دیوانی وەزارەتی پەروەردە بەنایاسایی پڕۆژەی داوە بەكۆمپانیاكان

"پڕۆژەیەكی ١٥٧ ملیۆنی راستەوخۆ دراوە بەكۆمپانیایەك"
"پێویستە بۆ گرێبەستەكان كەمكردنەوە هەبێت‌"

ژیان: تایبەت

رای دیوانی چاودێری دارایی هەرێم وایە، دیوانی وەزارەتی پەروەردەی هەرێمی كوردستان توشی لادان لەیاسا‌و ڕێنماییەكان بووە، دەڵێت پڕۆژەی داوە بەكۆمپانیاكان بەشێوەی راستەوخۆ".

دیوانی چاودێری دارایی هەرێمی كوردستان وردبینی بۆ كارەكانی دیوانی وەزارەتی پەروەردە كردووە، ڕاپۆرتەكە "پابەندكەرە"، تێیدا دیوان چەندین ڕەخنە لەكارەكانی دیوانی پەروەردە دەگرێت پێی وایە لایداوە لەڕێكارە یاسایی‌و پێوەرە ژمێریاری‌و كارگێڕییەكانی دەوڵەت.

چاودێری دارایی لەڕاپۆرتەكەیدا سەرەتا باسی خەرجیەكانی دیوانی وەزارەتی پەروردە دەكات، لەو میانەیەدا یەكەمین لێكۆڵینەوە كراوە بۆ خەرجی چالاكی دیدەوانی بەگوژمەی ١٩ ملیۆن‌و ٩٨ هەزار دینار، دیوان ئاماژەی بۆ ئەوەكردووە ٤٠٠ هەزار لەو پارەیە بۆ شۆفێرێك خەرجكراوە بۆ گواستنەوەی شاندی پەروەردەی كەركوك بۆ خێوەتگای دیدەوانی شێرەسوار لەكەركوك_ بۆ هەولێر‌و بەپێچەوەنەوە، بەڵام هەمان بڕ خەرجكراوە بۆ گواستنەوەی قوتابیانی پەروەردەی سلێمانی بۆ هەولێر بەپێچەوانەوە، ئەوەش بەلای دیوانەوە ئەوە دەگەیەنێت "وردبین نەبوون لەكاری بەكرێگرتن".

چاودێری دارایی رەخنە لەشاندو سەفەرەكانی دیوانی پەروەدە دەگرێت‌و پێی وایە بەگوێرەی پێوەری دیاریكراو نین‌و زۆرجار پسپۆڕی شاندەكان دەستنیشان ناكراوە

هاوكات بڕی ٣٥ ملیۆن‌و ٩٥٠ هەزار دینار خەرجكراوە بۆ تۆماركردنی ٤٥ گۆرانی باخچەی ساوایان، لەوپارەیە یەك ملیۆنی خەرجكراوە بۆ هاتووچۆی قوتابیان، بەڵام ماوەی هاتووچۆكە دیاری نەكراوە، هاوكات بڕی ٥٠٠ هەزار دینار بۆ كڕینی دیاری منداڵان خەرجكراوە، بەڵا لیستێك نەبوو بەناوی ئەو منداڵانە، لەگەڵ ئەوەش یەك ملیۆنی دیكە بۆ خواردن خەرجكراوە بەڵام دیارنیە چەند كەس بەشداربوون لەخوانەكەدا.

تیمەكەی چاودێری دارایی، رەخنە لەشاندو سەفەرەكانی دیوانی پەروەدە دەگرێت‌و پێی وایە بەگوێرەی پێوەری دیاریكراو نین‌و زۆرجار پسپۆڕی شاندەكان دەستنیشان ناكرێن، یان زۆرجار شاندەكان چەند كەسێكن دووبارە دەبنەوە.

دیوانی چاودێری دارایی دێتە سەرباسی گرێبەستەكانی وەزارەتی پەروەردە، سەرەتا باسی بەكرێ گرتنی كۆمپانیای خاوێنكردنەوە دەكات ئەم كۆمپانیایە بەشێوەی ڕاستەوخۆ بەگوژمەی ٤ ملیۆن‌و ٥٠٠ هەزار دراوە بەكۆمپانیایەك، كەمكردنەوەی ئاشكرای بۆ نەكراوە، ئەم دیاردەیە بەهەمان شێوە لەبەكرێگرتنی ٤١ كۆستەر دووبارە بووەتەوە كەبۆ هەریەكەیان ٤٥٠ هەزارخەرجكراوە ئەوش دراوە بۆ كۆمپانیایەك بەشێوەی ڕاستەوخۆ.

هاوكات باس لەپڕۆژەی دابینكردنی پێویستی بەچاپگەیاندن دەكات بەگوژمەی ٤٢١ ملیۆن دینار، دیوان تێبینی ئەوەدەكات ماوەی ڕاگەیاندنی پڕۆژەكە كەمتر بووە لە١٥ ڕۆژ بۆیە دووبارە كراوەتەوە.

هاوكات بەگوژنەی ٦٨٢ ملیۆن دینار گرێبەست كراوە بۆ بەچاپگەیاندنی "ئەتڵەسی هەرێم" بۆ هەموو پارێزگاكان، چاودێری دارایی ڕەخنەی ئەوە دەگرێت، هەموو ئەتڵەسەكان لەكۆگای وەزارەت مابوونەوە.

بەگوژنەی ٦٨٢ ملیۆن دینار گرێبەست كراوە بۆ بەچاپگەیاندنی "ئەتڵەسی هەرێم" بۆ هەموو پارێزگاكان، بەڵام هەموو ئەتڵەسەكان لەكۆگای وەزارەت ماونەتەوە

لەگەڵ ئەوەش دیوانی چاودێری دارایی ڕەخنەی ئەوە دەگرێت كەگرێبەست كراوە لەگەڵ كۆمپانیایەك بەبڕی ١٥٧ ملیۆن دینار، بەمەبەستی بەچاپگەیاندنی پەرتوكی كۆمپانیای كۆمپیوتەر بەڵام دواتر دەركەوتووە، ئەم پڕۆژەیە ڕاستەوخۆ دراوە بەكۆمپانیاكە.

لەلایەكی دیكەوە پڕۆژەی چاپكردنی پەرتوك هەبووە بەبڕی زیاتر ٦٣٩ ملیۆن دینار، بەڵام دیوان ڕەخنەی ئەوەدەگرێت، ئەو كۆمپانیایەی دیوان گرێبەستی لەگەڵ كردووە دەستەبەری بانكی درەنگ كەوتووە‌و كۆمپانیاكە كتێبەكەی دابەشنەكردووە بەسەر بەڕێوەبەرایەتیە گشتیەكان.

پاشان ڕاپۆرتەكەی دیوانی چاودێری دارایی دێتە سەرباری لایەنی یاسای‌و كارگێڕ دیوانی وەزارەتی پەروەردەی هەرێم، دەڵێت: "وەزارەت لەپەیكەری وەزاری لایداوە بەجۆرێك دەبێت ٤ڕاوێژكاری هەبێت بەڵام ١٠ ڕاوێژكاری بۆ دانراوە، لەگەڵ ئەوەش پەیڕەوی ناوخۆی وەزارەت نەبوو‌و پەیكەرەكەشی ڕێك‌و پێك نەبوو، هاوكات ئیش‌و كارەكان بەگوێرەی بەگوێرەی فەرمانی كارگێڕی دابەش نەكراوە بەسەر فەرمانبەراندا، بەراییەكان‌و شیكردنەوە‌و كردنەوە دوای گرێبەست وێنەیەك بەكۆپی ڕەوانەی ژمێریاری نەكراوە".

هاوكات لەبارەی كۆگای دیوانی وەزارەتی پەروەردەوە لیژنەكەی دیوان ڕەخنە لەجەردی ساڵانە دەگرن، دەڵێت: "تۆماری ١٣ی تایبەت بەتۆماری كەلوپەلی دیوانی وەزارەتی پەروەردە كاری لەسەرنەكراوە".

لەكۆتایی ڕاپۆرتەكەدا لیژنەكەی دیوانی چاودێری دارایی بەدێڕێك ئاماژە بەڕای خۆیان دەكەن لەبارەی كارەكانی دیوای وەزارەتی پەروەردەوە بەڕوونی ئەوە دەڵێن: "بەشێوەیەكی گشتی پابەند نەبوون بەیاسا، تەنها ئەو كەموكورتیانە نەبێت لەسەرەو باسیان كراوە".

دیوانی چاودێری دارایی هاوكاتی ڕاپۆرتەكە گوتارێكی كارگێڕی بۆ دیوانی وەزارەتی پەروەردە دەردەكات بڕگە بەبڕگە داوای چاكسازی دەكات.

دیوان داوای ئەوەدەكات، پێویستە لەكاتی بەكرێگرتنی ئۆتۆمبێل ڕەچاوی دوری‌و نزیكی شوێنەكە ڕەچاو بكرێت، هاوكات لیستێك هەبێت بەناوی ئەو سودمەندانە لەپارەی دەوڵەت، لەگەڵ ئەوەش لەكاتی كڕینی كەلول پەل پێویستە عەرزی پێشەكی وەربگیرێت.

دیوانی چاودێری دارایی: دیوانی وەزارەتی پەروەردە پابەندی یاسا نەبووە

پاشان، دیوانی چاودێری دارایی باسی گرێبەستەكان دەكات‌و داوا دەكات: "پێویستە بۆ گرێبەستەكان كەمكردنەوە هەبێت‌و كاتەكەش بەگوێرەی یاسا ڕێكبخرێت‌و ڕونكردنەوە بدرێت لەبارەی گرێبەستی چاپخانەكان".

دیوانی چاودێری دارایی لە"گوتارە كارگێڕی"یەكەیدا، جەخت لەسەر ئەوەدەكاتەوە پێویستە داوا لەئەنجومەنی وەزیران بكرێت بۆ دانانی جێگری وەزیر وە چارەسەری ئەو ڕاوێژكارانەی زیادەن لەوەزارەت، تۆمارەكانی تایبەت بەگرێبەستەكان كێشەكانی بەیاسایی بكرێت".

دیوان جەخت لەسەر دانانی پەیڕەوی ناوخۆی وەزارەت دەكاتەوە‌و ئەوەش دەڵێت: "پەیكەرێكی رێك‌و پێك ئامادەبكرێت‌و كاری كارمەندانیش ڕێكبخرێت".