەی ناوچەكانیان دەكەن. هەر لەگرتەیەكی تریشدا ژمارەیەك منداڵ ئاڵای داعش بەرز دەكەنەوە‌و هاوار دەكەن (ئێمە دەمێنینەوە).

هەر بەم دوایانەش چەندین نامە بەزمانی ئینگلیزی نوسراون لەلایەن ئەو ژنانە‌و داوای ئازادكردن‌و ئەنجامدانی كردەوەی تیرۆریستی دەكەن لەوڵاتانی رۆژئاوا.

هەر بەم دوایانەش چەندین نامە بەزمانی ئینگلیزی نوسراون لەلایەن ئەو ژنانە‌و داوای ئازادكردن‌و ئەنجامدانی كردەوەی تیرۆریستی دەكەن لەوڵاتانی رۆژئاوا. لەنامەیەكدا كە لەكەناڵی (بلاد الحرمین الاسیرە) بڵاوكرایەوە‌و گرنگی بەدۆسیەی ژنانی داعش دەدات، ژنێك دەڵێت: (باوەڕداران لەهەموو شوێنیك دەرگای ئەشكەنجە بكەنەوە بەسەر كافرەكان‌و ببنە گورگ‌و شێری دڕندە بۆ دوژمنەكانتان، مەخەون‌و مەخۆن تۆڵەی براو خوشكەكانتان بكەنەوە لەشام‌و عێراق). 

ئەم كردەوە‌و چالاكیانە ترس‌و نیگەرانیەكی زۆری لای چاودێران دروست كردووە لەگەڕانەوەی داعش. زۆر كەسیش پێی وایە گەر ئەو جۆرە چالاكیانە بەردەوام بن، ئەوا توندوتیژی پەرە دەسەنێت‌و نەوەیەكی یەكجار دڕندە پەروەردە دەبێت لەسەر دەستی ئەو ژنانە. بۆیە هەرگیز كەس بەوە ئاسودە نەبێ گەر پێمان وابێت داعش كۆتایی هاتووە، بەڵكو ئەوانە بۆمبی تەوقیت كراون‌و چاوەڕێن لەكات‌و ساتی خۆیاندا بتەقنەوە بەڕووی هەموو جیهان بەگشتی. پێویستە ئەو ژنانە چارەسەر بكرێن لەڕووی دەرونیەوە. منداڵەكانیان بەشێوەیەكی تەندروست گەورە بن‌و دوور بخرێنەوە لەژینگەی تیرۆر‌و توندڕەوی. ببنە تاكی بەسود بۆ كۆمەڵگە‌و بۆ خۆیان. نەك  بێچوە گورگ‌و دواجار هەر كاتێك بۆیان بلوێت پەلامارت بدەن. دۆزینەوەی میكانیزم‌و ڕێگە چارەی گونجاو بۆ ئەوەی جارێكی ئەو ژنانە‌و منداڵەكانیان ژیانیان خۆش بوێت‌و چیتر بیر لەرق‌و كینە‌و تۆڵە كردنەوە نەكەنەوە.