هۆشیار عەبدوڵا: رێككەوتن لەگەڵ پارتی جێگەی ئومێد نیە

بەدەمەوەچوون نیە‌ بۆ پڕۆژە یاسایی چاكسازی
هۆشیار عەبدوڵا

ژیان: هەڤاڵ غالب 
هۆشیار عەبدوڵا، ئەندامی لیژنەی دارایی پەرلەمانی عێراق لەفراكسیۆنی گۆڕان وەڵامی پرسیارەكان دەداتەوە‌و ئاماژە پابەند نەبوونی پارتی دیموكراتی كوردستان دەكات تایبەت بەجێبەجێكردنی رێككەوتنەكان، هەروەها دەشڵیت، نیگەرانین كەبەدەمەوەچوون نیە‌ بۆ پڕۆژە یاسایی چاكسازی.

ژیان: گۆڕان بریاریدابوو لەماوەی یەك مانگدا یاسایی چاكسازی تێپەڕێنێت، بۆچی تێنەپەڕێنرا؟

هۆشیار عەبدوڵا: ئەوەی كەگرنگە بۆ گۆڕان جۆرێك لەچاكسازی لەلیستی موچەی فەرمانبەران بكرێـت، بۆ ئەوەی بەشێوەیەك رێكبخرێـتەوە كەكێشەی تیانەبێت‌و پارێزگاری لەسەروەت‌و سامانی گشتی بكرێت، مانگانە لەكاتی خۆیدا موچە بدرێت، ئەو لیستەی ئێستا ناوی دووبارە‌و بندیواری تێدایە، لەخولی رابردوودا بزووتنەوەی گۆڕان كاری لەسەر پرۆژە یاساكەكردووە، بەڵام یەكێتی‌و پارتی زۆر جدی نەبوون لەسەر تێپەراندنی، لەرێككەوتنی پاتی‌و گۆڕان، پارتی دیموكرات جدی بوو لەسەر ئەوەی یاسایی چاكسازی لەسەرەتای ئەو یاسایانە بێت كەبەخێرای پەسندبكرێت، ئێمە ئێستا نیگەرانین كەبەدەمەوەچوون نیە‌و لیژنەی بۆ پێكهێنراوە كۆنەبووەتەوە، بەشێكی لای یەكێتیە‌و دەتوانێـت رۆڵێ‌ هەبێت، بەشێكیشی لای پارتیە كەئیدارە‌و ئیرادەی پەرلەمانی لایە. یاساكە بۆ گۆڕان گرنگە‌و خەمێكی گشتیە‌و جۆرێك لەعەدالەتی كۆمەڵایەتی تێدایە.

 بەداخەوە بەهۆی ناوەخت لەدەست چوونی هەردوو سەركردە ( مام جەلال‌و كاك نەوشیروان )نەتوانرا ئەوەی ئومێدی بۆ دەخوازرا بێـتەدی

ژیان:  وەك خۆت باست كرد یاساكە پەسندنەكرا، هەنگاوی داهاتووی گۆڕان چی دەبێت؟

 هۆشیار عەبدوڵا: ئەو یاسایە هیچ پاساوێك نیە بۆ ئەوەی تێنەپەڕێنرێت، كەخواستێكی جەماوەری بەرفراوانی لەسەرەو بۆ باشكردنی بارودۆخی موچەیە، حكومەت ناتونێت بەردەوام بێت تا لیستێكی پاكی موچەی نەبێـت، لەخولی رابردوودا ئەم هەموو پروپاگەندەی بۆ بایۆمەتری كرا كۆمەڵێك خۆیان كردبوو بەپاڵەوان كەدەتوانن لیستی موچە چاك بكەن، بەڵام نەیانتوانی، بۆیە خواستی گۆڕان بۆ تێپەراندنی یاسایی چاكسازی‌و پاككردنەوەی لیستی موچە وەك خۆی دەمێنێتەوە. یاساكە پێداویستیەكی حوكمڕانی رەشیدە، پێویست بوو یەكێـتی‌و پارتی زیاتر سوربن لەسەری، بەڵام ئەوان لەرابردوودا سەرپێچی گەورەیان كردووە لەلیستی موچە‌و دامەزراندن.

ژیان: گۆڕان رێككەوتنی لەگەڵ پارتی هەیە تاچەند گەشبینی بەجێبەجێكردنی ئەو رێككەوتنە؟

هۆشیار عەبدوڵا: رێككەوتنەكان لەگەڵ پارتی نەك لەم سەردەمە لەسەردەمی شاخیش زۆر جێگەی ئومێد نەبوون، بەوپێیەی پارتی بەشێوەی سەربەخۆی مامەڵە دەكات لەگەڵ رێككەوتنەكان، ئەو بەشە جێبەجێ دەكات كەلەبەرژەوەندی خۆیەتی، خۆی دەدزێـتەوە لەوبەشەی كەلەبەرژەوەندی ئەو نیە، لەم سەرەتایەدا پارتی لەرووی نەوت‌، موچە‌و بەخشینەوەی پلەوپۆست ئاماژەیەكی دڵخۆشكەری نەگەیاندووە، من لەسەرەتای ئەم رێككەوتنەوە زۆر گەشبین نەبووم، بەڵام دواتر ئێمە پابەندبووین پێیەوە بەبریاری بزوتنەوەكە تا ئەوكاتەی دەگاتە كۆتایی یان گرفتی تێدادروست دەبێـت، بەلامەوە گرنگە چاودێری بكرێت، من بۆ خۆم پێم وایە پارتی لەم سەرەتایەوە كۆمەڵێك ئاماژەی نیشانداوە كەجدی نیە لەرێككەوتنە بەتایبەت لەدۆسیەی نەوت، كەپێویستە وردبین‌و گۆڕانكاری ریشەی تیا بكرێت، بەڵام ئەوان وادەزانن ئێمە بەرگری لەعێراق دەكەین. دۆسیەی نەوت تەنها رادەستكردنی نیە بەبەغداد، لەهەرێم تاوانی گەورە بەدۆسیەی نەوتەوەكراوە، هاوكێشەی سیاسی پێ گۆڕاوە، میدیای پێ قۆرخكراوە، ویژدانی خەڵكی پێكڕدراوە بەپارەی نەوت مەكتەب سیاسی‌و سەركرایەتی‌و راگەیاندنی گەورە كڕدراون، بۆیە كۆمەڵێك "فشەكەری قەومی" ئەوانەی سنگ دەردەپەرێنن‌و ئێمە بەبەرگری كاری عێراقی عروبە دەزانن‌و خۆیان بەكوردێكی پاك دەزانن، بەشێك لەمانە نەك مێژووی نەتەوە مێژووی خۆشیان دەفرۆشن، تیایاندایە تەمەنی لەحزبێكی وەك یەكێـتی بەسەر بردووە ئێستا بووەتە بوخی پارتی‌و فشەی قەومیمان بەسەردا دەكات، بۆیە دەبێـت مەلەفی نەوت بەنیشتمانی بكرێـت‌و داهاتەكەی دیاربێت. لەماوەی رابردوودا كورد نەوتی فرۆشتووە‌و قەرزاربووە واشی كردووە یەك حزبی سیاسی زاڵ بێت، هەروەها میدیایەكی نەوتی سیاسی‌و كۆمەڵایەتی دروستكردووە كەبووتە هۆی هەڵوەشاندنەوەی ئەخلاقی كۆمەڵگە‌و قۆرخكردنی گۆڕەپانی سیاسی كەهەمووی بەپارەی نەوت كراوە. دەربارەی موچەش ئێمە دەمانەوێت هەموو عێراق یەك سیستەمی مووچەیان هەبێت كەبەدەستوریش هەروایە، بەڵام پارتی‌و یەكێـتی ئەوەیان ناوێت، چونكە خۆیان وەك كارتی فشار بەكاری دەهێنن‌و كێیان بووێت دەستكاری ناونیشانی ئیداری دەكەن‌و دەیكەن بەراوێژكار‌و وەزیر. دەربارەی بەخشینەوەی پلە‌و پۆست پێمان سەیرە سەرۆك وەزیران هەر رۆژە‌و یاریدەدەرێك بۆ خۆی دادەنێت ئەمە بەچ یاسایەك دەكات، با یەكێك لەیاساییەكانی پارتی پێمان بڵێت مەسرور بارزانی، بەچ دەسەڵاتێك رۆژانە یاریدەدەرێك بۆخۆی زیاد دەكات، خۆ سەرۆك وەزیران حاكمی موتڵەق‌و دیكاتۆرنیە كێی بوێت دایبمەزرێنێت‌و لایبەرێـت ئەوە بەیاسا دەكرێت، ئەوەی جێی تێڕامانە یەكێـتی بەرووحێكی وەرزشی وەریدەگرێـت، جێگری سەرۆكی حكومەت یەكێـتیە دەبێـت هەڵویستی هەبێت، گۆڕان هەڵوێستی خۆی لەو رووەوە راگەیاندووە‌و نیگەرانە. نیگەرانین لەوەی بڕیاربوو یەك یاریدەدەر بۆ سەرۆك وەزیران هەبێـت بۆ كاروباری چاكسازی‌‌و بەیاسا كارەكانی بكات، ئەوەی دەكرێـت بەڵگەیە بۆ ئەوەی كەنیەتی چاكسازی راستەقینە نیە.

ئێستاش دەتوانن بەشێوەیەكی لۆژیكی كاری پێكەوەیی لەگەڵ یەكێتی بكەین 

ژیان: واتا پێتان وایە دانانی ئەو كەسانەی پێشتر گۆڕان بوون بە یاریدەدەری سەرۆك وەزیران بۆ هەراسانكردنی گۆڕانە؟

هۆشیار عەبدوڵا: وەك باسم كرد بریاربوو یەك یاریدەدەری سەرۆك وەزیران هەبێـت‌و بەیاسا دەسەڵاتەكانی رێك بخرێت، بەڵام بێگومان لەهەڵبژاردنی ئەم دەم‌و چاوانەدا دیارە كەپارتی هاوكاری بزوتنەوەی گۆران ناكات، چونكە دانانی هەندێك دەم‌و چاو بێ رێزی كردنە بەهەندێك پلە‌و پایە. زۆر گرنگە لەكاتی رێككەوتن متمانە دروست بێت، بەڵام پارتی بەبێ منەتی مامەڵە دەكات‌و ئەوەش كاریگەری سلبی دەبێـت‌و بەرپرسیاری سەرەكیش لەم كەیسەدا پارتیە.

ژیان: دەوترێت گۆڕان لەسنوری سلێمانی شەڕی وەكالەتی پارتی دەكات لەگەڵ لایەنەكانی تر دەكات؟

 هۆشیار عەبدوڵا: ئەمە رەنگە جۆرێك بێت لەپروپاگەندەی حزبی‌و بەتایبەت یەكێـتی، رێككەوتنی گۆڕان لەگەڵ پارتی بێ ئومێد بوونی گەورە بوو لەیەكێـتی، لەماوەی رابردوودا‌و زیاد لەخولێكی پەرلەمانی گۆڕان هیچ فرسەتێك نەما نەیدات بەیەكێـتی دواتر ئەنجامەكانمان بینی لەهەڵبژاردنی پەرلەمانی عێراق‌و كوردستاندا چۆن مامەڵەی لەگەڵ گۆڕان كرد، هەموو هێزێكی سیاسی مافی ئەوەی هەیە لەقۆناغێكدا خۆی بگونجێنێت لەگەڵ ئەو زەمەنە، قۆناغی ئێستای گۆڕان جیاوازە لەسەردەمی كاك نەوشیروان، بێگومان ئێستا ئەوكاتەنیە كەنەوشیروان مستەفا بەهێزێكی زۆرەوە گۆڕانی بەرێوە دەبرد، موئامەرەكانی سەڕگۆران تا ئێستاش بەردەوامن‌و ئێمە زیاد لەسیناریۆیەكمان لەبەردەست بوو بۆ خۆپاراستن، مێژوی پەیوەندییەكانی نێوان یەكێتی‌و گۆران دور‌و درێژە، بەداخەوە بەهۆی ناوەخت لەدەست چوونی هەردوو سەركردە ( مام جەلال‌و كاك نەوشیروان )نەتوانرا ئەوەی ئومێدی بۆ دەخوازرا بێـتەدی ئەمەش مانای ئەوە نیە ئەمە كۆتایی مێژوو بێـت، ئێستاش دەتوانن بەشێوەیەكی لۆژیكی كاری پێكەوەیی بكەن بەبێ ئەوەی لەسەر حسابی ئەم‌و ئەو بێـت. نزیكبوونەوەی لەهەركام لەیەكێتی یان پارتی ئەوی تریان بەدژایەتی خۆی دەزانێـت ئەمەش چەندجارێك بەسەر گۆڕاندا هاتووە، لەماوەی رابردوودا رێككەوتنێكمان لەگەڵ یەكێـتی كرد پارتی بەئاشكرا وتی، ئەمە دژی منە‌و هەوڵیدا لەرێگەی پرۆپارتیەكانی ناو یەكێتیەوە ئەو رێككەوتنە بنێژێت، ئێستاش كەگۆڕان لەگەڵ پارتی رێككەوتنی هەیە بەشێك لەیەكێـتی ئەوە بەدژایەتی خۆی دەزانێت. بۆیە پێویستە لەپێناوی پەیوەندییەكان‌و نزیكی جەماوەری‌و لەپێناوی سلێمانی‌و ئاوەدانكردنەوەی ئەم سنورەدا وتارێكی واقعی‌و لۆجیكی لەهەردوولا(یەكێتی‌و گۆڕان) هەبێـت، لەم رووەوە گۆڕان نیەتباشی خۆی نیشانداوە‌و چەندجارێك داوای كۆبونەوەی سێ قۆڵی كردووە.

گۆڕان نیگەرانە لەم هەموو یاریدەدەرە

ژیان: بەو پێیەی ئەندامی لیژنی دارایی پەرلەمانی عێراقیت، ئێوە لەبەغدادن، خوێندنەوەتان بۆ رێككەوتنەكانی نێوان هەرێم‌و بەغداد‌و موچەی فەرمانبەران‌و بودجەی هەرێم چیە؟

 هۆشیار عەبدوڵا: شێوازی ئیدارەدانی مەلەفی نەوت بەم شێوەی ئێستا هەمیشە مەترسیە بۆسەر موچەی فەرمانبەرانی هەرێم‌و تێنەگەیشتنە لەكاری دەوڵەت، ئەوان داوای چوارچێوەی عێراقی فیدراڵ دەكەن داهاتیش ناگەڕێننەوە. راستە لەعێراق زۆر گەندەڵی هەیە، بەڵام پێویستە كاربەدەستانی هەرێم كۆمەڵێك فاوڵی گەورە نەكەن‌و دواتر گلەیی لەخەڵكی تر بكەن وەك ئەوەی لەریفراندۆم كردیان، بەریفراندۆم گەورەترین خزمەتی دەسەڵاتدارانی عێراقیان كرد گەورەترین دیاریان بەخشیە حەیدەر عەباد، سەرۆك وەزیرانی پێشووی عێراق دواتر گلەیی ئەوەیان دەكرد عێراق توندتیژی بەكارهێناوە، لێرەدا خۆت فرسەتت داوەتێ هەڵەی گەورەت كردووە هەموو كۆمەڵگای نێودەوڵەتیت كردووە بەگژی خۆتدا، بۆیە بۆ ئەوەی مەترسی لەسەر موچە‌و بودجە نەبێـت دەبێت شەفافیەت هەبێـت‌و داهاتی نەوت‌و ناوخۆدیاربێت، لەرابردوودا یەكێـتی‌و پارتی بەشی زۆری داهاتیان بردووە‌و بەو پارەی لەبەغدادیش هاتووە بۆ هەرێم.

ژیان: ئەو وەفدانەی بۆ رێككەوتن دێنە بەغداد ( هونەری‌و باڵا) پرس‌و راوێژ بەئێوە‌و ئەندامەكوردەكانی لیژنەی دارایی دەكەن؟

 هۆشیار عەبدوڵا: تا ئەم ساتە وەختە هەماهەنگی لیژنەی دارایی پەرلەمانی عێراق لەگەڵ هەرێمی كوردستان زۆر لاوازە، بەشێكی ئەوەیە لەهەرێمی كوردستان تێگەیشتن نیە بۆ كاری ئێمە، هەرێمی كوردستان زۆرجار وامامەڵە دەكات كەعێراق بەشێك بێـت لەهەرێم خۆشیان بەگەورەتر دەزانن، لەعێراق پەرلەمانتار پلەكەی وەك وەزیرە، لەماوەی رابردوو ئەو وەفدەی سەردانی سەرۆكی حكومەتیان كردبوو لەرووی پرۆتۆكۆڵەوە هیچ جۆرە رێزێك نەبووە لەجێگری سەرۆكی پەرلەمان‌و ئەندامەكان، ئەمەش كارێكی خراپە ئەمانە هەرچەندە رووكەشن، بەڵام مانایەكی قوڵی هەیە، ئەگەر نەتەوێـت لەشتێك تێبگەیت واتە ناتەوێـت دانپێدانانی پێ بكەیت، بەڵام لەكاتی بودجەدا زمانیان شیرین دەبێـت‌و دێنە سەرخەت، بۆیە پێویستە بەشێوەیەكی دەوڵەتیانە مامەڵە بكەن، بەم غرورە سیاسیەش كەبەتێنەگەیشتن لەدەوڵەتداری دروست بووە ناگەن بەهیچ.

لەهەڵبژاردنی ئەم دەم‌و چاوانەدا وەك یاریدەدەر، دیارە كەپارتی هاوكاری بزوتنەوەی گۆران ناكات

ژیان: ئێوە وەك ئەندامە كوردەكانی لیژنەی دارایی تا ئێستا چ رۆڵێكتان بینیوە بۆ نەهێشتنی مەترسی لەسەر مووچەی فەرمانبەران؟

هۆشیار عەبدوڵا: ئێمە وەك ئەندامە كوردەكانی لیژنەی دارایی توانیومانە یاسای بودجەی ساڵی‌ 2019 پەسند بكەین، هەموو ئەوانەی هاتوون بۆ گفتوگۆ دەزانن ئێمە بەتەبایی‌و تێگەیشتنەوە توانیومانە بڕگەی (ج) لەمادەی 10 تێپەرێنین، ئێستا بەهۆی ئەو بڕگەیەوە ماوەی ساڵێكە موچە دێت، هەوڵیش دەدەین بۆ بودجەی ساڵی 2020 بەهەمان شێوە ئەم ئەركە جێبەجێ بكەین، بەڵام پێویستە ئێمە هەڵوێستمان بەهێز بكرێت، ئێستا ئێمە هەڵوێستمان لاوازە، لەساڵی رابردوودا بەلێنمان داوە رێژەیەك لەنەوت بنێرین بۆ سۆمۆ(كۆمپانیای نیشتمانی بەبازاڕكردنی نەوتی عێراق)، بەڵام هەرێم نەیناردووە‌و ئەم نەناردنە گورزی گەورەی لەهەریم داوە، هەرچەندە من لەگەڵ ئەوەنیم بەم شێوەی ئێستا حكومەتی هەرێم بەهیچ شێوەیەك كۆنترۆڵی مەلەفی نەوت بكات، چونكە مەلەفەكە مەلەفێكی نیشتمانی نیە‌و مەلەفێكی حزبی‌و خێزانی رووتە، ناشەفاف‌و ناروونە، نەك تەنها خەڵكی ئاسایی‌و هەتا بەشێك لەبەرپرسان لەیەكێـتی‌و لەگۆڕان پارتیش زانیاری لەسەر نەوت نیە‌و نازانن پەیوەندییەكان لەگەڵ توركیا چۆنە لەسەر نەوت‌، وەك كۆڵانێكی تاریك وایە كەس زانیاری لەسەر نیە، تەنها گروپێكی كەم نەبێـت.

 ژیان: ئێوە وەك ئەندامە كوردەكانی لیژنەی دارایی تا ئێستا چ رۆڵێكتان بینیوە بۆ نەهێشتنی مەترسی لەسەر مووچەی فەرمانبەران؟

 ئێمە وەک ئەندامە کوردەکانی لیژنەی دارایی توانیومانە یاسای موازەنەی ساڵێ‌ 2019 تێپەڕێین هەموو ئەوانەی هاتوون بۆ گفتوگۆدەزانن ئێمە بە تەبایی و تێگەیشتنەوە توانیومانە برگەی ج لە مادەی 10 تێپەرێنین ئێستا بە هۆی ئەو بڕگەیەوە ماوەی ساڵێکە موچە دێت ، هەوڵیش دەدەین بۆ موازەنەی ساڵی 2020 بەهەمان شێوە ئەم ئەرکە جێبەجێ بکەین  بەڵام پێویستە ئێمە هەڵوێستمان بەهێز بکرێت ، ئێستا ئێمە هەڵوێستمان لاوازە ئیمە لە ساڵی رابردوودا وەعدمان داوە نسبەتێک لە نەوت بنێرین بۆ سۆمۆ بەڵام هەرێم نەیناردووە و ئەم نەناردنە گورزی گەورەی لە هەریم داوە و جگە لەوەی هەڵوێستی ئێمەی لاوازکردووە بێ متمانەیی خۆی زیادکردووە ، لەماوەی رابردوودا حکومەتی هەرێم زۆر هەوڵی داوە فرۆشتنی نەوتی هەرێم بە یاسایی بکات دۆسیەکە لە مەحکەمەی ئیتحادییە ، ئەگەر 250هەزاریان رادەست بکردایە ئەوا بەشیوەیەکی زمنی حکومەتی عێراق ئیعترافی بە مامەڵەی باقی نەوتەکە دەکرد لەلایەن هەرێمەوە چونکە ئەو تەنها 250 هەزای کردبۆیە ماڵ ، هەرچەندە من لەگەڵ ئەوەنیم بەم شێوەی ئێستا حکومەتی هەرێم بەهیچ شێوەیەک کۆنترۆڵی مەلەفی نەوت بکات چونکە مەلەفەکە مەلەفێکی نیشتیمانی نیە و مەلەفێکی حزبی و عایلی رووتە ، ناشەفاف و ناروونە ، نەک تەنها خەڵکی ئاسایی و هەتا بەشێک لە بەرپرسان لە یەکێـتی و لەگۆران پارتیش زانیاری لەسەر نەوت نیە و نازانن پەیوەندییەکان لەگەڵ تورکیا چۆنە لەسەر نەوت و وەک کۆڵانێکی تاریک وایە کەس زانیاری لەسەر نیە تەنها گروپێکی کەم نەبێـت، بۆیە لەپێناوی خەڵکی هەرێمی کوردستان دا پێویستە گۆرانکاری ریشەیی بکرێت . نەوت توانیویەتی موعادەلەکە بگۆرێت پارتی کە خاوەنی 45 کورسیە و موقەدەراتی ئەم هەرێمەی بەدەستە بەهۆی مەلەفی نەوتەوە بووە ، لاوازی رۆڵی لایەنەکانی تریش بەهۆی ئەوەوەیە کە کۆنترۆڵی نەوتیان لەلانیە.

جیاواز لەوە ئەو میدیایانەی کە رۆڵیان هەبووە لەسەر هۆشیارکردنەوەو رای گستی هاوڵاتیان بەرەو لاوازی دەچێـت و دادەخرێـت و لەهەمان کات دا میدیای نەوتی کە پارتی پاڵپشتیان دەکات کۆنترۆڵی فەزای گشتیان کردووە ، بۆیە ئێمە لە عێراق بەبێ چارەسەری مەلەفی نەوت شەفافیەت ناتوانین لەمەی هەیە رۆڵی زیاترمان هەبێت.

لەماوەی رابردوودا ئیمە رۆڵمان هەبووە لەسەر یاسای موازەنە و رۆڵمان هەبووە لەسەر دۆسیەی جوتیاران و بەردەوام جۆرێک لە پشتیوانیان بۆ وەزارەتی دارایی پەیداکردووە بۆ ئەوەی بتوانێـت ئەو پارەیە بنێرێت بۆ موچەی فەرمانبەران چونکە هیچ مانگێک نەبووە کێشە دروست نەبێـت هیچ مانگێک نەبووە بەشێک لە پەرلەمانتاران قسە نەکەن، ئێمە ئەوەندەی توانیبێتمان رێگریمان لە زۆر هەوڵ کردووە وە هەوڵمانداوە هەرچۆنێک بێـت لەم ساڵدا موچەی فەرمانبەران دابین بکەین، ئامانجی سەرەکیمان بریتیە لە پاراستنی موچە و بودجەی  خەڵکی کوردستان  لە هەردوو حکومەت، لەلایەک دەمانەوێـت دژی مافیایەتی و چەتەیی بوەستینەوە لەلایەک نەهێڵین حکومەتی عێراق جارێکی تر مەلەفی نەوت تێکەڵی موچەی فەرمانبەران بکات، رۆڵی ئیمە ئەوەیە نەهێڵین دۆسیەی نەوت و موچە تێکەڵ بکرێـت با بۆخۆیان رێک بکەون چونکە گوناهی فەرمانبەر نیە ئەوان لەسەر مەلەفی نەوت رێک ناکەون . بۆیە ئێستا گوتاری سەرەکی ئێمە ئەوەیە کە دەبێـت موچەی فەرمانبەران بەدوو بگیرێـت لە خیلافاتی هەردوو حکومەت .